Read Библия Церковнославянская Сiрахъ 11 Bible Online

Сiрахъ 11 - Библия Церковнославянская bible

Сiрахъ 11

¹Премѹ́дрость смире́ннагѡ вознесе́тъ главѹ̀ є҆гѡ̀ и҆ посредѣ̀ вельмо́жъ посади́тъ є҆го̀.

²Не похвалѝ человѣ́ка во красотѣ̀ є҆гѡ̀, и҆ не бѹ́ди тѝ ме́рзокъ человѣ́къ видѣ́нїемъ свои́мъ.

³Мала̀ є҆́сть въ перна́тыхъ пчела̀, и҆ нача́токъ сла́достей пло́дъ є҆ѧ̀.

⁴Во ѡ҆дѣ́ѧнїи ри́зъ не похвали́сѧ и҆ въ де́нь сла́вы не превозноси́сѧ: ѩ҆́кѡ ди҄вна дѣла̀ гд҇нѧ и҆ та҄йна дѣла̀ є҆гѡ̀ пред̾ челѡвѣ́ки.

⁵Мно́зи мѹчи́телїе сѣдо́ша на землѝ, неча́емый же ѹ҆вѧзе́сѧ вѣнце́мъ.

⁶Мно́зи си́льнїи ѹ҆коре́ни бы́ша ѕѣлѡ̀, и҆ сла́внїи пре́дани бы́ша въ рѹ́ки и҆нѣ́хъ.

⁷Пе́рвѣе не́же и҆спыта́еши, не порица́й, ѹ҆разѹмѣ́й пре́жде и҆ тогда̀ запреща́й.

⁸Пре́жде не́же ѹ҆слы́шиши, не ѿвѣщава́й, и҆ не влага́йсѧ въ средѹ̀ бесѣ́ды.

⁹Ѡ҆ ве́щи, ѩ҆́же тѝ нѣ́сть на потре́бѹ, не тѧжи́сѧ, и҆ на сѹдѣ̀ грѣ́шникѡвъ не сѣда́й.

¹⁰Ча́до, дѣѧ҄нїѧ твоѧ҄ да не бѹ́дѹтъ ѡ҆ мно́зѣ: а҆́ще ѹ҆мно́жиши, не бѹ́деши непови́ненъ, и҆ а҆́ще сѐ го́ниши, не пости́гнеши, и҆ не ѹ҆тече́ши бѣжа́щь.

¹¹Е҆́сть трѹжда́ѧйсѧ и҆ потѧ́сѧ и҆ тща́сѧ, и҆ толи́кѡ па́че лиша́етсѧ.

¹²Е҆́сть сла́бъ и҆ тре́бѹѧй застѹпле́нїѧ, лиша́ѧйсѧ си́лы, и҆ нището́ю и҆з̾ѻби́лѹетъ:

¹³и҆ ѻ҆́чи гд҇ни призрѣ́ста є҆мѹ̀ во блага҄ѧ, и҆ воздви́же и҆̀ ѿ смире́нїѧ є҆гѡ̀, и҆ вознесѐ главѹ̀ є҆гѡ̀, и҆ диви́шасѧ ѡ҆ не́мъ мно́зи.

¹⁴Блага҄ѧ и҆ ѕла҄ѧ, живо́тъ и҆ сме́рть, нищета̀ и҆ бога́тство ѿ гд҇а сѹ́ть.

¹⁵Даѧ́нїе гд҇не пребыва́етъ бл҃гочести҄вымъ, и҆ бл҃говоле́нїе є҆гѡ̀ бл҃гопоспѣши́тсѧ во вѣ́къ.

¹⁶Е҆́сть богатѧ́йсѧ ѹ҆держа́нїемъ и҆ скѹ́постїю свое́ю, и҆ сїѧ̀ ча́сть мзды̀ є҆гѡ̀,

¹⁷внегда̀ рещѝ є҆мѹ̀: ѡ҆брѣто́хъ поко́й и҆ нн҃ѣ ѩ҆́мъ ѿ бла҄гъ мои́хъ.

¹⁸И҆ не вѣ́сть, ко́е вре́мѧ прїи́детъ, и҆ ѡ҆ста́витъ ѧ҆̀ и҆нѣ҄мъ, и҆ ѹ҆́мретъ.

¹⁹Сто́й въ завѣ́тѣ твое́мъ и҆ пребыва́й въ не́мъ, и҆ въ дѣ́лѣ твое́мъ ѡ҆бетша́й.

²⁰Не диви́сѧ дѣлѡ́мъ грѣ́шника, вѣ́рѹй же гд҇еви и҆ пребыва́й въ трѹдѣ̀ твое́мъ:

²¹ѩ҆́кѡ ѹ҆до́бно є҆́сть пред̾ ѻ҆чи́ма гд҇нима внеза́пѹ ѡ҆богати́ти ни́щаго.

²²Блг҇ве́нїе гд҇не на мздѣ̀ благочести́вагѡ, и҆ въ ча́съ ско́ръ процвѣте́тъ блг҇ве́нїе є҆гѡ̀.

²³Не рцы̀: ка́ѧ мѝ потре́ба є҆́сть, и҆ ка҄ѧ ѿнн҃ѣ бѹ́дѹтъ мѝ блага҄ѧ;

²⁴Не рцы̀: довѡ́лна мѝ сѹ́ть, и҆ чи́мъ ѿсе́лѣ ѡ҆ѕло́бленъ бѹ́дѹ;

²⁵Въ де́нь благи́хъ забве́нїе ѕлы́хъ, въ де́нь же ѕлы́хъ не воспомѧнѹ́тсѧ блага҄ѧ:

²⁶ѩ҆́кѡ ѹ҆до́бно є҆́сть пред̾ бг҃омъ, въ де́нь сме́рти возда́ти человѣ́кѹ по дѣлѡ́мъ є҆гѡ̀.

²⁷Ѡ҆ѕлобле́нїе вре́мене забы́тїе твори́тъ сла́дости, и҆ въ сконча́нїи человѣ́ка ѿкры́тїе дѣ́лъ є҆гѡ̀.

²⁸Пре́жде сме́рти не блажѝ ни кого́же, и҆ въ ча́дѣхъ свои́хъ позна́нъ бѹ́детъ мѹ́жъ.

²⁹Не всѧ́каго человѣ́ка вводѝ въ до́мъ тво́й: мнѡ́ги бо сѹ́ть кѡ́зни льсти́вагѡ.

³⁰ѩ҆́коже рѧ́бка ѹ҆ловле́наѧ въ клѣ́тцѣ (ѡ҆бглѧ́даетъ), та́кѡ се́рдце го́рдагѡ, и҆ ѩ҆́коже соглѧ́дникъ назира́етъ паде́нїѧ:

³¹до́брое бо на ѕло̀ ѡ҆браща́ѧ, подса́дѹ твори́тъ и҆ на дѡ́брыѧ дѣ́тєли возложи́тъ поро́къ.

³²Ѿ и҆́скры ѻ҆́гненныѧ ѹ҆множа́етсѧ ѹ҆́глїе, и҆ человѣ́къ грѣ́шникъ на кро́вь присѣди́тъ.

³³Блюди́сѧ ѿ ѕлодѣ́ѧ, ѕло́ бо содѣва́етъ, да не когда̀ поро́къ да́стъ тѝ во вѣ́къ.

³⁴Вселѝ чѹжда́го въ до́мъ тво́й, и҆ разврати́тъ тѧ̀ мѧте́жемъ и҆ чѹ́жда тѧ̀ сотвори́тъ ѿ твои́хъ тѝ.