Read Библия Церковнославянская Сiрахъ 28 Bible Online

Сiрахъ 28 - Библия Церковнославянская bible

Сiрахъ 28

¹Ѿмща́ѧй ѿ гд҇а ѡ҆брѧ́щетъ ѿмще́нїе, и҆ грѣхѝ своѧ҄ соблюда́ѧй соблюде́тъ.

²Ѡ҆ста́ви ѡ҆би́дѹ и҆́скреннемѹ твоемѹ̀, и҆ тогда̀ помо́льшѹтисѧ, грѣсѝ твоѝ разрѣша́тсѧ.

³Человѣ́къ на человѣ́ка сохранѧ́етъ гнѣ́въ, а҆ ѿ гд҇а и҆́щетъ и҆зцѣле́нїѧ:

⁴над̾ человѣ́комъ подо́бнымъ себѣ̀ не и҆́мать ми́лости, а҆ ѡ҆ грѣсѣ́хъ свои́хъ мо́литсѧ:

⁵са́мъ сы́й пло́ть, храни́тъ гнѣ́въ: кто̀ ѡ҆чи́ститъ грѣхѝ є҆гѡ̀;

⁶Помѧнѝ послѣ҄днѧѧ и҆ преста́ни враждова́ти, (помѧнѝ) и҆стлѣ́нїе и҆ сме́рть и҆ пребыва́й въ за́повѣдехъ.

⁷Помѧнѝ за́пѡвѣди и҆ не гнѣ́вайсѧ на бли́жнѧго,

⁸и҆ завѣ́тъ вы́шнѧгѡ и҆ презира́й невѣ́жество.

⁹Ѹ҆далѧ́йсѧ ѿ сва́ра и҆ ѹ҆ма́лиши грѣхѝ:

¹⁰человѣ́къ бо ѩ҆́ръ разжиза́етъ сва́ръ, и҆ мѹ́жъ грѣ́шникъ возмѧте́тъ дрѹ́ги и҆ посредѣ̀ ми́рныхъ вложи́тъ клеветѹ̀.

¹¹ѩ҆ково̀ вещество̀ ѻ҆гнѧ̀, та́кѡ возгори́тсѧ: ѩ҆кова̀ крѣ́пость сва́ра, та́кожде и҆ ѻ҆́гнь разгори́тсѧ:

¹²ѩ҆кова̀ крѣ́пость человѣ́ча, та́кожде ѩ҆́рость є҆гѡ̀ бѹ́детъ, и҆ ѩ҆́коже бога́тство є҆гѡ̀, возвы́ситъ гнѣ́въ сво́й.

¹³Рве́нїе ско́рое возжига́етъ ѻ҆́гнь, и҆ сва́ръ на́глый пролива́етъ кро́вь.

¹⁴А҆́ще подѹ́еши на и҆́скрѹ, возгори́тсѧ: и҆ а҆́ще плю́неши на ню̀, ѹ҆га́снетъ: ѻ҆боѧ́ же и҆зо ѹ҆́стъ твои́хъ и҆схо́дѧтъ.

¹⁵Шепотника̀ и҆ двоѧзы́чника подоба́етъ клѧ́сти: мно́гихъ бо ми́рныхъ погѹби́ша.

¹⁶Ѧ҆зы́къ трегѹ́бый мнѡ́ги потрѧсѐ и҆ разлѹчѝ ѧ҆̀ ѿ ѩ҆зы́ка во ѩ҆зы́къ,

¹⁷и҆ гра́ды твє́рды разорѝ и҆ до́мы вельмо́жей превратѝ:

¹⁸ѧ҆зы́къ трегѹ́бый жєны̀ дѡ́блїѧ и҆згна̀ и҆ лишѝ ѧ҆̀ ѿ трѹдѡ́въ и҆́хъ:

¹⁹вне́млѧй є҆мѹ̀ не и҆́мать ѡ҆брѣстѝ поко́ѧ, нижѐ всели́тсѧ со безмо́лвїемъ.

²⁰ѩ҆́зва бична́ѧ стрѹ́пы твори́тъ, ѩ҆́зва же ѧ҆зы́чнаѧ сокрѹша́етъ кѡ́сти.

²¹Мно́зи падо́ша ѻ҆́стрїемъ меча̀, но не ѩ҆́коже па́дшїи ѧ҆зы́комъ:

²²блаже́нъ, и҆́же ѹ҆кры́етсѧ ѿ негѡ̀, и҆́же не про́йде въ ѩ҆́рости є҆гѡ̀, и҆́же не повлечѐ и҆́га є҆гѡ̀ и҆ ѹ҆́зами є҆гѡ̀ не свѧ́занъ бы́сть:

²³и҆́го бо є҆гѡ̀ и҆́го желѣ́зно, и҆ ѹ҆́зы є҆гѡ̀ ѹ҆́зы мѣ҄дѧны:

²⁴сме́рть люта̀ сме́рть є҆гѡ̀, и҆ па́че є҆гѡ̀ лѹ́чше є҆́сть а҆́дъ.

²⁵Не ѡ҆блада́етъ благовѣ́рными, и҆ въ пла́мени є҆гѡ̀ не сгорѧ́тъ.

²⁶Ѡ҆ставлѧ́ющїи гд҇а впадѹ́тсѧ въ ѻ҆́нь, и҆ въ ни́хъ возгори́тсѧ и҆ не ѹ҆га́снетъ: по́сланъ бѹ́детъ на нѧ̀ ѩ҆́кѡ ле́въ, и҆ ѩ҆́кѡ па́рдъ погѹби́тъ ѧ҆̀.

²⁷Ви́ждь, ѡ҆градѝ стѧжа́нїе твоѐ те́рнїемъ,

²⁸сребро̀ твоѐ и҆ зла́то твоѐ свѧжѝ,

²⁹и҆ словесє́мъ твои҄мъ сотворѝ вѣ́съ и҆ мѣ́рѹ, и҆ ѹ҆ста́мъ твои҄мъ сотворѝ две́рь и҆ заво́рѹ.

³⁰Внима́й, да не ка́кѡ поползне́шисѧ и҆́мъ, нижѐ паде́ши прѧ́мѡ ловѧ́щемѹ.