Read Библия Церковнославянская Сiрахъ 13 Bible Online

Сiрахъ 13 - Библия Церковнославянская bible

Сiрахъ 13

¹Каса́ѧйсѧ смолѣ̀ ѡ҆черни́тсѧ, и҆ приѡбща́ѧйсѧ го́рдомѹ то́ченъ є҆мѹ̀ бѹ́детъ.

²Бре́мене па́че себє̀ не воздви́жи, и҆ крѣ́пльшѹ и҆ богатѣ́йшѹ себє̀ не приѡбща́йсѧ.

³Ко́е прича́стїе горнцѹ̀ съ котло́мъ; се́й прирази́тсѧ, и҆ то́й сокрѹши́тсѧ.

⁴Бога́тый ѡ҆би́дѹ сотворѝ, и҆ са́мъ приразгнѣ́васѧ: ни́щїй же ѡ҆би́димь бы́сть, и҆ са́мъ приѹмо́литсѧ.

⁵А҆́ще потре́бенъ бѹ́деши, ѹ҆потреблѧ́етъ тѧ̀: а҆́ще же лише́нъ бѹ́деши, ѡ҆ста́витъ тѧ̀.

⁶А҆́ще и҆́маши, поживе́тъ съ тобо́ю и҆ и҆стощи́тъ тѧ̀, са́мъ же не поболи́тъ.

⁷А҆́ще востре́бѹетъ тѧ̀, прельсти́тъ тѧ̀ и҆ возсмѣе́ттисѧ и҆ да́стъ тѝ наде́ждѹ, возглаго́летъ тѝ до́брѣ

⁸и҆ рече́тъ тѝ: є҆́сть ли тѝ что̀ потре́бно; и҆ посрами́тъ тѧ̀ бра́шномъ свои́мъ, до́ндеже и҆стощи́тъ тѧ̀ два́щи и҆лѝ три́щи, и҆ на послѣ́докъ порѹга́еттисѧ.

⁹Пото́мъ ѹ҆́зритъ тѧ̀ и҆ ѡ҆ста́витъ тѧ̀ и҆ главо́ю свое́ю покива́етъ на тѧ̀.

¹⁰Внима́й, да не заблѹди́ши

¹¹и҆ да не смири́шисѧ во весе́лїи твое́мъ.

¹²Е҆гда́ тѧ̀ си́льный призове́тъ, ѿстѹпа́й, и҆ толи́кѡ па́че призове́тъ тѧ̀.

¹³Не приближа́йсѧ, да не ѿринове́нъ бѹ́деши, и҆ не сто́й ѿдале́че, да не забве́нъ бѹ́деши.

¹⁴Не належѝ бесѣ́довати съ ни́мъ и҆ не вѣ́рѹй мно́жайшымъ словесє́мъ є҆гѡ̀: мно́гою бо бесѣ́дою и҆скѹ́ситъ тѧ̀ и҆ ѩ҆́кѡ смѣѧ́сѧ и҆спыта́етъ та҄йнаѧ твоѧ҄.

¹⁵Неми́лостивъ є҆́сть не соблюда́ѧй слове́съ и҆ не пощади́тъ (ѡ҆сла́бити) ѡ҆ѕлобле́нїѧ твоегѡ̀ и҆ ѹ҆́зъ.

¹⁶Блюди́сѧ и҆ внима́й ѕѣлѡ̀, ѩ҆́кѡ съ паде́нїемъ твои́мъ хо́диши:

¹⁷слы́шай сїѧ҄ во снѣ̀ твое́мъ, бо́дрствѹй.

¹⁸Во все́мъ житїѝ любѝ гд҇а и҆ призыва́й є҆го̀ во спасе́нїе твоѐ.

¹⁹Всѧ́ко живо́тно лю́битъ подо́бное себѣ̀, и҆ всѧ́къ человѣ́къ и҆́скреннѧго своего̀:

²⁰всѧ́ка пло́ть по ро́дѹ собира́етсѧ, и҆ подо́бномѹ себѣ̀ прилѣпи́тсѧ мѹ́жъ.

²¹Ко́е ѻ҆бще́нїе во́лкѹ со а҆́гнцемъ; та́кѡ грѣ́шникѹ со благочести́вымъ.

²²Кі́й ми́ръ гѷе́нѣ со псо́мъ; и҆ кі́й ми́ръ бога́томѹ со ѹ҆бо́гимъ;

²³Ло́въ львѡ́въ ѻ҆на́гри въ пѹсты́ни, та́кожде па҄жити бога҄тымъ ѹ҆бо́зїи.

²⁴Ме́рзость го́рдомѹ смире́нїе, си́це ме́рзость бога́томѹ ни́щїй.

²⁵Бога́тъ коле́блѧйсѧ подтвержда́етсѧ ѿ дрѹгѡ́въ: ѹ҆бо́гїй же пады́й ѿрѣ́ѧнъ бѹ́детъ ѿ дрѹгѡ́въ.

²⁶Бога́тѹ поползнѹ́вшѹсѧ мно́зи застѹ҄пницы, возглаго́ла нелѣ҄паѧ, и҆ ѡ҆правда́ша є҆го̀:

²⁷ѹ҆бо́гїй поползнѹ́сѧ, и҆ воспрети́ша є҆мѹ̀, провѣща̀ ра́зѹмъ, и҆ не да́ша є҆мѹ̀ мѣ́ста.

²⁸Бога́тый возглаго́ла, и҆ всѝ ѹ҆молча́ша и҆ сло́во є҆гѡ̀ вознесо́ша да́же до ѡ҆́блакъ:

²⁹ѹ҆бо́гїй возглаго́ла, и҆ рѣ́ша: кто̀ се́й є҆́сть; и҆ а҆́ще преткне́тсѧ, низвратѧ́тъ є҆го̀.

³⁰Добро̀ є҆́сть бога́тство, въ не́мже нѣ́сть грѣха̀, и҆ ѕла̀ є҆́сть нищета̀ во ѹ҆стѣ́хъ нечести́вагѡ.

³¹Се́рдце человѣ́ческо и҆змѣнѧ́етъ лицѐ є҆гѡ̀, и҆лѝ на добро̀ и҆лѝ на ѕло̀.

³²Слѣ́дъ се́рдца во благи́хъ лицѐ ве́селое, и҆ и҆з̾ѡбрѣ́тенїе при́тчей размышле́нїе со трѹдо́мъ.