Read Библия Церковнославянская Сiрахъ 25 Bible Online

Сiрахъ 25 - Библия Церковнославянская bible

Сiрахъ 25

¹Тремѝ ѹ҆краси́хсѧ и҆ ста́хъ красна̀ пред̾ гд҇емъ и҆ челѡвѣ́ки:

²є҆диномы́слїемъ бра́тїй и҆ любо́вїю и҆́скреннихъ, и҆ мѹ́жъ и҆ жена̀ междѹ̀ собо́ю согла́сни.

³Трѝ же ви́ды возненави́дѣ дѹша̀ моѧ̀, и҆ ѕѣлѡ̀ мѝ ѡ҆мерзѣ̀ живо́тъ и҆́хъ:

⁴ѹ҆бо́га го́рда, и҆ бога́та лжи́ва, и҆ ста́ра прелюбодѣ́ѧ ѹ҆малѧ́ющагосѧ ѹ҆мо́мъ.

⁵ѩ҆̀же въ ю҆́ности не собра́лъ є҆сѝ, то̀ ка́кѡ мо́жеши ѡ҆брѣстѝ въ ста́рости твое́й;

⁶Ко́ль є҆́сть красе́нъ сѣди́намъ сѹ́дъ, и҆ старѣ́йшымъ разѹмѣ́ти совѣ́тъ;

⁷Ко́ль красна̀ ста҄рымъ премѹ́дрость и҆ сла҄внымъ разѹмѣ́нїе и҆ совѣ́тъ;

⁸Вѣне́цъ ста́рцємъ многоразли́чное и҆скѹ́сство, и҆ похвале́нїе и҆́хъ стра́хъ гд҇ень.

⁹Де́вѧть помышле́нїй ѹ҆блажи́хъ въ се́рдцы мое́мъ, а҆ десѧ́тое и҆зрекѹ̀ ѧ҆зы́комъ:

¹⁰человѣ́къ веселѧ́йсѧ ѡ҆ ча́дѣхъ, живѧ́й и҆ зрѧ́й паде́нїе врагѡ́въ.

¹¹Блаже́нъ живѧ́й со жено́ю разѹ́мною, и҆ и҆́же ѧ҆зы́комъ (свои́мъ) не поползнѹ́сѧ, и҆ и҆́же не порабо́та недосто́йномѹ себѣ̀.

¹²Блаже́нъ, и҆́же ѡ҆брѣ́те мѹ́дрость и҆ повѣ́даѧй во ѹ҆́ши послѹ́шающихъ.

¹³Ко́ль вели́къ, и҆́же мѹ́дрость ѡ҆брѣ́те, но нѣ́сть па́че боѧ́щагѡсѧ гд҇а.

¹⁴Стра́хъ гд҇ень па́че всегѡ̀ пред̾ѹспѣ̀, держа́й є҆го̀ комѹ̀ ѹ҆подо́битсѧ;

¹⁵Всѧ́ка ѩ҆́зва и҆ не ѩ҆́зва серде́чнаѧ и҆ всѧ́кое лѹка́вство и҆ не лѹка́вство же́нское:

¹⁶всѧ́кое нападе́нїе и҆ не нападе́нїе ненави́дѧщихъ, и҆ всѧ́кое мще́нїе и҆ не ѿмще́нїе врагѡ́въ.

¹⁷Нѣ́сть главы̀ па́че главы̀ ѕмїи́ны, и҆ нѣ́сть ѩ҆́рости па́че ѩ҆́рости вра́жїѧ.

¹⁸Лѹ́чше жи́ти со льво́мъ и҆ ѕмі́емъ, не́же жи́ти со жено́ю лѹка́вою.

¹⁹Лѹка́вство жены̀ и҆змѣнѧ́етъ зра́къ є҆ѧ̀ и҆ ѡ҆мрача́етъ лицѐ своѐ ѩ҆́кѡ вре́тище:

²⁰посредѣ̀ и҆́скреннихъ свои́хъ возлѧ́жетъ мѹ́жъ є҆ѧ̀, и҆ слы́шавъ воздо́хнетъ го́рькѡ.

²¹Мала̀ є҆́сть всѧ́ка ѕло́ба проти́вѹ ѕло́бѣ же́нстѣй: жре́бїй грѣ́шника спаде́тъ на ню̀.

²²ѩ҆́коже восхожде́нїе по пескѹ̀ нога́ма ста́рагѡ, та́кѡ жена̀ ѧ҆зы́чна мѹ́жѹ молчали́вѹ.

²³Не сматрѧ́й на красотѹ̀ же́нскѹю и҆ жены̀ въ по́хоть не пожела́й.

²⁴Гнѣ́въ и҆ безстѹ́дїе и҆ срамота̀ вели́ка жена̀, а҆́ще ѡ҆блада́етъ мѹ́жемъ свои́мъ.

²⁵Се́рдце смире́но, и҆ лицѐ дрѧ́хло, и҆ ѩ҆́зва серде́чна жена̀ лѹка́ва:

²⁶рѹ́цѣ немѡщны́ѧ и҆ кѡлѣ́на разсла́блєна, (жена̀) ѩ҆́же не блажи́тъ мѹ́жа своего̀.

²⁷Ѿ жены̀ нача́ло грѣха̀, и҆ то́ю ѹ҆мира́емъ всѝ.

²⁸Не да́ждь водѣ̀ прохо́да, ни женѣ̀ лѹка́вѣ дерзнове́нїѧ:

²⁹а҆́ще не хо́дитъ под̾ рѹко́ю твое́ю, ѿсѣцы̀ ю҆̀ ѿ пло́ти твоеѧ̀.