Read Библия Церковнославянская Премѹ́дрости соломѡ́ни 7 Bible Online

Премѹ́дрости соломѡ́ни 7 - Библия Церковнославянская bible

Премѹ́дрости соломѡ́ни 7

¹Е҆́смь бо и҆ а҆́зъ человѣ́къ сме́ртенъ, подо́бенъ всѣ҄мъ и҆ земноро́днагѡ внѹ́къ первозда́ннагѡ:

²и҆ во чре́вѣ ма́терни и҆з̾ѡбрази́хсѧ пло́ть, въ десѧтомѣ́сѧчнѣмъ вре́мени согѹсти́всѧ въ кро́ви ѿ сѣ́мене мѹ́жеска и҆ ѹ҆слажде́нїѧ сно́мъ соше́дшагѡсѧ.

³И҆ а҆́зъ рожде́нъ воспрїѧ́хъ ѻ҆́бщагѡ а҆́ера и҆ на подобостра́стнѹю зе́млю спадо́хъ, пе́рвый гла́съ подо́бный всѣ҄мъ и҆спѹсти́хъ пла́ча:

⁴въ пелена́хъ воскормле́нъ є҆́смь, и҆ съ (вели́кимъ) прилѣжа́нїемъ:

⁵ни є҆ди́нъ бо ца́рь и҆́но и҆мѣ̀ рожде́нїѧ нача́ло,

⁶є҆ди́нъ бо вхо́дъ всѣ҄мъ є҆́сть въ житїѐ, подо́бенъ же и҆ и҆схо́дъ.

⁷Сегѡ̀ ра́ди помоли́хсѧ, и҆ да́нъ бы́сть мнѣ̀ ра́зѹмъ: призва́хъ, и҆ прїи́де на мѧ̀ дѹ́хъ премѹ́дрости.

⁸Предсѹди́хъ ю҆̀ па́че ски́птрѡвъ и҆ престо́лѡвъ, и҆ бога́тство ничто́же вмѣни́хъ ко сравне́нїю тоѧ̀,

⁹нижѐ ѹ҆подо́бихъ є҆ѧ̀ ка́меню драгоцѣ́нномѹ, ѩ҆́кѡ всѐ зла́то пред̾ не́ю песо́къ ма́лый, и҆ ѩ҆́кѡ бре́нїе вмѣни́тсѧ пред̾ не́ю сребро̀:

¹⁰па́че здра́вїѧ и҆ красоты̀ возлюби́хъ ю҆̀ и҆ пред̾избра́хъ ю҆̀ вмѣ́стѡ свѣ́та и҆мѣ́ти, ѩ҆́кѡ неѹгаса́емо є҆́сть блиста́нїе є҆ѧ̀.

¹¹Прїидо́ша же мнѣ̀ блага҄ѧ всѧ҄ вкѹ́пѣ съ не́ю и҆ безчи́слено бога́тство рѹка́ма є҆ѧ̀:

¹²и҆ возвесели́хсѧ ѡ҆ всѣ́хъ, ѩ҆́кѡ и҆́ми ѡ҆блада́етъ премѹ́дрость: не вѣ́дѣхъ же ю҆̀ роди́телницѹ бы́ти си́хъ.

¹³Неле́стнѣ наѹчи́хсѧ, без̾ за́висти преподаю̀ и҆ бога́тства є҆ѧ̀ не сокрыва́ю:

¹⁴неѡскѹ́дно бо є҆́сть сокро́вище человѣ́кѡмъ, є҆́же ѹ҆потреби́вшїи къ бг҃ѹ посла́шасѧ въ содрѹже́нїе, дара́ми ѿ наказа́нїѧ предста́влени.

