Read Библия Церковнославянская Сiрахъ 12 Bible Online

Сiрахъ 12 - Библия Церковнославянская bible

Сiрахъ 12

¹А҆́ще добро̀ твори́ши, разѹмѣ́й, комѹ̀ твори́ши, и҆ бѹ́детъ благода́ть благи҄мъ твои҄мъ.

²Добро̀ сотворѝ благочести́вомѹ, и҆ ѡ҆брѧ́щеши воздаѧ́нїе, и҆ а҆́ще не ѿ негѡ̀, то̀ ѿ вы́шнѧгѡ.

³Не бѹ́детъ добро̀ прилѣжа́щемѹ во ѕлы́хъ и҆ не подаю́щемѹ ми́лостыни.

⁴Да́ждь благочести́вомѹ и҆ не застѹпа́й грѣ́шника.

⁵Добро̀ сотворѝ смире́нномѹ и҆ не да́ждь нечести́вомѹ: возбранѝ хлѣ́бы твоѧ҄ и҆ не да́ждь є҆мѹ̀, да не тѣ́ми тѧ̀ премо́жетъ:

⁶сѹгѹ҄ба бо ѕла҄ ѡ҆брѧ́щеши во всѣ́хъ благи́хъ, ѩ҆̀же а҆́ще сотвори́ши є҆мѹ̀: ѩ҆́кѡ и҆ вы́шнїй возненави́дѣ грѣ́шники и҆ нечести҄вымъ возда́стъ ме́сть.

⁷Да́ждь благо́мѹ и҆ не застѹпа́й грѣ́шника.

⁸Не позна́нъ бѹ́детъ во благи́хъ дрѹ́гъ и҆ не скры́етсѧ во ѕлы́хъ вра́гъ.

⁹Е҆гда̀ во благи́хъ бѹ́детъ мѹ́жъ, вразѝ є҆гѡ̀ во печа́ли сѹ́ть, во ѕлы́хъ же є҆гѡ̀ и҆ дрѹ́гъ разлѹчи́тсѧ.

¹⁰Не и҆мѝ вѣ́ры врагѹ̀ твоемѹ̀ во вѣ́ки: ѩ҆́коже бо мѣ́дь ржа́вѣетъ, та́кѡ и҆ ѕло́ба є҆гѡ̀:

¹¹и҆ а҆́ще смири́тсѧ и҆ по́йдетъ пони́кнѹвъ, наста́ви дѹ́шѹ твою̀ и҆ храни́сѧ ѿ негѡ̀, и҆ бѹ́деши є҆мѹ̀ ѩ҆́кѡ ѡ҆чище́но зерца́ло, и҆ ѹ҆разѹмѣ́еши, ѩ҆́кѡ не до конца̀ ѡ҆торжа́вѣ:

¹²не поста́ви є҆го̀ при себѣ̀, да не когда̀ и҆зри́нѹвъ тѧ̀ ста́нетъ на мѣ́стѣ твое́мъ: не посадѝ є҆го̀ ѡ҆деснѹ́ю себє̀, да не пои́щетъ когда̀ сѣда́лища твоегѡ̀, и҆ на послѣ́докъ ѹ҆разѹмѣ́еши словеса̀ моѧ҄ и҆ ѡ҆ глаго́лѣхъ мои́хъ ѹ҆мили́шисѧ.

¹³Кто̀ поми́лѹетъ ѡ҆баѧ́нника ѕмі́емъ ѹ҆сѣ́кнена и҆ всѣ́хъ пристѹпа́ющихъ ко ѕвѣрє́мъ; та́кожде ходѧ́щаго съ мѹ́жемъ грѣ́шникомъ и҆ примѣша́ющагосѧ грѣхѡ́мъ є҆гѡ̀:

¹⁴ча́съ съ тобо́ю пребѹ́детъ, и҆ а҆́ще ѹ҆клони́шисѧ, не стерпи́тъ.

¹⁵Ѹ҆стна́ма свои́ма ѹ҆слади́тъ вра́гъ, и҆ мно́гѡ поше́пчетъ и҆ рече́тъ добро̀ глаго́лѧ: ѻ҆чи́ма свои́ма прослези́тсѧ, а҆ се́рдцемъ свои́мъ ѹ҆совѣ́тѹетъ ври́нѹти тѧ̀ въ ро́въ, и҆ є҆гда̀ ѡ҆брѧ́щетъ вре́мѧ, не насы́титсѧ кро́ве.

¹⁶А҆́ще срѧ́щѹтъ тѧ̀ ѕла҄ѧ, тѹ̀ ѡ҆брѧ́щеши є҆го̀ пе́рвѣе себє̀,

¹⁷и҆ ѩ҆́кѡ помага́ѧй подсѣче́тъ пѧ́тѹ твою̀:

¹⁸покива́етъ главо́ю свое́ю и҆ воспле́щетъ рѹка́ма свои́ма, и҆ мно́гѡ поше́пчетъ и҆ и҆змѣни́тъ лицѐ своѐ.