Read Библия Церковнославянская Сiрахъ 1 Bible Online

Сiрахъ 1 - Библия Церковнославянская bible

Сiрахъ 1

¹ Всѧ́ка премѹ́дрость ѿ гд҇а и҆ съ ни́мъ є҆́сть во вѣ́къ.

²Песка̀ морска́го, и҆ ка҄пли дождє́вныѧ, и҆ дни҄ вѣ́ка кто̀ и҆зочте́тъ;

³Высотѹ̀ небесѐ и҆ широтѹ̀ землѝ, и҆ бе́зднѹ и҆ премѹ́дрость кто̀ и҆зслѣ́дитъ;

⁴Пре́жде всѣ́хъ созда́сѧ премдрость, и҆ ра́зѹмъ мѹ́дрости ѿ вѣ́ка.

⁵И҆сто́чникъ премѹ́дрости сло́во бж҃їе въ вы́шнихъ, и҆ шє́ствїѧ є҆ѧ̀ за́пѡвѣди вѣ҄чныѧ.

⁶Ко́рень премѹ́дрости комѹ̀ ѿкры́сѧ; и҆ кѡва́рства є҆ѧ̀ кто̀ разѹмѣ̀;

⁷Е҆ди́нъ є҆́сть премдръ, стра́шенъ ѕѣлѡ̀, сѣдѧ́й на пр҇то́лѣ свое́мъ, гд҇ь.

⁸Са́мъ созда̀ ю҆̀, и҆ ви́дѣ, и҆ сочтѐ ю҆̀,

⁹и҆ и҆злїѧ̀ ю҆̀ на всѧ҄ дѣла̀ своѧ҄,

¹⁰со всѧ́кою пло́тїю по даѧ́нїю своемѹ̀, и҆ дарова̀ ю҆̀ лю́бѧщымъ є҆го̀.

¹¹Стра́хъ гд҇ень сла́ва и҆ похвала̀, и҆ весе́лїе и҆ вѣне́цъ ра́дости.

¹²Стра́хъ гд҇ень возвесели́тъ се́рдце и҆ да́стъ весе́лїе и҆ ра́дость и҆ долгоде́нствїе.

¹³Боѧ́щемѹсѧ гд҇а бла́го бѹ́детъ на послѣ́докъ, и҆ въ де́нь сконча́нїѧ своегѡ̀ ѡ҆брѧ́щетъ благода́ть. Стра́хъ гд҇ень да́ръ ѿ гд҇а и҆ на стезѧ́хъ любле́нїѧ поставлѧ́етъ.

¹⁴Любле́нїе гд҇а пресла́внаѧ премѹ́дрость, и҆ и҆̀мже ѩ҆влѧ́етсѧ, раздѣлѧ́етъ себѐ въ вѣ́дѣнїе є҆гѡ̀.

¹⁵Нача́ло премѹ́дрости боѧ́тисѧ гд҇а, и҆ съ вѣ́рными въ ложеснѣ́хъ созда́сѧ и҆̀мъ: съ человѣ҄ки ѡ҆снова́нїе вѣ́ка ѹ҆гнѣздѝ и҆ съ сѣ́менемъ и҆́хъ ѹ҆вѣ́ритсѧ.

¹⁶И҆сполне́нїе премѹ́дрости є҆́же боѧ́тисѧ гд҇а, и҆ ѹ҆пои́тъ и҆̀хъ ѿ плодѡ́въ є҆ѧ̀:

¹⁷ве́сь до́мъ и҆́хъ и҆спо́лнитъ жела́нїй свои́хъ и҆ сосѹ́ды ѿ жи҄тъ є҆ѧ̀.

¹⁸Вѣне́цъ мѹ́дрости стра́хъ гд҇ень, возцвѣта́ѧй ми́ръ и҆ здра́вїе и҆зцѣле́нїѧ: ѻ҆боѧ́ же сѹ́ть да́ры бж҃їи, и҆ разширѧ́етъ весе́лїе лю́бѧщымъ є҆го̀.

¹⁹И҆ ви́дѣ и҆ сочтѐ ю҆̀: хѹдо́жество и҆ вѣ́дѣнїе ра́зѹма ѡ҆дождѝ, и҆ сла́вѹ держа́щихъ ю҆̀ вознесѐ.

²⁰Ко́рень премѹ́дрости є҆́же боѧ́тисѧ гд҇а, и҆ вѣ҄тви є҆ѧ̀ долгоде́нствїе.

²¹Стра́хъ гд҇ень ѿрѣѧ́етъ грѣхѝ: пребыва́ѧй же въ не́мъ ѿвраща́етъ гнѣ́въ.

²²Не мо́жетъ ѩ҆́рость непра́веднаѧ ѡ҆правди́тисѧ: ѹ҆стремле́нїе бо ѩ҆́рости є҆гѡ̀ паде́нїе є҆мѹ̀.

²³До вре́мене стерпи́тъ долготерпѣли́вый, и҆ послѣдѝ возда́стъ є҆мѹ̀ весе́лїе:

²⁴до вре́мене скры́етъ словеса̀ своѧ҄, и҆ ѹ҆стнѣ̀ вѣ́рныхъ и҆сповѣ́дѧтъ ра́зѹмъ є҆гѡ̀.

²⁵Въ сокро́вищихъ премѹ́дрости при́тча вѣ́дѣнїѧ: ме́рзость же грѣ́шникѹ бг҃оче́стїе.

²⁶Возжелѣ́въ премѹ́дрости, соблюдѝ за́пѡвѣди, и҆ гд҇ь пода́стъ ю҆̀ тебѣ̀:

²⁷премѹ́дрость бо и҆ наказа́нїе стра́хъ гд҇ень, и҆ благоволе́нїе є҆гѡ̀ вѣ́ра и҆ кро́тость.

²⁸Не сѹмнѣва́йсѧ ѡ҆ стра́сѣ гд҇ни и҆ не пристѹпѝ къ немѹ̀ се́рдцемъ раздвое́нымъ.

²⁹Не лицемѣ́рствѹй пред̾ ѹ҆сты҄ человѣ́ческими и҆ ѹ҆стна́мъ твои҄мъ вонмѝ.

³⁰Не возноси́сѧ, да не паде́ши и҆ наведе́ши дѹшѝ твое́й безче́стїе, и҆ ѿкры́етъ гд҇ь та҄йнаѧ твоѧ҄ и҆ посредѣ̀ со́нма низложи́тъ тѧ̀: ѩ҆́кѡ не пристѹпи́лъ є҆сѝ во и҆́стинѣ ко стра́хѹ гд҇ню, и҆ се́рдце твоѐ и҆спо́лнено лѹка́вства.