Read Библия Церковнославянская Сiрахъ 21 Bible Online

Сiрахъ 21 - Библия Церковнославянская bible

Сiрахъ 21

¹Ча́до, согрѣши́лъ ли є҆сѝ, не приложѝ ктомѹ̀, и҆ ѡ҆ пре́жднихъ твои́хъ помоли́сѧ.

²ѩ҆́коже ѿ лица̀ ѕмїи́на, бѣжѝ ѿ грѣха̀: а҆́ще бо пристѹ́пиши къ немѹ̀, ѹ҆гры́знетъ тѧ̀:

³зѹ́бы львѡ́вы зѹ́бы є҆гѡ̀, ѹ҆бива́ющїи дѹ́шы человѣ҄чи.

⁴ѩ҆́кѡ ме́чь ѻ҆бою́дѹ ѻ҆́стръ всѧ́ко беззако́нїе, ра́нѣ є҆гѡ̀ нѣ́сть и҆зцѣле́нїѧ.

⁵Преще́нїе и҆ досажде́нїе ѡ҆пѹстоша́тъ бога́тство: та́кѡ и҆ до́мъ го́рдыхъ запѹстѣ́етъ.

⁶Моле́нїе ни́щагѡ и҆з̾ ѹ҆́стъ до ѹ҆́шїю є҆гѡ̀, и҆ сѹ́дъ є҆гѡ̀ со тща́нїемъ грѧде́тъ.

⁷Ненави́дѧй ѡ҆бличе́нїѧ послѣ́дѹетъ грѣ́шникѹ, и҆ боѧ́йсѧ гд҇а ѡ҆брати́тсѧ се́рдцемъ.

⁸Позна́нъ є҆́сть и҆здале́ча си́льный ѧ҆зы́комъ, и҆ разѹ́мивый вѣ́сть, є҆гда̀ пополза́етсѧ.

⁹Созида́ѧй до́мъ сво́й и҆мѣ́нїемъ чѹжди́мъ, ѩ҆́коже собира́ѧй ка́менїе на гро́бъ себѣ̀.

¹⁰И҆згрє́бїѧ сѡ́брана собо́рище беззако́нникѡвъ, и҆ кончи́на и҆́хъ пла́мень ѻ҆́гненъ.

¹¹Пѹ́ть грѣ́шникѡвъ ѹ҆глажде́нъ ѿ ка́менїѧ, а҆ на послѣ́докъ є҆гѡ̀ ро́въ а҆́довъ.

¹²Сохранѧ́ѧй зако́нъ содержи́тъ помышле́нїе своѐ,

¹³и҆ соверше́нїе стра́ха гд҇нѧ премѹ́дрость.

¹⁴Не нака́жетсѧ, и҆́же не є҆́сть кова́ренъ:

¹⁵є҆́сть бо кова́рство ѹ҆множа́ющее го́ресть.

¹⁶Ра́зѹмъ премѹ́драгѡ ѩ҆́кѡ пото́пъ ѹ҆мно́житсѧ, и҆ совѣ́тъ є҆гѡ̀ ѩ҆́кѡ и҆сто́чникъ живота̀.

¹⁷Ѹ҆тро́ба бѹ́ѧгѡ ѩ҆́кѡ сосѹ́дъ сокрѹше́нъ и҆ всѧ́кагѡ ра́зѹма не ѹ҆держи́тъ.

¹⁸Сло́во премѹ́дро а҆́ще ѹ҆слы́шитъ разѹ́мный, восхва́литъ є҆̀ и҆ къ немѹ̀ приложи́тъ: ѹ҆слы́ша є҆̀ бѹ́й, и҆ не ѹ҆го́дно є҆мѹ̀ бы́сть, и҆ ѡ҆братѝ є҆̀ за плещы̀ своѧ҄.

¹⁹По́вѣсть бѹ́ѧгѡ ѩ҆́кѡ бре́мѧ на пѹтѝ: во ѹ҆стна́хъ же разѹ́мнагѡ ѡ҆брѧ́щетсѧ благода́ть.

²⁰Ѹ҆ста̀ премѹ́драгѡ взы́щѹтсѧ въ собра́нїи, и҆ словеса̀ є҆гѡ̀ размышлє́на бѹ́дѹтъ въ се́рдцы.

²¹ѩ҆́коже до́мъ разоре́нъ, та́кѡ бѹ́ѧгѡ премѹ́дрость, и҆ ра́зѹмъ неразѹ́мнагѡ неиспы҄тны глаго́лы.

²²Пѹ҄та на нога́хъ неразѹмѣва́ющымъ наказа́нїѧ, и҆ ѩ҆́кѡ рѹчні́и ѡ҆кѡ́вы на рѹцѣ̀ деснѣ́й.

²³Бѹ́й во смѣ́хѣ возно́ситъ гла́съ сво́й, мѹ́жъ же разѹ́мный є҆два̀ ти́хѡ ѡ҆скла́битсѧ.

²⁴ѩ҆́коже ѹ҆́тварь злата́ѧ мѹ́дромѹ наказа́нїе, и҆ ѩ҆́коже ѡ҆́брѹчь на деснѣ́й мы́шцѣ є҆гѡ̀.

²⁵Нога̀ бѹ́ѧгѡ скора̀ въ до́мъ, человѣ́къ же многоискѹ́сный ѹ҆срами́тсѧ ѿ лица̀.

²⁶Безѹ́мный две́рьми прини́четъ во хра́минѹ, мѹ́жъ же нака́занъ внѣ̀ ста́нетъ.

²⁷Ненаказа́нїе человѣ́кѹ слѹ́шати при две́рехъ, мѹ́дрый же ѡ҆тѧготи́тсѧ безче́стїемъ.

²⁸Ѹ҆стнѣ̀ многорѣ́чивыхъ не своѧ҄ сѝ повѣ́дѧтъ, словеса́ же мѹ́дрыхъ въ мѣ́рилѣхъ ста́нѹтъ.

²⁹Во ѹ҆стѣ́хъ бѹ́ихъ се́рдце и҆́хъ, въ се́рдцы же премѹ́дрыхъ ѹ҆ста̀ и҆́хъ.

³⁰Кленѹ́щѹ нечести́вомѹ сатанѹ̀, са́мъ клене́тъ свою̀ дѹ́шѹ.

³¹Скверни́тъ свою̀ дѹ́шѹ шепотли́вый, и҆ гдѣ́ либо жи́ти и҆́мать, возненави́дѣнъ бѹ́детъ.