Read Библия Церковнославянская Сiрахъ 2 Bible Online

Сiрахъ 2 - Библия Церковнославянская bible

Сiрахъ 2

¹Ча́до, а҆́ще пристѹпа́еши рабо́тати гд҇еви бг҃ѹ, ѹ҆гото́ви дѹ́шѹ твою̀ во и҆скѹше́нїе:

²ѹ҆пра́ви се́рдце твоѐ и҆ потерпѝ, и҆ не ско́ръ бѹ́ди во вре́мѧ наведе́нїѧ:

³прилѣпи́сѧ є҆мѹ̀ и҆ не ѿстѹпѝ, да возрасте́ши на послѣ́докъ тво́й.

⁴Всѐ є҆ли́ко а҆́ще нанесе́но тѝ бѹ́детъ, прїимѝ и҆ во и҆змѣне́нїи смире́нїѧ твоегѡ̀ долготерпѝ:

⁵ѩ҆́кѡ во ѻ҆гнѝ и҆скѹша́етсѧ зла́то, и҆ человѣ́цы прїѧ́тни въ пещѝ смире́нїѧ.

⁶Вѣ́рѹй є҆мѹ̀, и҆ застѹ́питъ тѧ̀, и҆ ѹ҆пра́ви пѹти҄ твоѧ҄ и҆ ѹ҆пова́й на́нь.

⁷Боѧ́щїисѧ гд҇а, пожди́те мл҇ти є҆гѡ̀ и҆ не ѹ҆клони́тесѧ, да не паде́те.

⁸Боѧ́щїисѧ гд҇а, вѣ́рѹйте є҆мѹ̀, и҆ не и҆́мать ѿпа́сти мзда̀ ва́ша.

⁹Боѧ́щїисѧ гд҇а, надѣ́йтесѧ на блага҄ѧ и҆ на весе́лїе вѣ́ка и҆ ми҄лости.

¹⁰Воззри́те на дрє́внїѧ ро́ды и҆ ви́дите, кто̀ вѣ́рова гд҇еви и҆ постыдѣ́сѧ; и҆лѝ кто̀ пребы́сть во стра́сѣ є҆гѡ̀ и҆ ѡ҆ста́висѧ; и҆лѝ кто̀ призва̀ є҆го̀, и҆ презрѣ̀ и҆̀;

¹¹Занѐ ще́дръ и҆ мл҇тивъ гд҇ь, и҆ ѡ҆ставлѧ́етъ грѣхѝ, и҆ сп҃са́етъ во вре́мѧ ско́рби.

¹²Го́ре сердца́мъ страшли҄вымъ и҆ рѹка́мъ ѡ҆сла́блєнымъ, и҆ грѣ́шникѹ ходѧ́щѹ на двѣ̀ стєзѝ.

¹³Го́ре се́рдцѹ ѡ҆сла́бленѹ, ѩ҆́кѡ не вѣ́рѹетъ: сегѡ̀ ра́ди покрове́но не бѹ́детъ.

¹⁴Го́ре ва́мъ погѹ́бльшымъ терпѣ́нїе: и҆ что̀ сотворитѐ, є҆гда̀ посѣти́тъ гд҇ь;

¹⁵Боѧ́щїисѧ гд҇а не сѹмнѣва́ютсѧ ѡ҆ гл҃го́лѣхъ є҆гѡ̀, и҆ лю́бѧщїи є҆го̀ сохранѧ́тъ пѹти҄ є҆гѡ̀.

¹⁶Боѧ́щїисѧ гд҇а пои́щѹтъ бл҃говоле́нїѧ є҆гѡ̀, и҆ лю́бѧщїи є҆го̀ и҆спо́лнѧтсѧ зако́на.

¹⁷Боѧ́щїисѧ гд҇а ѹ҆гото́вѧтъ сердца̀ своѧ҄ и҆ пред̾ ни́мъ смирѧ́тъ дѹ́шы своѧ҄, (глаго́люще:)

¹⁸да впаде́мъ въ рѹ́цѣ гд҇ни, а҆ не въ рѹ́цѣ человѣ́чєски, ѩ҆́кѡ бо вели́чество є҆гѡ̀, та́кѡ и҆ мл҇ть є҆гѡ̀.