Read Библия Церковнославянская Сiрахъ 26 Bible Online

Сiрахъ 26 - Библия Церковнославянская bible

Сiрахъ 26

¹Жены̀ до́брыѧ блаже́нъ є҆́сть мѹ́жъ, и҆ число̀ дні́й є҆гѡ̀ сѹгѹ́бо.

²Жена̀ до́блѧѧ весели́тъ мѹ́жа своего̀ и҆ лѣ҄та є҆гѡ̀ и҆спо́лнитъ ми́ромъ.

³Жена̀ добра̀ ча́сть блага̀, въ ча́сти боѧ́щихсѧ гд҇а дана̀ бѹ́детъ.

⁴Бога́тагѡ же и҆ ѹ҆бо́гагѡ се́рдце бла́го, во всѧ́ко вре́мѧ лицѐ ти́хо.

⁵Ѿ тре́хъ ѹ҆боѧ́сѧ се́рдце моѐ, и҆ ѿ лица̀ четве́ртагѡ ѹ҆страши́хсѧ:

⁶преда́нїѧ гра́да и҆ собра́нїѧ наро́да, и҆ ѡ҆болга́нїѧ над̾ сме́рть, всѧ҄ тѧ́жєстна.

⁷Болѣ́знь се́рдца и҆ сѣ́тованїе жена̀ ревни́ва ѡ҆ женѣ̀,

⁸и҆ ѩ҆́зва ѧ҆зы́ка всѣ҄мъ приѡбща́ющаѧсѧ.

⁹Воло́вое и҆́го дви́жимо жена̀ лѹка́вна, держа́йсѧ є҆ѧ̀ ѩ҆́кѡ є҆́млѧйсѧ скорпі́и.

¹⁰Гнѣ́въ вели́къ жена̀ пїѧ́нчива, и҆ стѹда̀ своегѡ̀ не покры́етъ.

¹¹Блѹ́дъ же́нскїй въ возвыше́нїи ѻ҆че́съ и҆ бровьмѝ є҆ѧ̀ позна́нъ бѹ́детъ.

¹²Над̾ дще́рїю безстѹ́дною ѹ҆твердѝ стра́жѹ, да не попѹще́нїе ѡ҆брѣ́тши ѹ҆потреби́тъ себѐ.

¹³Вслѣ́дъ безстѹ́дна ѻ҆́ка сохрани́сѧ и҆ не диви́сѧ, а҆́ще въ тѧ̀ согрѣши́тъ:

¹⁴ѩ҆́кѡ жа́жденъ пѹ́тникъ ѿве́рзетъ ѹ҆ста̀ и҆ ѿ всѧ́кїѧ воды̀ бли́жнїѧ и҆спїе́тъ,

¹⁵прѧ́мѡ всѧ́кагѡ кола̀ сѧ́детъ и҆ прѧ́мѡ стрѣлы̀ ѿве́рзетъ тѹ́лъ.

¹⁶Благода́ть же́нска возвесели́тъ мѹ́жа є҆ѧ̀, и҆ кѡ́сти є҆гѡ̀ ѹ҆тѹчни́тъ хѹдо́жество є҆ѧ̀.

¹⁷Даѧ́нїе гд҇не жена̀ молчали́ва, и҆ нѣ́сть и҆скѹ́па нака́занныѧ дѹшѝ.

¹⁸Благода́ть на благода́ти жена̀ стыдли́ва,

¹⁹и҆ нѣ́сть мѣ́рило всѧ́кое досто́йное возде́ржныѧ дѹшѝ.

²⁰Со́лнце восходѧ́щее на высо́кихъ гд҇нихъ,

²¹и҆ добро́та жены̀ до́брыѧ въ красотѣ̀ до́мѹ є҆ѧ̀:

²²свѣти́лникъ сїѧ́ѧ на свѣ́щницѣ свѧ́тѣ, и҆ добро́та лица̀ на во́зрастѣ постоѧ́ннѣмъ.

²³Столпѝ зла́ти на подсто́лпїихъ сре́брѧныхъ, и҆ но́зѣ кра́сни на плесна́хъ до́брѣ стоѧ́щихъ.

²⁴Ѡ҆ двои́хъ печа́льно бы́сть се́рдце моѐ, и҆ ѡ҆ тре́тїемъ ѩ҆́рость мѝ на́йде:

²⁵мѹ́жъ боре́цъ лиша́ѧсѧ за скѹдотѹ̀, и҆ мѹ́жїе разѹ́миви а҆́ще ѿринове́ни бѹ́дѹтъ:

²⁶возвраща́ѧсѧ ѿ пра́вды на грѣ́хъ, гд҇ь ѹ҆гото́витъ є҆го̀ на ме́чь.

²⁷Е҆два̀ и҆́зметсѧ кѹпе́цъ ѿ погрѣше́нїѧ, и҆ не ѡ҆правди́тсѧ корче́мникъ ѿ грѣха̀.