Read Библия Церковнославянская Сiрахъ 10 Bible Online

Сiрахъ 10 - Библия Церковнославянская bible

Сiрахъ 10

¹Премѹ́дръ сѹдїѧ̀ наказѹ́етъ лю́ди своѧ҄, и҆ влады́чество разѹми́вагѡ благочи́нно бѹ́детъ.

²ѩ҆́коже сѹдїѧ̀ люді́й свои́хъ, та́кѡ и҆ слѹзѝ є҆гѡ̀, и҆ ѩ҆́коже влады́ка гра́да, та́кѡ и҆ всѝ живѹ́щїи въ не́мъ.

³Ца́рь ненака́заный погѹби́тъ лю́ди своѧ҄: и҆ гра́дъ насели́тсѧ премѹ́дростїю си́льныхъ.

⁴Въ рѹцѣ̀ гд҇ни вла́сть землѝ, и҆ потре́бнаго воздви́гнетъ во вре́мѧ на не́й.

⁵Въ рѹцѣ̀ гд҇ни благо́е ше́ствїе мѹ́жа, и҆ на лицы̀ кни́жника возложи́тъ сла́вѹ свою̀.

⁶Во всѧ́цѣй непра́вдѣ не держѝ гнѣ́ва на и҆́скреннѧго и҆ не творѝ ни ко́егѡ въ дѣ́лѣхъ досажде́нїѧ.

⁷Возненави́дѣна пред̾ бг҃омъ и҆ человѣ҄ки горды́нѧ и҆ ѿ ѻ҆бои́хъ сотвори́тъ непра́вєднаѧ.

⁸Ца́рство ѿ ѩ҆зы́ка въ ѩ҆зы́къ прево́дитсѧ, ра́ди непра́вды и҆ досажде́нїѧ и҆ и҆мѣ́нїй льсти́выхъ.

⁹Почто̀ горди́тсѧ землѧ̀ и҆ пе́пелъ;

¹⁰ѩ҆́кѡ въ животѣ̀ и҆зверго́хъ ѹ҆тро́бѹ є҆гѡ̀.

¹¹До́лгѹю болѣ́знь ѿсѣца́етъ вра́чь:

¹²и҆ ца́рь дне́сь, а҆ ѹ҆́трѡ ѹ҆́мретъ.

¹³И҆́бо є҆гда̀ ѹ҆́мретъ человѣ́къ, наслѣ́дитъ га́ды и҆ ѕвѣ҄ри и҆ че́рвїе.

¹⁴Нача́ло горды́ни человѣ́кѹ ѿстѹпле́нїе ѿ гд҇а, и҆ є҆гда̀ ѿ сотво́ршаго и҆̀ ѿвраща́етсѧ се́рдце є҆гѡ̀:

¹⁵ѩ҆́кѡ нача́ло грѣха̀ горды́нѧ, и҆ держа́й ю҆̀ и҆зры́гнетъ скве́рнѹ.

¹⁶Сегѡ̀ ра́ди ѡ҆безсла́ви гд҇ь въ наведе́нїихъ ѕѡ́лъ и҆ низвратѝ и҆̀хъ до конца̀:

¹⁷престо́лы кнѧзе́й низложѝ гд҇ь и҆ посадѝ крѡ́ткїѧ вмѣ́стѡ и҆́хъ,

¹⁸корє́нїѧ ѩ҆зы́кѡвъ го́рдыхъ и҆сто́рже гд҇ь и҆ насадѝ смирє́нныѧ вмѣ́стѡ и҆́хъ,

¹⁹страны҄ ѩ҆зы́кѡвъ низвратѝ гд҇ь и҆ погѹбѝ и҆̀хъ до ѡ҆снова́нїѧ землѝ,

²⁰и҆зсѹшѝ ѿ ни́хъ и҆ погѹбѝ и҆̀хъ и҆ потребѝ ѿ землѝ па́мѧть и҆́хъ.

²¹Не создана̀ бы́сть человѣ́кѡмъ горды́нѧ, ни гнѣ́въ ѩ҆́рости рожде́нїємъ же́нъ.

²²Сѣ́мѧ честно́е ко́е; сѣ́мѧ человѣ́ческое. сѣ́мѧ честно́е ко́е; боѧ́щїисѧ гд҇а.

²³Сѣ́мѧ безче́стное ко́е; сѣ́мѧ человѣ́ческое. сѣ́мѧ безче́стное ко́е; престѹпа́ющїи за́пѡвѣди.

²⁴Посредѣ̀ бра́тїи старѣ́йшина и҆́хъ че́стенъ, и҆ боѧ́щїисѧ гд҇а пред̾ ѻ҆чи́ма є҆гѡ̀.

²⁵Бога́тъ и҆ сла́венъ и҆ ни́щь, похвала̀ и҆́хъ стра́хъ гд҇ень.

²⁶Непра́ведно є҆́сть ѹ҆корѧ́ти ни́ща разѹми́ва, и҆ не подоба́етъ сла́вити мѹ́жа грѣ́шника.

²⁷Вельмо́жа и҆ сѹдїѧ̀ и҆ си́льный сла́вни бѹ́дѹтъ, и҆ нѣ́сть ѿ ни́хъ ни є҆ди́нъ вѧ́щшїй боѧ́щагѡсѧ гд҇а.

²⁸Рабѹ̀ разѹми́вѹ свобо́днїи послѹ́жатъ, и҆ мѹ́жъ хи́тръ не поро́пщетъ наказѹ́емь.

²⁹Не мѹдри́сѧ твори́ти дѣ́ла своегѡ̀, и҆ не сла́ви себѐ во вре́мѧ тѹгѝ твоеѧ̀.

³⁰Лѹ́чше дѣ́лаѧй и҆ и҆з̾ѻби́лѹѧй во все́мъ, не́же сла́вѧйсѧ и҆ лиша́ѧйсѧ хлѣ́ба.

³¹Ча́до, кро́тостїю просла́ви дѹ́шѹ твою̀ и҆ да́ждь є҆́й че́сть по досто́инствѹ є҆ѧ̀.

³²Согрѣша́ющаго на дѹ́шѹ свою̀ кто̀ ѡ҆правди́тъ; и҆ кто̀ просла́витъ безче́ствѹюща живо́тъ сво́й;

³³Ни́щїй сла́вимь є҆́сть вѣ́жества ра́ди своегѡ̀, и҆ бога́тый сла́вимь є҆́сть бога́тства ра́ди своегѡ̀.

³⁴Прославлѧ́емый же въ нищетѣ̀, а҆ въ бога́тствѣ кольмѝ па́че; безсла́вный же въ бога́тствѣ, а҆ въ нищетѣ̀ кольмѝ па́че;