Read Библия Церковнославянская Сiрахъ 19 Bible Online

Сiрахъ 19 - Библия Церковнославянская bible

Сiрахъ 19

¹Дѣ́латель пїѧ́нивый не бѹ́детъ бога́тъ, и҆ ѹ҆ничижа́ѧй ма҄лаѧ по ма́лѣ ѹ҆паде́тъ.

²Вїно̀ и҆ жєны̀ превратѧ́тъ разѹми́выхъ, и҆ прилага́ѧйсѧ любодѣ́йцамъ де́рзшїй бѹ́детъ:

³мо́лїе и҆ че́рвїе наслѣ́дѧтъ є҆го̀, и҆ дѹша̀ де́рзостнаѧ и҆́зметсѧ.

⁴Е҆́млѧй ско́рѡ вѣ́рѹ лего́къ се́рдцемъ, и҆ согрѣша́ѧй на дѹ́шѹ свою̀ согрѣша́етъ.

⁵Веселѧ́йсѧ се́рдцемъ ѡ҆ ѕлонра́вїи ѡ҆бличе́нъ бѹ́детъ, противлѧ́ѧйсѧ же похоте́мъ вѣнча́етъ живо́тъ сво́й.

⁶Ѡ҆бѹздава́ѧй ѧ҆зы́къ тихоми́рнѡ поживе́тъ, и҆ ненави́дѧй велерѣ́чїѧ ѹ҆ма́литъ поро́къ.

⁷Словесѐ никогда́же повторѝ, и҆ ничто́же тебѣ̀ ѹ҆ма́литсѧ.

⁸На дрѹ́га и҆ на врага̀ не повѣ́дай, и҆ а҆́ще не бѹ́детъ тебѣ̀ грѣха̀, не ѿкрыва́й:

⁹слы́ша бо ѹ҆ тебє̀, и҆ соблюде́тъ тѧ̀, и҆ во вре́мѧ возненави́дитъ тѧ̀.

¹⁰Слы́шалъ ли є҆сѝ сло́во, да ѹ҆́мретъ съ тобо́ю: не ѹ҆бо́йсѧ, не расто́ргнетъ тебѐ.

¹¹Ѿ лица̀ словесѐ поболи́тъ бѹ́й, ѩ҆́коже ражда́ющаѧ ѿ лица̀ младе́нца.

¹²Стрѣла̀ вонзе́на въ стегно̀ пло́ти, та́кѡ сло́во во чре́вѣ бѹ́ѧгѡ.

¹³Ѡ҆бличѝ дрѹ́га, є҆гда̀ є҆щѐ не сотвори́лъ, и҆ а҆́ще сотвори́лъ, да не приложи́тъ ктомѹ̀:

¹⁴ѡ҆бличѝ дрѹ́га, не́гли не речѐ, и҆ а҆́ще речѐ є҆ди́ножды, да не повтори́тъ:

¹⁵ѡ҆бличѝ дрѹ́га, мно́гажды бо быва́етъ навѣ́тъ.

¹⁶Не всѧ́комѹ словесѝ є҆́мли вѣ́ры.

¹⁷Е҆́сть пополза́ѧйсѧ сло́вомъ, а҆ не дѹше́ю: и҆ кто̀ не согрѣшѝ ѧ҆зы́комъ свои́мъ;

¹⁸Ѡ҆бличѝ и҆́скреннѧго своего̀ пре́жде преще́нїѧ, и҆ да́ждь мѣ́сто зако́нѹ вы́шнѧгѡ. Всѧ́ка премѹ́дрость стра́хъ гд҇ень, и҆ во всѧ́цѣй премѹ́дрости творе́нїе зако́на.

¹⁹И҆ нѣ́сть премѹ́дрость вѣ́дѣнїе лѹка́вства, и҆ нѣ́сть ра́зѹма, и҆дѣ́же совѣ́тъ грѣ́шныхъ.

²⁰Е҆́сть лѹка́вство, и҆ то̀ ме́рзость, и҆ є҆́сть безѹ́менъ ѹ҆малѧ́ѧйсѧ премѹ́дростїю.

²¹Лѹ́чше є҆́сть ѹ҆малѧ́ѧйсѧ въ ра́зѹмѣ боѧзли́вый, не́жели и҆збы́точествѹѧй мѹ́дростїю и҆ престѹпа́ѧ зако́нъ.

²²Е҆́сть кова́рство и҆спы́тно, и҆ то̀ непра́ведно, и҆ є҆́сть развраща́ѧй благода́ть и҆звѣща́ти хотѧ̀ сѹ́дъ.

²³Е҆́сть лѹка́вствѹѧй пони́къ черното́ю, и҆ внѹ́трєннѧѧ є҆гѡ̀ и҆спо́лнь льстѝ:

²⁴пони́ча лице́мъ и҆ притворѧ́ѧйсѧ глѹ́хъ, и҆дѣ́же не позна́нъ бы́сть, предвари́тъ тѧ̀.

²⁵И҆ а҆́ще не́мощїю крѣ́пости возбране́нъ бѹ́детъ согрѣши́ти, а҆́ще ѡ҆брѧ́щетъ вре́мѧ, ѕло̀ сотвори́тъ.

²⁶Ѿ зра́ка позна́нъ бѹ́детъ мѹ́жъ, и҆ срѣ́тенїемъ лица̀ позна́нъ бѹ́детъ ѹ҆́мный.

²⁷Ѡ҆дѣѧ́нїе мѹ́жа и҆ смѣ́хъ зѹбѡ́въ и҆ стѡпы̀ человѣ́ка возвѣстѧ́тъ, ѩ҆̀же ѡ҆ не́мъ.

²⁸Е҆́сть ѡ҆бличе́нїе, є҆́же нѣ́сть красно̀, и҆ є҆́сть молча́й, и҆ то́й мѹ́дръ.