Read Библия Церковнославянская Сiрахъ 17 Bible Online

Сiрахъ 17 - Библия Церковнославянская bible

Сiрахъ 17

¹Гд҇ь созда̀ ѿ землѝ человѣ́ка, и҆ па́ки возвратѝ є҆го̀ въ ню̀.

²Дни҄ числа̀ и҆ вре́мѧ дадѐ и҆̀мъ, и҆ дадѐ и҆̀мъ вла́сть над̾ сѹ́щими на не́й.

³ѩ҆́коже ѻ҆нѝ са́ми, ѡ҆блечѐ и҆̀хъ крѣ́постїю, и҆ по ѡ҆́бразѹ своемѹ̀ сотворѝ ѧ҆̀:

⁴и҆ положѝ стра́хъ є҆гѡ̀ на всѧ́цѣй пло́ти, є҆́же вла́стелствовати ѕвѣрьмѝ (и҆ скѡты̀) и҆ пти́цами.

⁵Помышле́нїе и҆ ѧ҆зы́къ и҆ ѻ҆́чи, ѹ҆́ши и҆ се́рдце дадѐ и҆̀мъ размышлѧ́ти:

⁶хѹдо́жествомъ ра́зѹма и҆спо́лни ѧ҆̀ и҆ дѡ́браѧ и҆ ѕла҄ѧ показа̀ и҆̀мъ.

⁷Положи́лъ є҆́сть ѻ҆́ко своѐ на сердца́хъ и҆́хъ, показа́ти и҆̀мъ вели́чество дѣ́лъ свои́хъ,

⁸да и҆́мѧ ст҃ы́ни є҆гѡ̀ восхва́лѧтъ и҆ да повѣ́даютъ вели́чєства дѣ́лъ є҆гѡ̀.

⁹Приложи́лъ и҆̀мъ хѹдо́жество и҆ зако́нъ живота̀ дадѐ въ наслѣ́дїе и҆̀мъ.

¹⁰Завѣ́тъ вѣ́чный поста́ви съ ни́ми и҆ сѹдбы҄ своѧ҄ показа̀ и҆̀мъ.

¹¹Вели́чество сла́вы ви́дѣша ѻ҆чеса̀ и҆́хъ, и҆ сла́вѹ гла́са и҆́хъ слы́ша ѹ҆́хо и҆́хъ.

¹²И҆ речѐ и҆̀мъ: внемли́те ѿ всѧ́кїѧ непра́вды. и҆ заповѣ́да и҆̀мъ комѹ́ждо ѡ҆ и҆́скреннемъ.

¹³Пѹтїѐ и҆́хъ пред̾ ни́мъ вы́нѹ, не ѹ҆кры́ютсѧ ѿ ѻ҆́чїю є҆гѡ̀.

¹⁴Комѹ́ждо ѩ҆зы́кѹ ѹ҆стро́илъ вожда̀,

¹⁵и҆ ча́сть гд҇нѧ ї҆и҃ль є҆́сть.

¹⁶Всѧ҄ дѣла̀ и҆́хъ ѩ҆́кѡ со́лнце пред̾ ни́мъ, и҆ ѻ҆́чи є҆гѡ̀ вы́нѹ на пѹте́хъ и҆́хъ:

¹⁷не ѹ҆кры́шасѧ непра҄вды и҆́хъ ѿ негѡ̀, и҆ всѝ грѣсѝ и҆́хъ пред̾ гд҇емъ.

¹⁸Ми́лостынѧ мѹ́жа ѩ҆́кѡ печа́ть съ ни́мъ, и҆ благода́ть человѣ́чѹ ѩ҆́кѡ зѣ́ницѹ соблюде́тъ.

¹⁹По си́хъ воста́нетъ и҆ возда́стъ и҆̀мъ, и҆ воздаѧ́нїе и҆́хъ на главѹ̀ и҆́хъ возда́стъ:

²⁰ѻ҆ба́че ка́ющымсѧ да́лъ є҆́сть возвраще́нїе и҆ ѹ҆тѣ́ши и҆знемога́ющихъ терпѣ́нїемъ.

²¹Ѡ҆брати́сѧ ѹ҆̀бо ко гд҇ѹ и҆ ѡ҆ста́ви грѣхѝ:

²²помоли́сѧ пред̾ лице́мъ и҆ ѹ҆ма́ли претыка҄нїѧ:

²³восходѝ къ вы́шнемѹ и҆ ѿврати́сѧ ѿ непра́вды, и҆ ѕѣлѡ̀ возненави́ди ме́рзость.

²⁴Вы́шнѧго кто̀ восхва́литъ во а҆́дѣ, вмѣ́стѡ живы́хъ и҆ даю́щихъ и҆сповѣ́данїе;

²⁵Ѿ мертвеца̀ ѩ҆́кѡ ничто̀ сѹ́щагѡ погиба́етъ и҆сповѣ́данїе:

²⁶живы́й же и҆ здра́вый восхва́литъ гд҇а.

²⁷Ко́ль вели́ка мл҇ть гд҇нѧ и҆ ѡ҆чище́нїе ѡ҆браща́ющымсѧ къ немѹ̀;

²⁸Не мо́гѹтъ бо всѧ҄ бы́ти въ человѣ́цѣхъ:

²⁹ѩ҆́кѡ не безсме́ртенъ сы́нъ человѣ́ческїй.

³⁰Что̀ свѣтлѣ́е со́лнца; и҆ то̀ и҆зчеза́етъ: и҆ ѕло̀ помы́слитъ пло́ть и҆ кро́вь.

³¹Си́лѹ высоты̀ небе́сныѧ то́й са́мъ назира́етъ, человѣ́цы же всѝ землѧ̀ и҆ пе́пелъ.