¹⁵Мнѣ́ же дадѐ бг҃ъ глаго́лати по разѹмѣ́нїю и҆ мнѣ́ти досто́йнѣ ѡ҆ подава́емыхъ, ѩ҆́кѡ то́й и҆ премѹ́дрости предводи́тель є҆́сть и҆ премѹ́дрыхъ и҆спра́витель:

¹⁶въ рѹкѹ́ бо є҆гѡ̀ и҆ мы̀ и҆ словеса̀ на҄ша, и҆ всѧ́кїй ра́зѹмъ и҆ дѣ́лъ хѹдо́жество.

¹⁷Се́й бо дадѐ мнѣ̀ ѡ҆ сѹ́щихъ позна́нїе нело́жное, позна́ти составле́нїе мі́ра и҆ дѣ́йствїе стїхі́й,

¹⁸нача́ло и҆ коне́цъ и҆ среди́нѹ време́нъ, возвра́тѡвъ премѣ҄ны и҆ и҆змѣнє́нїѧ време́нъ,

¹⁹лѣ́тъ крѹ́ги и҆ ѕвѣ́здъ расположє́нїѧ,

²⁰є҆стество̀ живо́тныхъ и҆ гнѣ́въ ѕвѣре́й, вѣ́трѡвъ ѹ҆си́лїе и҆ помышлє́нїѧ человѣ́кѡвъ, ра́знство лѣ́тораслемъ и҆ си҄лы коре́нїй.

²¹И҆ є҆ли҄ка сѹ́ть скры҄та и҆ ѩ҆́вна, позна́хъ: всѣ́хъ бо хѹдо́жница наѹчи́ мѧ премѹ́дрость.

²²Е҆́сть бо въ то́й дѹ́хъ ра́зѹма ст҃ъ, є҆диноро́дный, многоча́стный, то́нкїй, благодви́жный, свѣ́тлый, нескве́рный, ѩ҆́сный, невреди́телный, благолюби́вый, ѻ҆́стръ, невозбра́ненъ, благодѣ́лателенъ,

²³человѣколюби́въ, и҆звѣ́стный, крѣ́пкїй, безпеча́льный, всеси́льный, всеви́дѧй, и҆ сквозѣ̀ всѧ҄ проходѧ́й дѹ́хи разѹми҄чныѧ, чи҄стыѧ, тонча́йшыѧ.

²⁴Всѧ́кагѡ бо движе́нїѧ подви́жнѣйша є҆́сть премѹ́дрость: достиза́етъ же и҆ проница́етъ сквозѣ̀ всѧ́чєскаѧ ра́ди (своеѧ̀) чистоты̀.

²⁵Па́ра бо є҆́сть си́лы бж҃їѧ и҆ и҆злїѧ́нїе вседержи́телѧ сла́вы чи́стое: сегѡ̀ ра́ди ничто́же ѡ҆скверне́но на ню̀ напа́даетъ.

²⁶Сїѧ́нїе бо є҆́сть свѣ́та пр҇носѹ́щнагѡ и҆ зерца́ло непоро́чно бж҃їѧ дѣ́йствїѧ и҆ ѡ҆́бразъ бл҃госты́ни є҆гѡ̀.

²⁷Е҆ди́на же сѹ́щи всѧ́чєскаѧ мо́жетъ, и҆ пребыва́ющи въ себѣ̀ всѧ҄ ѡ҆бновлѧ́етъ, и҆ по родѡ́мъ въ дѹ́шы прпдбныхъ преходѧ́щи, дрѹ́ги бж҃їѧ и҆ про҇ро́ки ѹ҆строѧ́етъ:

²⁸ни кого́же бо лю́битъ бг҃ъ, то́кмѡ сего̀, и҆́же со премѹ́дростїю пребыва́етъ.

²⁹Е҆́сть бо сїѧ̀ благолѣ́пнѣе со́лнца и҆ па́че всѧ́кагѡ расположе́нїѧ ѕвѣ́здъ: свѣ́тѹ соравнѧ́ема ѡ҆брѣта́етсѧ пе́рваѧ:

³⁰сего́ бо прее́млетъ но́щь, премѹ́дрости же не ѡ҆долѣ́етъ ѕло́ба.