Read Библия Церковнославянская Сiрахъ 29 Bible Online

Сiрахъ 29 - Библия Церковнославянская bible

Сiрахъ 29

¹Творѧ́й ми́лость взаи́мъ да́стъ и҆́скреннемѹ, и҆ ѹ҆крѣплѧ́ѧй рѹ́кѹ свою̀ соблюда́етъ за́пѡвѣди.

²Да́ждь взаи́мъ и҆́скреннемѹ во вре́мѧ тре́бованїѧ є҆гѡ̀ и҆ па́ки возда́ждь и҆́скреннемѹ во вре́мѧ:

³ѹ҆твердѝ сло́во и҆ ѹ҆вѣ́рисѧ съ ни́мъ, и҆ во всѧ́ко вре́мѧ ѡ҆брѧ́щеши потре́бѹ твою̀.

⁴Мно́зи ѩ҆́кѡ ѡ҆брѣ́тенїе возмнѣ́ша заимова́нїе и҆ зада́ша трѹ́дъ помо́щникѡмъ и҆́хъ:

⁵до́ндеже во́зметъ, ѡ҆блобыза́етъ рѹ́цѣ є҆гѡ̀ и҆ на и҆мѣ́нїе и҆́скреннѧгѡ смири́тъ гла́съ:

⁶и҆ во вре́мѧ воздаѧ́нїѧ провлече́тъ вре́мѧ, и҆ возда́стъ словеса̀ ѹ҆ны́нїѧ, и҆ вре́мѧ ѡ҆бвини́тъ.

⁷А҆́ще же возмо́жетъ возда́ти, є҆два̀ полови́нѹ принесе́тъ и҆ вмѣни́тъ є҆̀ ѩ҆́кѡ ѡ҆брѣ́тенїе:

⁸а҆́ще же нѝ, лишѝ є҆го̀ и҆мѣ́нїй свои́хъ и҆ стѧжа̀ є҆го̀ врага̀ тѹ́не:

⁹клѧ҄твы и҆ ѹ҆кори҄зны возда́стъ є҆мѹ̀ и҆ вмѣ́стѡ сла́вы возда́стъ є҆мѹ̀ безче́стїе.

¹⁰Мно́зи ѹ҆́бѡ за лѹка́вство ѿверго́шасѧ, и҆ лиши́тисѧ тѹ́не ѹ҆боѧ́шасѧ.

¹¹Ѻ҆ба́че смире́нномѹ долготерпѝ и҆ ми́лостынею не продолжѝ є҆гѡ̀:

¹²за́повѣди ра́ди застѹпѝ ни́щаго, и҆ по нищетѣ̀ є҆гѡ̀ не ѿвратѝ є҆гѡ̀ тща̀.

¹³Погѹбѝ сребро̀ бра́та ра́ди и҆ дрѹ́га, и҆ да не ѡ҆ржа́вѣетъ под̾ ка́менемъ во па́гѹбѹ.

¹⁴Положѝ сокро́вище своѐ по за́повѣдемъ вы́шнѧгѡ, и҆ ѹ҆по́льзѹетъ тѧ̀ па́че не́жели зла́то.

¹⁵Затворѝ ми́лостыню во клѣ́техъ твои́хъ, и҆ та̀ и҆́зметъ тѧ̀ ѿ всѧ́кагѡ ѡ҆ѕлобле́нїѧ:

¹⁶па́че щита̀ тве́рда и҆ па́че копїѧ̀ тѧ́жка, проти́вѹ врагѹ̀ побо́ретъ по тебѣ̀.

¹⁷Мѹ́жъ бла́гъ спорѹ́чникъ бѹ́детъ и҆́скреннемѹ, и҆ погѹби́вый сты́дъ ѡ҆ста́витъ є҆го̀.

¹⁸Благода҄ти спорѹ́чника не забѹ́ди: даде́ бо дѹ́шѹ свою̀ за тѧ̀.

¹⁹До́брое порѹче́нїе ѿвраща́етъ грѣ́шникъ, неблагода́рный же мы́слїю ѡ҆ста́витъ и҆зба́вльшаго и҆̀.

²⁰Порѹче́нїе мно́гихъ погѹбѝ благоѹправлѧ́ющихъ и҆ поколеба̀ и҆̀хъ ѩ҆́кѡ волна̀ морска́ѧ:

²¹мѹ́жы си҄льны преселѝ, и҆ заблѹди́ша во ѩ҆зы́цѣхъ чѹжди́хъ.

²²Грѣ́шникъ въ порѹче́нїе впа́даетъ, и҆ гонѧ́й дѣла̀ чѹжда҄ѧ впаде́тъ въ сѹды̀.

²³Застѹпѝ и҆́скреннѧго по си́лѣ твое́й, и҆ внима́й себѣ̀, да не впаде́ши.

²⁴Нача́ло житїѧ̀ человѣ́ча вода̀ и҆ хлѣ́бъ, и҆ ри́за и҆ до́мъ покрыва́ѧй стѹ́дъ.

²⁵Лѹ́чше житїѐ ни́щагѡ под̾ кро́вомъ берве́ннымъ, не́жели бра҄шна дѡбра̀ въ чѹжди́хъ.

²⁶Ѡ҆ ма́лѣ и҆ ѡ҆ вели́цѣ дово́ленъ бѹ́ди.

²⁷Живо́тъ ѕо́лъ и҆з̾ до́мѹ въ до́мъ, и҆ а҆́може пресели́шисѧ, не ѿве́рзеши ѹ҆́стъ свои́хъ:

²⁸ѹ҆гости́ши и҆ напои́ши неблагода́рныхъ, и҆ къ си҄мъ ѕло̀ ѹ҆слы́шиши:

²⁹пристѹпѝ, прише́лче, ѹ҆красѝ трапе́зѹ, и҆ а҆́ще что̀ въ рѹцѣ̀ твое́й, ѹ҆хлѣ́би мѧ̀:

³⁰и҆зы́ди, прише́лче, ѿ лица̀ сла́вы, прїи́де бо мнѣ̀ въ гѡ́сти бра́тъ, и҆ потре́ба до́мѹ.

³¹Тѧжка҄ сїѧ҄ человѣ́кѹ и҆мѹ́щѹ ра́зѹмъ, запреще́нїе хра́мины и҆ поноше́нїе заимода́вца.