Read Библия Церковнославянская Сiрахъ 23 Bible Online

Сiрахъ 23 - Библия Церковнославянская bible

Сiрахъ 23

¹Гд҇и ѻ҆́ч҃е и҆ влдко живота̀ моегѡ̀, не ѡ҆ста́ви менѐ въ совѣ́тѣ и҆́хъ и҆ не да́ждь мѝ впа́сти въ нѧ̀.

²Кто̀ возложи́тъ на помышле́нїе моѐ ра҄ны и҆ на се́рдце моѐ наказа́нїе премѹ́дрости, да ѡ҆ неразѹ́мїихъ мои́хъ не пощадѧ́тъ, и҆ да не пре́йдѹтъ грѣсѝ и҆́хъ;

³ѩ҆́кѡ да не ѹ҆мно́жатсѧ невѣ҄дѣнїѧ моѧ҄ и҆ грѣсѝ моѝ премно́зи да не бѹ́дѹтъ, и҆ падѹ́сѧ пред̾ сѹпоста҄ты, и҆ пора́дѹетмисѧ вра́гъ мо́й.

⁴Гд҇и ѻ҆́ч҃е и҆ бж҃е живота̀ моегѡ̀, не да́ждь возноше́нїѧ ѻ҆чи́ма мои́ма и҆ вожделѣ́нїе ѿвратѝ ѿ менє̀.

⁵Чре́ва по́хоть и҆ блѹдодѣѧ҄нїѧ да не ѡ҆б̾и́мѹтъ мѧ̀, и҆ безстѹ́днѣй дѹшѝ не преда́ждь менѐ.

⁶Послѹ́шайте, ча҄да, наказа́нїѧ ѹ҆́стъ: хранѧ́й бо не ѩ҆́тъ бѹ́детъ ѹ҆стна́ма свои́ма.

⁷Ѹ҆стна́ма свои́ма ѩ҆́тъ бѹ́детъ грѣ́шникъ, и҆ клеветни́къ и҆ го́рдый попо́лзнетсѧ въ ни́хъ.

⁸Заклина́нїю не ѡ҆бѹча́й ѹ҆́стъ свои́хъ

⁹и҆ клѧ́тисѧ и҆́менемъ ст҃ы́мъ не навыка́й.

¹⁰ѩ҆́коже бо ра́бъ и҆стѧзѹ́емь ча́стѡ ѿ ра҄нъ не ѹ҆ма́литсѧ, та́кожде и҆ клены́йсѧ и҆́менемъ ст҃ы́мъ всегда̀ ѿ грѣха̀ не ѡ҆чи́ститсѧ.

¹¹Мѹ́жъ клены́йсѧ мно́гѡ и҆спо́лнитсѧ беззако́нїѧ, и҆ не ѿстѹ́питъ ѿ до́мѹ є҆гѡ̀ ѩ҆́зва:

¹²а҆́ще согрѣши́тъ, грѣ́хъ є҆гѡ̀ на не́мъ, и҆ а҆́ще пре́зритъ, сѹгѹ́бѡ согрѣши́тъ:

¹³и҆ а҆́ще вотщѐ клѧ́сѧ, не ѡ҆правди́тсѧ, и҆спо́лнитсѧ бо до́мъ є҆гѡ̀ нападе́нїѧ.

¹⁴Е҆́сть бесѣ́да ѡ҆блече́на сме́ртїю: да не ѡ҆брѧ́щетсѧ во наслѣ́дїи ї҆а́кѡвли:

¹⁵ѿ благочести́выхъ бо всѧ҄ сїѧ҄ ѿстѹ́пѧтъ, и҆ во грѣхѝ не впадѹ́тсѧ.

¹⁶Въ ненаказа́нїи неключи́мѣмъ не ѡ҆бѹча́й ѹ҆́стъ свои́хъ: є҆́сть бо въ не́мъ сло́во грѣха̀.

¹⁷Помѧнѝ ѻ҆тца̀ твоего̀ и҆ ма́терь твою̀, посредѣ̀ бо вельмо́жъ сѣди́ши:

¹⁸да не ка́кѡ забве́нъ бѹ́деши пред̾ ни́ми, и҆ ѡ҆бы́чаемъ свои́мъ ѡ҆бѹѧ́еши и҆ похо́щеши, дабы̀ ты̀ не роди́лсѧ, и҆ де́нь рожде́нїѧ твоегѡ̀ проклене́ши.

¹⁹Человѣ́къ ѡ҆бѹча́ѧсѧ словесє́мъ поноше́нїѧ во всѣ́хъ дне́хъ свои́хъ не наѹчи́тсѧ.

²⁰Два̀ ви҄да ѹ҆множа́ютъ грѣхѝ и҆ тре́тїй наво́дитъ гнѣ́въ:

²¹дѹша̀ тепла̀, ѩ҆́кѡ ѻ҆́гнь горѧ́щь, не ѹ҆га́снетъ, до́ндеже поглощена̀ бѹ́детъ:

²²человѣ́къ блѹдни́къ въ тѣ́лѣ пло́ти своеѧ̀ не преста́нетъ, до́ндеже возжже́тъ ѻ҆́гнь.

²³Человѣ́кѹ блѹ́днѹ всѧ́къ хлѣ́бъ сла́докъ, не преста́нетъ, до́ндеже ѹ҆́мретъ.

²⁴Человѣ́къ престѹпа́ѧй ло́же своѐ, глаго́лѧ въ дѹшѝ свое́й: кто̀ мѧ̀ ви́дитъ;

²⁵тма̀ ѡ҆́крестъ менє̀, и҆ стѣ́ны закрыва́ютъ мѧ̀, и҆ никто́же мѧ̀ ви́дитъ, когѡ̀ ѹ҆бою́сѧ; грѣхѡ́въ мои́хъ не воспомѧ́нетъ вы́шнїй.

²⁶И҆ ѻ҆́чи человѣ́честїи стра́хъ є҆гѡ̀:

²⁷и҆ не разѹмѣ̀, ѩ҆́кѡ ѻ҆́чи гд҇ни тма́ми те́мъ кра́тъ свѣтлѣ́йшїи со́лнца сѹ́ть,

²⁸прозира́ющїи всѧ҄ пѹти҄ человѣ́чєскїѧ и҆ разсматрѧ́ющїи въ та́йныхъ мѣ́стѣхъ:

²⁹пре́жде не́же создана҄ бы́ша, всѧ҄ ѹ҆вѣ҄дѣна є҆мѹ̀, та́кожде и҆ по сконча́нїи.

³⁰Се́й на пѹте́хъ гра́да ѿмще́нъ бѹ́детъ, и҆ и҆дѣ́же не надѣ́ѧшесѧ, ѩ҆́тъ бѹ́детъ.

³¹Та́кожде и҆ жена̀ ѡ҆ста́вльшаѧ мѹ́жа своего̀ и҆ прїе́млющаѧ наслѣ́дника ѿ и҆но́гѡ:

³²пе́рвое бо ѿ зако́на вы́шнѧгѡ ѿстѹпѝ, и҆ второ́е мѹ́жѹ своемѹ̀ согрѣшѝ, и҆ тре́тїе блѹдо́мъ прелюбодѣ́йствова, ѿ чѹжда́гѡ мѹ́жа ча҄да сотворѝ:

³³сїѧ̀ пред̾ собо́ръ и҆зведе́на бѹ́детъ, и҆ на ча́дѣхъ є҆ѧ̀ посѣще́нїе бѹ́детъ:

³⁴не ѹ҆коренѧ́тсѧ ча҄да є҆ѧ̀ въ ко́рень, и҆ вѣ҄тви є҆ѧ̀ не сотворѧ́тъ плода̀:

³⁵и҆ ѡ҆ста́витъ на клѧ́твѹ па́мѧть свою̀, и҆ поноше́нїе є҆ѧ̀ не потреби́тсѧ.

³⁶И҆ ѹ҆разѹмѣ́ютъ ѡ҆ста́вльшїисѧ, ѩ҆́кѡ ничто́же лѹ́чше стра́ха гд҇нѧ, и҆ ничто́же сладча́е, то́кмѡ внима́ти за́повѣдемъ гд҇нимъ.

³⁷Сла́ва ве́лїѧ є҆́же послѣ́довати бг҃ѹ, долгота́ же дні́й є҆́же прїѧ́тѹ тебѣ̀ бы́ти ѿ негѡ̀.