Read Библия Церковнославянская Сiрахъ 16 Bible Online

Сiрахъ 16 - Библия Церковнославянская bible

Сiрахъ 16

¹Не жела́й ча҄дъ мно́жества неключи́мыхъ, нижѐ весели́сѧ ѡ҆ сынѣ́хъ нечести́выхъ: є҆гда̀ ѹ҆мно́жатсѧ, не весели́сѧ ѡ҆ ни́хъ, а҆́ще нѣ́сть стра́ха гд҇нѧ съ ни́ми.

²Не вѣ́рѹй животѹ̀ и҆́хъ и҆ не належѝ на мно́жество и҆́хъ:

³лѹ́чше бо є҆ди́нъ првдникъ, не́жели ты́сѧща (грѣ҄шникъ),

⁴и҆ ѹ҆мре́ти безча́дномѹ, не́жели и҆мѣ́ти ча҄да нечести҄ва:

⁵ѿ є҆ди́нагѡ бо разѹ́мна насели́тсѧ гра́дъ, колѣ́но же беззако́нныхъ запѹстѣ́етъ.

⁶Мнѡ́га сицева҄ѧ ви́дѣ ѻ҆́ко моѐ, и҆ крѣ҄пльшаѧ си́хъ слы́ша ѹ҆́хо моѐ.

⁷Въ собо́рищи грѣ́шныхъ возгори́тсѧ ѻ҆́гнь, и҆ во ѩ҆зы́цѣ непокори́вѣ возгори́тсѧ гнѣ́въ.

⁸Не ѹ҆моле́нъ бы́сть (бг҃ъ) ѡ҆ дре́внихъ и҆споли́нѣхъ, и҆̀же ѿстѹпи́ша крѣ́постїю свое́ю:

⁹не пощадѣ̀ ѡ҆ жили́щи лѡ́товѣ, и҆́миже возгнѹша́сѧ за горды́ню и҆́хъ:

¹⁰не поми́лова ѩ҆зы́ка поги́бельнагѡ, возне́сшагѡсѧ во грѣсѣ́хъ свои́хъ,

¹¹и҆ та́кѡ ше́сть сѡ́тъ ты́сѧщъ пѣшцє́въ, соше́дшихсѧ въ жестосе́рдїи свое́мъ. И҆ а҆́ще бѹ́детъ є҆ди́нъ жестоковы́йный въ лю́дехъ, ди́вно є҆́сть сїѐ, а҆́ще непови́ненъ бѹ́детъ.

¹²Мл҇ть бо и҆ гнѣ́въ ѹ҆ негѡ̀, си́ленъ ѹ҆моле́нъ бы́ти и҆ и҆злїѧ́ти гнѣ́въ.

¹³По мно́зѣй мл҇ти є҆гѡ̀, та́кѡ мно́го и҆ ѡ҆бличе́нїе є҆гѡ̀: мѹ́жеви но дѣлѡ́мъ є҆гѡ̀ сѹ́дитъ.

¹⁴Не ѹ҆бѣжи́тъ хище́нїемъ грѣ́шный, и҆ терпѣ́нїе благовѣ́рнагѡ не лише́но бѹ́детъ.

¹⁵Всѧ́цѣй ми́лостыни сотвори́тъ мѣ́сто: кі́йждо бо по дѣлѡ́мъ свои҄мъ ѡ҆брѧ́щетъ.

¹⁶Не рцы̀, ѩ҆́кѡ ѿ гд҇а скры́юсѧ, є҆да̀ свы́ше кто́ мѧ помѧне́тъ;

¹⁷въ лю́дехъ мно́жайшихъ не воспомѧне́нъ бѹ́дѹ, что́ бо є҆́сть дѹша̀ моѧ̀ въ безчи́сленнѣй тва́ри;

¹⁸сѐ, нб҃о и҆ нб҃о нб҃сѐ бж҃їѧ, бе́здна и҆ землѧ̀ посѣще́нїемъ є҆гѡ̀ подви́гнѹтсѧ:

¹⁹вкѹ́пѣ го́ры и҆ ѡ҆снова҄нїѧ землѝ, є҆гда̀ воззри́тъ на нѧ̀, тре́петомъ стрѧсѹ́тсѧ,

²⁰и҆ ѡ҆ си́хъ не размы́слитъ се́рдце:

²¹и҆ пѹти҄ є҆гѡ̀ кто̀ пости́гнетъ; и҆ бѹ́рю ю҆́же не ѹ҆́зритъ человѣ́къ, мнѡ́жайшаѧ же дѣ́лъ є҆гѡ̀ въ сокрове́нныхъ:

²²дѣла̀ пра́вды є҆гѡ̀ кто̀ возвѣсти́тъ; и҆лѝ кто̀ стерпи́тъ; дале́че бо завѣ́тъ.

²³Ѹ҆малѧ́ѧйсѧ се́рдцемъ размышлѧ́етъ сїѧ҄, а҆ мѹ́жъ безѹ́менъ и҆ заблѹжда́ѧй размышлѧ́етъ бѹ҄ѧѧ.

²⁴Послѹ́шай менѐ, ча́до, и҆ наѹчи́сѧ вѣ́дѣнїѧ, и҆ на словеса̀ моѧ҄ внима́й се́рдцемъ твои́мъ:

²⁵и҆з̾ѧвлѧ́ю въ мѣ́рилѣ наказа́нїе и҆ со и҆спыта́нїемъ возвѣщѹ̀ вѣ́дѣнїе.

²⁶Сѹдо́мъ гд҇нимъ дѣла̀ є҆гѡ̀ и҆з̾ нача́ла, и҆ ѿ сотворе́нїѧ є҆гѡ̀ раздѣлѝ ча҄сти и҆́хъ:

²⁷ѹ҆красѝ во вѣ́къ дѣла̀ своѧ҄, и҆ нача҄ла и҆́хъ въ ро́ды и҆́хъ: нижѐ взалка́ша, нижѐ ѹ҆трѹди́шасѧ, и҆ не преста́ша ѿ дѣ́лъ свои́хъ.

²⁸Кі́йждо и҆́скреннѧго своего̀ не ѡ҆скорбѝ,

²⁹и҆ да́же до вѣ́ка не воспроти́вѧтсѧ гл҃го́лѹ є҆гѡ̀.

³⁰И҆ по си́хъ гд҇ь на зе́млю призрѣ̀ и҆ и҆спо́лни ю҆̀ ѿ бл҃гъ свои́хъ:

³¹дѹша̀ всѧ́кагѡ живо́тна покры̀ лицѐ є҆ѧ̀, и҆ въ ню̀ возвраще́нїе и҆́хъ.