Read Библия Церковнославянская Премѹ́дрости соломѡ́ни 8 Bible Online

Премѹ́дрости соломѡ́ни 8 - Библия Церковнославянская bible

Премѹ́дрости соломѡ́ни 8

¹Досѧза́етъ же ѿ конца̀ да́же до конца̀ крѣ́пкѡ и҆ ѹ҆правлѧ́етъ всѧ҄ бла́гѡ.

²Сїю̀ возлюби́хъ и҆ поиска́хъ ѿ ю҆́ности моеѧ̀, и҆ взыска́хъ невѣ́стѹ привестѝ себѣ̀, и҆ люби́тель бы́хъ красоты̀ є҆ѧ̀.

³Благоро́дство сла́витъ сожи́тїе бж҃їе и҆мѹ́щи, и҆ всѣ́хъ влдка возлюбѝ ю҆̀:

⁴таи́бница бо є҆́сть бж҃їѧ хи́трости и҆ ѡ҆брѣта́телница дѣ́лъ є҆гѡ̀.

⁵И҆ а҆́ще бога́тство є҆́сть вожделѣ́нное притѧжа́нїе въ животѣ̀, что̀ премѹ́дрости богатѣ́йше, є҆́юже дѣ́лаютсѧ всѧ҄;

⁶А҆́ще же ра́зѹмъ дѣ́лаетъ, кто̀ є҆ѧ̀ ѿ сѹ́щихъ лѹ́чшїй хѹдо́жникъ є҆́сть;

⁷И҆ а҆́ще пра́вдѹ лю́битъ кто̀, трѹды̀ є҆ѧ̀ сѹ́ть добродѣ́тєли: цѣломѹ́дрїю бо и҆ ра́зѹмѹ ѹ҆чи́тъ, пра́вдѣ и҆ мѹ́жествѹ, и҆́хже потре́бнѣе ничто́же є҆́сть въ житїѝ человѣ́кѡмъ.

⁸А҆́ще же и҆ мно́гагѡ и҆скѹ́сства жела́етъ кто̀, вѣ́сть дрє́внѧѧ и҆ бы́ти хотѧ҄щаѧ разсмотрѧ́етъ: свѣ́сть и҆зви҄тїѧ слове́съ и҆ разрѣшє́нїѧ гада́нїй, зна́мєнїѧ и҆ чѹдеса̀ проразѹмѣва́етъ и҆ сбытїѧ҄ време́нъ и҆ лѣ́тъ.

⁹Сѹди́хъ ѹ҆̀бо сїю̀ привестѝ мнѣ̀ къ сожи́тїю, вѣ́дый, ѩ҆́кѡ бѹ́детъ мѝ совѣ́тница благи́хъ и҆ ѹ҆тѣше́нїе попече́нїй и҆ печа́ли.

¹⁰И҆мѣ́ти бѹ́дѹ ра́ди є҆ѧ̀ сла́вѹ въ наро́дѣхъ и҆ че́сть пред̾ ста҄рцы, ю҆́нъ сы́й:

¹¹ѻ҆́стръ ѡ҆брѧ́щѹсѧ въ сѹдѣ̀, и҆ ли́ца си́льныхъ ѹ҆дивѧ́тсѧ мнѣ̀:

¹²молча́щѹ мѝ потерпѧ́тъ и҆ вѣща́ющѹ мѝ и҆́мѹтъ внима́ти, и҆ глаго́лющѹ мѝ ѡ҆ мно́зѣ, рѹ́кѹ положа́тъ на ѹ҆ста̀ своѧ҄.

¹³Сеѧ̀ ра́ди прїимѹ̀ безсме́ртїе и҆ па́мѧть вѣ́чнѹю сѹ́щымъ по мнѣ̀ ѡ҆ста́влю:

¹⁴ѹ҆пра́влю лю́ди, и҆ ѩ҆зы́цы покорѧ́тсѧ мѝ:

¹⁵ѹ҆боѧ́тсѧ менє̀ слы́шавшїи мѹчи́телїе стра́шнїи: во мно́жествѣ ѩ҆влю́сѧ бла́гъ и҆ въ бра́ни крѣ́покъ.

¹⁶Вше́дъ въ до́мъ мо́й ѹ҆поко́юсѧ съ не́ю: не бо̀ и҆́мать го́рести соѡбще́нїе є҆ѧ̀, ни болѣ́зни сожи́тїе тоѧ̀, но весе́лїе и҆ ра́дость.

¹⁷Сїѧ҄ помы́сливъ во мнѣ̀, печа́хсѧ въ се́рдцы мое́мъ, ѩ҆́кѡ безсме́ртїе є҆́сть въ сро́дствѣ премѹ́дрости,

¹⁸и҆ въ содрѹже́нїи є҆ѧ̀ ѹ҆слажде́нїе бла́го, и҆ въ трѹдѣ́хъ рѹкѹ̀ є҆ѧ̀ бога́тство без̾ ѡ҆скѹдѣ́нїѧ, и҆ въ соѡбѹче́нїи бесѣ́ды є҆ѧ̀ ра́зѹмъ, и҆ благосла́вїе въ приѡбще́нїи слове́съ є҆ѧ̀, ѡ҆бхожда́хъ и҆́шѹщь, да воспрїимѹ̀ ю҆̀ въ себѐ.

¹⁹Ѻ҆́трокъ же бѣ́хъ ѻ҆строѹ́менъ, дѹ́шѹ же полѹчи́хъ бла́гѹ:

²⁰па́че же бла́гъ сы́й прїидо́хъ въ тѣ́ло нескве́рно.

²¹Позна́въ же, ѩ҆́кѡ не и҆́накѡ ѡ҆держѹ̀, а҆́ще не бг҃ъ да́стъ, и҆ сїе́ же бѣ̀ ра́зѹма, є҆́же вѣ́дѣти, чїѧ̀ є҆́сть благода́ть, прїидо́хъ ко гд҇ѹ и҆ моли́хсѧ є҆мѹ̀, и҆ реко́хъ ѿ всегѡ̀ се́рдца моегѡ̀: