Read Библия Церковнославянская Сiрахъ 24 Bible Online

Сiрахъ 24 - Библия Церковнославянская bible

Сiрахъ 24

¹Премѹ́дрость похва́литъ дѹ́шѹ свою̀ и҆ посредѣ̀ люді́й свои́хъ восхва́литсѧ.

²Въ цр҃кви вы́шнѧгѡ ѿве́рзетъ ѹ҆ста̀ своѧ҄ и҆ прѧ́мѡ си́лѣ є҆гѡ̀ восхва́литсѧ:

³а҆́зъ и҆з̾ ѹ҆́стъ вы́шнѧгѡ и҆зыдо́хъ и҆ ѩ҆́кѡ мгла̀ покры́хъ зе́млю,

⁴а҆́зъ на высо́кихъ всели́хсѧ, и҆ престо́лъ мо́й во столпѣ̀ ѡ҆́блачнѣ,

⁵крѹ́гъ нб҇ный ѡ҆быдо́хъ є҆ди́на и҆ во глѹбинѣ̀ бе́здны походи́хъ,

⁶во́лнѹ морскѹ́ю и҆ всю̀ зе́млю, и҆ всѧ҄ лю́ди и҆ ѩ҆зы́къ стѧжа́хъ,

⁷со всѣ́ми си́ми поко́ѧ взыска́хъ, и҆ во наслѣ́дїи чїе́мъ водворю́сѧ;

⁸Тогда̀ заповѣ́да мѝ созда́тель всѣ́хъ, и҆ созда́вый мѧ̀ препоко́и ски́нїю мою̀ и҆ речѐ:

⁹во ї҆а́кѡвѣ всели́сѧ и҆ во ї҆и҃ли наслѣ́дствѹй.

¹⁰Пре́жде вѣ́ка и҆з̾ нача́ла созда̀ мѧ̀, и҆ да́же до вѣ́ка не ѡ҆скѹдѣ́ю.

¹¹Во ски́нїи ст҃ѣ́й пред̾ ни́мъ послѹжи́хъ и҆ та́кѡ въ сїѡ́нѣ ѹ҆тверди́хсѧ:

¹²во гра́дѣ возлю́бленнѣмъ та́кожде мѧ̀ препоко́и, и҆ во ї҆ер҇ли́мѣ вла́сть моѧ̀:

¹³и҆ ѹ҆корени́хсѧ въ лю́дехъ просла́вленныхъ, въ ча́сти гд҇ни наслѣ́дїѧ є҆гѡ̀.

¹⁴ѩ҆́кѡ ке́дръ вознесо́хсѧ въ лїва́нѣ и҆ ѩ҆́кѡ кѷпарі́съ на гора́хъ а҆ермѡ́нскихъ,

¹⁵ѩ҆́кѡ фі́нїѯъ возвы́сихсѧ на бре́зѣхъ и҆ ѩ҆́кѡ са́дъ ши́пковый во ї҆ерїхѡ́нѣ,

¹⁶ѩ҆́кѡ ма́слина благолѣ́пна на по́ли, и҆ вознесо́хсѧ ѩ҆́кѡ ѩ҆́воръ:

¹⁷ѩ҆́коже кори́ца и҆ ѩ҆́кѡ а҆спала́ѳъ а҆рѡма́тѡвъ да́хъ воню̀, и҆ ѩ҆́кѡ смѵ́рна и҆збра́нна и҆зда́хъ благоѹха́нїе,

¹⁸ѩ҆́кѡ халва́ни и҆ ѻ҆́нѷѯъ и҆ ста́кти, и҆ ѩ҆́кѡ лїва́ново кѹре́нїе во ски́нїи.

¹⁹А҆́зъ ѩ҆́кѡ тереві́нѳъ распростро́хъ вѣ҄твїѧ моѧ҄, и҆ вѣ҄тви моѧ҄ вѣ҄тви сла́вы и҆ благода́ти:

²⁰а҆́зъ ѩ҆́кѡ вїногра́дъ прорасти́хъ благода́ть, и҆ цвѣ́ти моѝ пло́дъ сла́вы и҆ бога́тства.

²¹Пристѹпи́те ко мнѣ̀, жела́ющїи менѐ, и҆ ѿ плодѡ́въ мои́хъ насы́титесѧ:

²²па́мѧть бо моѧ̀ сладка̀ па́че ме́да, и҆ наслѣ́дїе моѐ па́че со́та ме́двена.

²³ѩ҆дѹ́щїи мѧ̀ є҆щѐ вза́лчѹтъ, и҆ пїю́щїи мѧ̀ є҆щѐ вжа́ждѹтсѧ:

²⁴слѹ́шаѧй менѐ не посрами́тсѧ и҆ дѣ́лающїи ѹ҆ менє̀ не согрѣша́тъ.

²⁵Сїѧ҄ всѧ҄ кни́га завѣ́та бг҃а вы́шнѧгѡ,

²⁶зако́нъ, є҆го́же заповѣ́да мѡѷсе́й, наслѣ́дїе со́нмѡмъ ї҆а҄кѡвлимъ:

²⁷насыща́ѧ ѩ҆́кѡ фїсѡ́нъ премѹ́дростїю и҆ ѩ҆́кѡ ті́гръ во дни҄ новопло́дїй,

²⁸и҆сполнѧ́ѧй ѩ҆́кѡ є҆ѵфра́тъ ра́зѹма и҆ ѩ҆́коже ї҆ѻрда́нъ во дне́хъ жа́твы,

²⁹ѩ҆влѧ́ѧй ѩ҆́кѡ свѣ́тъ наказа́нїе и҆ ѩ҆́коже гиѡ́нъ во дни҄ ѡ҆б̾има́нїѧ вїна̀.

³⁰Не сконча̀ пе́рвый ѹ҆разѹмѣ́ти є҆ѧ̀, та́кожде и҆ послѣ́днїй не и҆зслѣ́ди є҆ѧ̀:

³¹и҆́бо па́че мо́рѧ ѹ҆мно́жисѧ размышле́нїе є҆ѧ̀, и҆ совѣ́тъ є҆ѧ̀ па́че бе́здны ве́лїѧ.

³²И҆ а҆́зъ ѩ҆́кѡ раскопа́нїе и҆з̾ рѣкѝ и҆ ѩ҆́коже водоте́чїе и҆зыдо́хъ въ ра́й.

³³Рѣ́хъ: напою̀ мо́й вертогра́дъ и҆ ѹ҆пою̀ себѣ̀ лѹ́гъ:

³⁴и҆ сѐ, раскопа́нїе мѝ бы́сть рѣко́ю, и҆ рѣка̀ моѧ̀ бы́сть мо́ремъ.

³⁵Поне́же наказа́нїе ѩ҆́кѡ ѹ҆́тро просвѣщѹ̀ и҆ проѧвлю̀ є҆̀ да́же до дале́че:

³⁶є҆щѐ ѹ҆че́нїе ѩ҆́коже про҇ро́чество и҆злїю̀ и҆ ѡ҆ста́влю є҆̀ въ ро́ды вѣ҄чны.

³⁷Ви́дите, ѩ҆́кѡ не себѣ̀ є҆ди́номѹ трѹди́хсѧ, но всѣ҄мъ и҆́щѹщымъ є҆ѧ̀.