Read Библия Церковнославянская Сiрахъ 20 Bible Online

Сiрахъ 20 - Библия Церковнославянская bible

Сiрахъ 20

¹Ко́ль добро̀ є҆́сть ѡ҆бличи́ти, не́жели ѩ҆ри́тисѧ та́йнѡ: и҆ и҆сповѣ́даѧйсѧ ѿ ѹ҆мале́нїѧ возбране́нъ бѹ́детъ.

²Ко́ль добро̀ ѡ҆бличе́нномѹ ѩ҆ви́ти покаѧ́нїе:

³се́й бо во́льнагѡ и҆збѣжи́тъ грѣха̀.

⁴Жела́нїе ско́пчо растли́тъ ли дѣви́цѹ; та́кожде творѧ́й нѹ́ждею сѹды̀.

⁵Е҆́сть молча́й ѡ҆брѣта́ѧйсѧ премѹ́дръ, и҆ є҆́сть ненави́димь ѿ мно́гїѧ бесѣ́ды.

⁶Е҆́сть молча́й, не и҆́мать бо ѿвѣ́та: и҆ є҆́сть молча́й вѣ́дый вре́мѧ.

⁷Человѣ́къ премѹ́дръ ѹ҆молчи́тъ до вре́мене: проде́рзый же и҆ безѹ́мный превосхо́дитъ вре́мѧ.

⁸Ѹ҆множа́ѧй словеса̀ ме́рзокъ бѹ́детъ, и҆ восхища́ѧй вла́сть возненави́дѣнъ бѹ́детъ.

⁹Е҆́сть благопоспѣ́шство во ѕлы́хъ мѹ́жеви, и҆ є҆́сть и҆з̾ѡбрѣ́тенїе на ѹ҆мале́нїе.

¹⁰Е҆́сть даѧ́нїе, є҆́же тѝ не бѹ́детъ на по́льзѹ, и҆ є҆́сть даѧ́нїе, є҆гѡ́же ѿда́нїе сѹгѹ́бо.

¹¹Е҆́сть ѹ҆мале́нїе сла́вы ра́ди, и҆ є҆́сть, и҆́же ѿ смире́нїѧ вознесѐ главѹ̀.

¹²Е҆́сть кѹпѹ́ѧй мнѡ́гаѧ ма́лымъ и҆ возвраща́ѧй ѧ҆̀ седмери́цею.

¹³Премѹ́дрый во словесѝ любе́зна сотвори́тъ себѐ: благѡда́ти же безѹ́мныхъ и҆злїю́тсѧ.

¹⁴Даѧ́нїе безѹ́мнагѡ не ѹ҆по́льзѹетъ тѝ, ѻ҆́чи бо є҆гѡ̀ вмѣ́стѡ є҆ди́нагѡ мно́зи ко воспрїѧ́тїю:

¹⁵ма́лѡ да́стъ, а҆ мно́гѡ поноси́ти бѹ́детъ и҆ ѿве́рзетъ ѹ҆ста̀ своѧ҄ ѩ҆́кѡ проповѣ́дникъ: дне́сь взаи́мъ да́стъ, а҆ ѹ҆́трѡ и҆стѧ́жетъ: ненави́димь человѣ́къ таковы́й гд҇ѹ и҆ человѣ́кѡмъ.

¹⁶Бѹ́й рече́тъ: нѣ́сть мѝ дрѹ́га и҆ нѣ́сть хвалы̀ благи҄мъ мои҄мъ: ѩ҆дѹ́щїи хлѣ́бъ мо́й льсти́ви ѧ҆зы́комъ.

¹⁷Коли́кощи и҆ коли́цы посмѣю́тсѧ є҆мѹ̀;

¹⁸Поползнове́нїе на землѝ лѹ́чше не́же ѿ ѧ҆зы́ка: та́кѡ паде́нїе ѕлы́хъ со тща́нїемъ прїи́детъ.

¹⁹Человѣ́къ безблагода́тенъ ба́снь безвре́менна: во ѹ҆стѣ́хъ ненака́занныхъ пр҇нѡ бѹ́детъ.

²⁰Ѿ ѹ҆́стъ бѹ́ѧгѡ ѿве́ржена бѹ́детъ при́тча: не и҆́мать бо є҆ѧ̀ рещѝ во вре́мѧ своѐ.

²¹Е҆́сть возбранѧ́емый согрѣша́ти ѿ скѹ́дости, и҆ въ поко́и свое́мъ не ѹ҆мили́тсѧ.

²²Е҆́сть погѹблѧ́ѧй дѹ́шѹ свою̀ за сты́дъ, и҆ ѿ лица̀ безѹ́мна погѹби́тъ ю҆̀.

²³Е҆́сть ра́ди стыда̀ ѡ҆бѣща́ѧйсѧ дрѹ́гови, и҆ приѡбрѣ́те є҆го̀ врага̀ тѹ́не.

²⁴Поро́къ ѕо́лъ человѣ́кѹ лжа̀, и҆ во ѹ҆стѣ́хъ ненака́занныхъ пр҇нѡ бѹ́детъ.

²⁵Ѹ҆́не є҆́сть та́ть, не́жели пр҇нѡ лжа́й: ѻ҆́ба же па́гѹбѹ наслѣ́дѧтъ.

²⁶Ѡ҆бы́чай человѣ́ка лжи́ва безче́стїе, и҆ стѹ́дъ є҆гѡ̀ пр҇нѡ съ ни́мъ.

²⁷Премѹ́дрый словесы̀ произведе́тъ себѐ, и҆ человѣ́къ мѹ́дрый ѹ҆го́денъ бѹ́детъ вельмо́жамъ.

²⁸Дѣ́лаѧй зе́млю вознесе́тъ сто́гъ сво́й, и҆ ѹ҆гожда́ѧй вельмо́жамъ ѹ҆ми́лостивитъ ѡ҆ непра́вдѣ (свое́й).

²⁹Мзда̀ и҆ да́рове ѡ҆слѣплѧ́ютъ ѻ҆́чи премѹ́дрыхъ, и҆ ѩ҆́коже бразды҄ на ѹ҆стѣ́хъ ѿвраща́ютъ ѡ҆бличє́нїѧ.

³⁰Премѹ́дрость сокровє́на и҆ сокро́вище не ѩ҆вле́но, ка́ѧ по́льза є҆́сть во ѻ҆бои́хъ;

³¹Лѹ́чше человѣ́къ скрыва́ѧй бѹ́йство своѐ, не́жели человѣ́къ скрыва́ѧй премѹ́дрость свою̀.