Read Библия Церковнославянская Сiрахъ 14 Bible Online

Сiрахъ 14 - Библия Церковнославянская bible

Сiрахъ 14

¹Блаже́нъ мѹ́жъ, и҆́же не поползнѹ́сѧ ѹ҆стна́ма свои́ма и҆ не ѹ҆ѧзви́сѧ печа́лїю грѣха̀.

²Блаже́нъ, є҆мѹ́же не зазрѣ̀ дѹша̀ є҆гѡ̀, и҆ и҆́же не спадѐ ѿ наде́жды своеѧ̀.

³Мѹ́жеви скѹпо́мѹ не лѣ́по є҆́сть бога́тство, и҆ человѣ́кѹ зави́дливѹ на что̀ и҆мѣ́нїе;

⁴Собира́ѧй ѿ дѹшѝ своеѧ̀ и҆нѣ҄мъ собира́етъ, и҆ во благи́хъ є҆гѡ̀ и҆ні́и насладѧ́тсѧ.

⁵И҆́же себѣ̀ ѕо́лъ, комѹ̀ до́бръ бѹ́детъ; и҆ не возвесели́тсѧ во и҆мѣ́нїи свое́мъ.

⁶Зави́дѧщагѡ себѣ̀ самомѹ̀ нѣ́сть ѕлѣ́йша: и҆ сїѐ воздаѧ́нїе ѕло́бы є҆гѡ̀.

⁷А҆́ще и҆ добро̀ твори́тъ, въ забы́тїи твори́тъ и҆ на послѣ́докъ и҆з̾ѧви́тъ ѕло́бѹ свою̀.

⁸Лѹка́въ (є҆́сть) зави́дѧй ѻ҆́комъ, ѿвраща́ѧй лицѐ и҆ презира́ѧй дѹ́шы.

⁹Ѻ҆́ко лихои́мца не насыща́етсѧ ча́сти, и҆ ѡ҆би́да лѹка́вагѡ и҆зсѹша́етъ дѹ́шѹ.

¹⁰Ѻ҆́ко лѹка́во зави́дливо и҆ ѡ҆ хлѣ́бѣ, и҆ на трапе́зѣ свое́й скѹ́дно.

¹¹Ча́до, ѩ҆́коже и҆́маши, добро̀ творѝ себѣ̀, и҆ приношє́нїѧ гд҇еви досто́йнѡ приносѝ:

¹²помѧнѝ, ѩ҆́кѡ сме́рть не заме́длитъ, и҆ завѣ́тъ а҆́довъ не пока́занъ тѝ бы́сть.

¹³Пре́жде не́же ѹ҆́мреши ты̀, добро̀ творѝ дрѹ́гѹ и҆ по си́лѣ твое́й прострѝ и҆ да́ждь є҆мѹ̀.

¹⁴Не лиши́сѧ ѿ днѐ добра̀, и҆ ча́сть жела́нїѧ бла́га да не пре́йдетъ тебѐ.

¹⁵Не и҆нѣ҄мъ ли ѡ҆ста́виши притѧжа҄нїѧ твоѧ҄ и҆ трѹды̀ твоѧ҄, въ раздѣле́нїе жре́бїѧ;

¹⁶Да́ждь и҆ возмѝ, и҆ ѡ҆свѧтѝ дѹ́шѹ твою̀:

¹⁷ѩ҆́кѡ нѣ́сть во а҆́дѣ взыска́ти сла́дости.

¹⁸Всѧ́ка пло́ть ѩ҆́кѡ ри́за ѡ҆бетша́етъ, завѣ́тъ бо ѿ вѣ́ка: сме́ртїю ѹ҆́мреши.

¹⁹ѩ҆́кѡ ли́стъ расплоща́ѧсѧ на дре́вѣ ча́стѣ, ѻ҆́въ ѹ҆́бѡ спа́даетъ, дрѹгі́й же прозѧба́етъ: та́кожде и҆ ро́дъ пло́ти и҆ кро́ви, ѻ҆́въ ѹ҆́бѡ ѹ҆мира́етъ, ѻ҆́въ же роди́тсѧ.

²⁰Всѧ́кое дѣ́ло гнїю́щее и҆зчеза́етъ, и҆ дѣ́лаѧй є҆̀ съ ни́мъ ѿи́детъ.

²¹Блаже́нъ мѹ́жъ, и҆́же во премѹ́дрости ѹ҆́мретъ и҆ и҆́же въ ра́зѹмѣ свое́мъ поѹча́етсѧ ст҃ы́ни:

²²размышлѧ́ѧй пѹти҄ є҆ѧ̀ въ се́рдцы свое́мъ, и҆ въ сокрове́нныхъ є҆ѧ̀ ѹ҆разѹми́тсѧ.

²³И҆зы́ди в̾слѣ́дъ є҆ѧ̀ ѩ҆́кѡ и҆зслѣ́дникъ и҆ на пѹте́хъ є҆ѧ̀ присѣдѝ.

²⁴Приница́ѧй сквозѣ̀ ѻ҆кѡ́нца є҆ѧ̀ и҆ при две́рехъ є҆ѧ̀ послѹ́шаетъ.

²⁵Ѡ҆бита́ѧй бли́з̾ до́мѹ є҆ѧ̀ и҆ вбїе́тъ ко́лъ въ стѣ́ны є҆ѧ̀, поста́витъ ски́нїю свою̀ вскра́й є҆ѧ̀ и҆ ѡ҆бита́ти бѹ́детъ во ѡ҆би́тели благи́хъ,

²⁶положи́тъ ча҄да своѧ҄ въ покро́вѣ є҆ѧ̀ и҆ под̾ вѣ́твьми є҆ѧ̀ водвори́тсѧ,

²⁷покры́етсѧ є҆́ю ѿ зно́ѧ и҆ во сла́вѣ є҆ѧ̀ ѡ҆бита́ти бѹ́детъ.