Read Библия Церковнославянская Сiрахъ 18 Bible Online

Сiрахъ 18 - Библия Церковнославянская bible

Сiрахъ 18

¹Живы́й во вѣ́ки созда̀ всѧ҄ ѻ҆́бще. гд҇ь є҆ди́нъ ѡ҆правди́тсѧ:

²никто́же дово́ленъ и҆сповѣ́сти дѣ́лъ є҆гѡ̀,

³и҆ кто̀ и҆зслѣ́дитъ вели҄чїѧ є҆гѡ̀;

⁴Держа́вѹ вели́чества є҆гѡ̀ кто̀ и҆зочте́тъ; и҆ кто̀ приложи́тъ и҆сповѣ́дати мл҇ти є҆гѡ̀;

⁵Не лѣ́ть ѹ҆ма́лити, нижѐ приложи́ти, и҆ не лѣ́ть и҆зслѣ́дити чѹде́съ гд҇нихъ.

⁶Е҆гда̀ сконча́етъ человѣ́къ, тогда̀ начина́етъ, и҆ є҆гда̀ преста́нетъ, тогда̀ ѹ҆сѹмни́тсѧ.

⁷Что̀ є҆́сть человѣ́къ; и҆ что̀ потре́ба є҆гѡ̀; что̀ бла́го є҆гѡ̀; и҆ что̀ ѕло̀ є҆гѡ̀;

⁸Число̀ дні́й человѣ́кѹ мно́го лѣ́тъ сто̀: ѩ҆́кѡ ка́плѧ морскі́ѧ воды̀ и҆ зерно̀ песка̀, та́кѡ ма́ло лѣ́тъ въ де́нь вѣ́ка.

⁹Сегѡ̀ ра́ди долготерпѣ̀ гд҇ь на ни́хъ и҆ и҆злїѧ̀ на нѧ̀ мл҇ть свою̀.

¹⁰Ви́дѣ и҆ позна̀ низвраще́нїе и҆́хъ, ѩ҆́кѡ ѕло̀,

¹¹сегѡ̀ ра́ди ѹ҆мно́жи мл҇рдїе своѐ.

¹²Ми́лость человѣ́ча на и҆́скреннѧго своего̀, мл҇ть же гд҇нѧ на всѧ́кѹ пло́ть.

¹³Ѡ҆блича́ѧй и҆ наказѹ́ѧй, и҆ наѹча́ѧй и҆ ѡ҆браща́ѧй ѩ҆́кѡ па́стырь ста́до своѐ:

¹⁴прїе́млющихъ наказа́нїе ми́лѹетъ и҆ тща́щихсѧ ѡ҆ сѹдба́хъ є҆гѡ̀.

¹⁵Ча́до, во благи́хъ не да́ждь поро́ка, и҆ во всѧ́цѣмъ даѧ́нїи печа́ли слове́съ.

¹⁶Не ѹ҆стѹди́тъ ли зно́ѧ роса̀; та́кѡ лѹ́чше сло́во, не́жели даѧ́нїе.

¹⁷Не сѐ ли, сло́во па́че даѧ́нїѧ бла́га; ѻ҆боѧ́ же ѹ҆ мѹ́жа благода́тна.

¹⁸Бѹ́й неблагода́рнѡ поно́ситъ, и҆ даѧ́нїе зави́дливагѡ и҆стаева́етъ ѻ҆́чи.

¹⁹Пре́жде не́же возглаго́леши, ѹ҆вѣ́ждь, и҆ пре́жде недѹ́га врачѹ́йсѧ:

²⁰пре́жде сѹда̀ и҆спыта́й себѐ и҆ въ ча́съ посѣще́нїѧ ѡ҆брѧ́щеши ѡ҆чище́нїе:

²¹пре́жде да́же въ недѹ́гъ не впаде́ши, смири́сѧ, и҆ во вре́мѧ грѣхѡ́въ покажѝ ѡ҆браще́нїе.

²²Не воспѧти́сѧ возда́ти ѡ҆бѣ́тъ благовре́меннѡ и҆ не ѡ҆жида́й да́же до сме́рти ѡ҆правда́тисѧ:

²³пре́жде да́же не помо́лишисѧ, ѹ҆гото́ви себѐ, и҆ не бѹ́ди ѩ҆́кѡ человѣ́къ и҆скѹша́ѧ гд҇а.

²⁴Помѧнѝ гнѣ́въ въ де́нь сконча́нїѧ и҆ вре́мѧ ме́сти во ѿвраще́нїи лица̀:

²⁵помѧнѝ вре́мѧ гла́да во вре́мѧ сы́тости, нищетѹ̀ и҆ ѹ҆бо́жество въ де́нь бога́тства.

²⁶Ѿ ѹ҆́тра до ве́чера и҆змѣнѧ́етсѧ вре́мѧ, и҆ всѧ҄ скѡ́ра сѹ́ть пред̾ гд҇емъ.

²⁷Человѣ́къ премѹ́дръ во все́мъ ѡ҆па́сенъ бѹ́детъ и҆ во дне́хъ грѣхѡ́въ во́нметъ ѡ҆ согрѣше́нїи.

²⁸Всѧ́къ разѹми́въ позна̀ премѹ́дрость, и҆ ѡ҆брѣ́тшемѹ ю҆̀ да́стъ и҆сповѣ́данїе.

²⁹Разѹ́мнїи въ словесѣ́хъ, и҆ ті́и ѹ҆мѹдри́шасѧ и҆ ѹ҆мно́жиша при҄тчи и҆спы҄тны. воздержа́нїе дѹшѝ.

³⁰Вслѣ́дъ по́хотей твои́хъ не ходѝ и҆ ѿ похотѣ́нїй свои́хъ возбранѧ́йсѧ:

³¹а҆́ще да́си дѹшѝ твое́й благоволе́нїе жела́нїѧ, сотвори́тъ тѧ̀ ѡ҆бра́дованїе врагѡ́мъ твои҄мъ.

³²Не весели́сѧ ѡ҆ мно́зѣй сла́дости и҆ не свѧзѹ́йсѧ соѻбще́нїемъ є҆ѧ̀.

³³Не бѹ́ди ни́щь пи́ршествѹѧй ѿ взаи́мства, и҆ ничто́ ти бѹ́детъ въ мѣшцѣ̀.