Read Библия Церковнославянская Сiрахъ 15 Bible Online

Сiрахъ 15 - Библия Церковнославянская bible

Сiрахъ 15

¹Боѧ́йсѧ гд҇а сотвори́тъ сїѐ, и҆ держа́йсѧ зако́на пости́гнетъ ю҆̀.

²И҆ срѧ́щетъ є҆го̀ ѩ҆́кѡ ма́ти, и҆ ѩ҆́кѡ жена̀ дѣ́вства прїи́метъ и҆̀:

³ѹ҆хлѣ́битъ є҆го̀ хлѣ́бомъ ра́зѹма и҆ водо́ю премѹ́дрости напои́тъ и҆̀:

⁴ѹ҆тверди́тсѧ на не́й и҆ не преклони́тсѧ, и҆ до неѧ̀ приста́нетъ и҆ не постыди́тсѧ:

⁵и҆ вознесе́тъ є҆го̀ па́че и҆́скреннихъ є҆гѡ̀ и҆ посредѣ̀ цр҃кве ѿве́рзетъ ѹ҆ста̀ є҆гѡ̀:

⁶весе́лїе и҆ вѣне́цъ ра́дости и҆ и҆́мѧ вѣ́чно наслѣ́дитъ.

⁷Не пости́гнѹтъ є҆ѧ̀ человѣ́цы неразѹ́мивїи, и҆ мѹ́жїе грѣ́шнїи не ѹ҆́зрѧтъ є҆ѧ̀:

⁸дале́че є҆́сть ѿ горды́ни, и҆ мѹ́жїе лжи́вїи не и҆́мѹтъ помѧнѹ́ти є҆ѧ̀.

⁹Не красна̀ похвала̀ во ѹ҆стѣ́хъ грѣ́шника, ѩ҆́кѡ не ѿ гд҇а послана̀ бы́сть:

¹⁰премѹ́дростїю бо речє́на бѹ́детъ хвала̀, и҆ гд҇ь бл҃гопоспѣши́тъ є҆́й.

¹¹Не рцы̀, ѩ҆́кѡ гд҇а ра́ди ѿстѹпи́хъ: и҆̀хже бо возненави́дѣ, да не сотвори́ши.

¹²Не рцы̀, ѩ҆́кѡ са́мъ мѧ̀ прельстѝ: не тре́бѹетъ бо мѹ́жа грѣ́шника.

¹³Всѧ́кѹ ме́рзость возненави́дѣ гд҇ь, и҆ нѣ́сть любе́зна боѧ́щымсѧ є҆гѡ̀.

¹⁴Са́мъ и҆з̾ нача́ла сотворѝ человѣ́ка и҆ ѡ҆ста́ви є҆го̀ въ рѹцѣ̀ произволе́нїѧ є҆гѡ̀:

¹⁵а҆́ще хо́щеши, соблюде́ши за́пѡвѣди и҆ вѣ́рѹ сотвори́ши благоволе́нїѧ.

¹⁶Предложи́лъ тѝ ѻ҆́гнь и҆ во́дѹ, и҆ на не́же хо́щеши, простре́ши рѹ́кѹ твою̀.

¹⁷Пред̾ человѣ́комъ живо́тъ и҆ сме́рть, и҆ є҆́же а҆́ще и҆зво́литъ, да́стсѧ є҆мѹ̀.

¹⁸ѩ҆́кѡ мно́га премѹ́дрость гд҇нѧ: крѣ́покъ си́лою и҆ ви́дѧй всѧ҄:

¹⁹и҆ ѻ҆́чи є҆гѡ̀ на боѧ́щихсѧ є҆гѡ̀, и҆ то́й позна́етъ всѧ́ко дѣ́ло человѣ́ческо.

²⁰Не заповѣ́да ни є҆ди́номѹ же нече́ствовати и҆ не дадѐ ѡ҆сла́бы ни є҆ди́номѹ не согрѣша́ти.