Read Библия Церковнославянская Сiрахъ 27 Bible Online

Сiрахъ 27 - Библия Церковнославянская bible

Сiрахъ 27

¹За скѹ́дость мно́зи согрѣши́ша, и҆ и҆ща́й ѡ҆богатѣ́ти ѿврати́тъ ѻ҆́ко.

²Посредѣ̀ со́браныхъ ка́менїй вонзе́тсѧ ко́лъ, и҆ посредѣ̀ продаѧ́нїѧ и҆ кѹ́пли соверши́тсѧ грѣ́хъ.

³А҆́ще не держи́тсѧ стра́ха гд҇нѧ со тща́нїемъ, вско́рѣ преврати́тсѧ до́мъ є҆гѡ̀.

⁴Трѧсе́нїемъ решета̀ ѡ҆ста́нетъ сме́тїе: та́кожде ѻ҆тре́би человѣ́честїи въ помышле́нїи є҆гѡ̀.

⁵Сосѹ́ды скѹдє́льничи и҆скѹша́етъ пе́щь, и҆ и҆скѹше́нїе человѣ́ческо въ помышле́нїи є҆гѡ̀.

⁶Воздѣ́ланїе дре́ва ѩ҆влѧ́етъ пло́дъ є҆гѡ̀: та́кѡ сло́во помышле́нїѧ въ се́рдцы человѣ́честѣмъ.

⁷Пре́жде бесѣ́ды не похвалѝ мѹ́жа: сїѧ́ бо и҆скѹше́нїе (є҆́сть) человѣ́кѡвъ.

⁸А҆́ще го́ниши пра́вдѹ, пости́гнеши ю҆̀ и҆ ѡ҆блече́шисѧ въ ню̀ ѩ҆́кѡ въ поди́ръ сла́вы.

⁹Пти҄цы съ подо́бными себѣ̀ ѡ҆бита́ютъ, и҆ и҆́стина къ творѧ́щымъ ю҆̀ ѡ҆брати́тсѧ.

¹⁰Ле́въ лови́тъ ло́въ, та́кожде и҆ грѣсѝ дѣ́лающихъ непра́вдѹ.

¹¹По́вѣсть благочести́вагѡ всегда̀ премѹ́дрость: безѹ́мный же ѩ҆́кѡ лѹна̀ и҆змѣнѧ́етсѧ.

¹²Посредѣ̀ безѹ́мныхъ блюдѝ вре́мѧ, посредѣ́ же размышлѧ́ющихъ ѹ҆чаща́й.

¹³По́вѣсть бѹ́ихъ ме́рзость, и҆ смѣ́хъ и҆́хъ во ѹ҆слажде́нїи грѣха̀.

¹⁴Бесѣ́да многокленѹ́щагѡсѧ под̾и́метъ власы̀, и҆ сва́ръ є҆гѡ̀ затче́нїе ѹ҆ше́съ.

¹⁵Проли́тїе кро́ве сва́ръ го́рдыхъ, и҆ ѹ҆кори́зна и҆́хъ слѹ́хъ тѧ́жкїй.

¹⁶Ѿкрыва́ѧй та҄йнаѧ погѹблѧ́етъ вѣ́рность и҆ не ѡ҆брѧ́щетъ дрѹ́га проти́вѹ дѹшѝ своеѧ̀.

¹⁷Возлюбѝ дрѹ́га и҆ ѹ҆вѣ́рисѧ съ ни́мъ:

¹⁸а҆́ще же ѿкры́еши та҄йны є҆гѡ̀, не и҆́маши гна́ти по не́мъ.

¹⁹ѩ҆́коже бо погѹби́тъ человѣ́къ врага̀ своего̀, та́кѡ погѹби́ши дрѹ́жбѹ и҆́скреннѧгѡ:

²⁰и҆ ѩ҆́коже пти́цѹ и҆з̾ рѹкѝ твоеѧ̀ и҆спѹ́стиши, та́кѡ и҆спѹсти́лъ є҆сѝ и҆́скреннѧго и҆ не ѹ҆лови́ши є҆го̀:

²¹не гони́сѧ за ни́мъ, ѩ҆́кѡ дале́че ѿстѹпѝ и҆ и҆збѣжѐ ѩ҆́кѡ се́рна ѿ сѣ́ти.

²²ѩ҆́кѡ стрѹ́пъ є҆́сть ѡ҆бѧза́ти, и҆ клеветы̀ є҆́сть и҆змѣ́на:

²³ѿкры́вый же та҄йнаѧ погѹбѝ вѣ́рность.

²⁴Помиза́ѧй ѻ҆́комъ кѹе́тъ ѕло̀, и҆ никто́же є҆го̀ ѿста́витъ ѿ тогѡ̀:

²⁵пред̾ ѻ҆чи́ма твои́ма ѹ҆слади́тъ ѹ҆ста̀ своѧ҄ и҆ словесє́мъ твои҄мъ подиви́тсѧ,

²⁶послѣди́ же разврати́тъ ѹ҆ста̀ своѧ҄ и҆ въ словесѣ́хъ твои́хъ да́стъ собла́знъ.

²⁷Мнѡ́гаѧ возненави́дѣхъ и҆ не ѡ҆брѣто́хъ подо́бна є҆мѹ̀, и҆ гд҇ь возненави́дитъ є҆го̀.

²⁸Верга́ѧй ка́мень на высотѹ̀ на главѹ̀ свою̀ верга́етъ, и҆ ѩ҆́зва льсти́ва раздере́тъ стрѹ́пы.

²⁹И҆скопова́ѧй ро́въ впаде́тсѧ въ ѻ҆́нь, и҆ распростира́ѧй сѣ́ть ѹ҆вѧ́знетъ въ не́й.

³⁰Творѧ́й ѕло̀ ввали́тсѧ въ нѐ и҆ не позна́етъ, ѿкѹ́дѹ прїи́детъ є҆мѹ̀.

³¹Порѹга́нїе и҆ поноше́нїе го́рдыхъ, и҆ ѿмще́нїе ѩ҆́кѡ ле́въ ѹ҆лови́тъ и҆̀хъ.

³²Сѣ́тїю ѹ҆ло́вѧтсѧ веселѧ́щїисѧ ѡ҆ паде́нїи благовѣ́рныхъ, и҆ болѣ́знь и҆знѹри́тъ ѧ҆̀ пре́жде сме́рти и҆́хъ.

³³Гнѣ́въ и҆ ѩ҆́рость, и҆ сїѧ҄ сѹ́ть ме́рзость, и҆ мѹ́жъ грѣ́шникъ ѡ҆держа́нъ и҆́ми бѹ́детъ.