Read Библия Церковнославянская Сiрахъ 3 Bible Online

Сiрахъ 3 - Библия Церковнославянская bible

Сiрахъ 3

¹Менѐ ѻ҆тца̀ послѹ́шайте, ча҄да, и҆ си́це твори́те, да спасе́тесѧ:

²гд҇ь бо просла́ви ѻ҆тца̀ на ча́дѣхъ и҆ сѹ́дъ ма́тере ѹ҆твердѝ на сынѣ́хъ.

³Чты́й ѻ҆тца̀ ѡ҆чи́ститъ грѣхѝ,

⁴и҆ ѩ҆́кѡ сокро́вищствѹѧй прославлѧ́ѧй ма́терь свою̀.

⁵Чты́й ѻ҆тца̀ возвесели́тсѧ ѡ҆ ча́дѣхъ и҆ въ де́нь мольбы̀ своеѧ̀ ѹ҆слы́шанъ бѹ́детъ.

⁶Прославлѧ́ѧй ѻ҆тца̀ долгоде́нствовати бѹ́детъ, и҆ послѹ́шаѧй гд҇а ѹ҆поко́итъ ма́терь свою̀.

⁷Боѧ́йсѧ гд҇а почти́тъ ѻ҆тца̀ и҆ ѩ҆́кѡ влады́камъ послѹ́житъ роди́вшымъ є҆го̀.

⁸Дѣ́ломъ и҆ сло́вомъ чтѝ ѻ҆тца̀ твоего̀ и҆ ма́терь, да на́йдетъ тѝ благослове́нїе ѿ ни́хъ.

⁹Благослове́нїе бо ѻ҆́тчее ѹ҆твержда́етъ до́мы ча҄дъ, клѧ́тва же ма́тернѧ и҆скоренѧ́етъ до ѡ҆снова́нїѧ.

¹⁰Не сла́висѧ въ безче́стїи ѻ҆тца̀ твоегѡ̀, нѣ́сть бо тѝ сла́ва ѻ҆́тчее безче́стїе:

¹¹сла́ва бо человѣ́кѹ ѿ че́сти ѻ҆тца̀ є҆гѡ̀, и҆ поноше́нїе ча́дѡмъ ма́ти въ безсла́вїи.

¹²Ча́до, застѹпѝ въ ста́рости ѻ҆тца̀ твоего̀ и҆ не ѡ҆скорбѝ є҆го̀ въ животѣ̀ є҆гѡ̀:

¹³а҆́ще и҆ ра́зѹмомъ ѡ҆скѹдѣва́етъ, проще́нїе и҆мѣ́й и҆ не ѡ҆безче́сти є҆го̀ все́ю крѣ́постїю твое́ю.

¹⁴Ми́лость бо ѻ҆́тча не забве́на бѹ́детъ, и҆ проти́вѹ грѣхѡ́въ присози́ждетсѧ тебѣ̀:

¹⁵въ де́нь ско́рби твоеѧ̀ воспомѧ́нетъ тѧ̀: ѩ҆́коже ле́дъ ѿ зно́ѧ, та́кѡ раста́ютъ грѣсѝ твоѝ.

¹⁶Ко́ль хѹ́ленъ ѡ҆ставлѧ́ѧй ѻ҆тца̀, и҆ про́клѧтъ гд҇емъ раздража́ѧй ма́терь свою̀.

¹⁷Ча́до, въ кро́тости дѣла̀ твоѧ҄ препровожда́й, и҆ человѣ́комъ прїѧ́тнымъ возлю́бленъ бѹ́деши.

¹⁸Е҆ли́кѡ вели́къ є҆сѝ, толи́кѡ смирѧ́йсѧ, и҆ пред̾ гд҇емъ ѡ҆брѧ́щеши благода́ть.

¹⁹Мно́зи сѹ́ть высо́цы и҆ сла́вни: но крѡ́ткимъ ѿкрыва́ютсѧ та҄йны,

²⁰ѩ҆́кѡ ве́лїѧ си́ла гд҇нѧ, и҆ смире́нными сла́витсѧ.

²¹Вы́шшихъ себє̀ не и҆щѝ и҆ крѣ́пльшихъ себє̀ не и҆спытѹ́й.

²²ѩ҆̀же тѝ повєлѣ́нна, сїѧ҄ разѹмѣва́й: нѣ́сть бо тѝ потре́ба та́йныхъ.

²³Во и҆збы́тцѣхъ дѣ́лъ твои́хъ не любопы́тствѹй: вѧ҄щшаѧ бо ра́зѹма человѣ́ческагѡ пока҄зана тѝ сѹ́ть:

²⁴мнѡ́ги бо прельстѝ мнѣ́нїе и҆́хъ, и҆ мнѣ́нїе лѹка́вно погѹбѝ мы́сль и҆́хъ.

²⁵И҆ любѧ́й бѣ́дство впаде́тъ въ нѐ:

²⁶се́рдце же́стоко ѡ҆ѕло́битсѧ на послѣ́докъ:

²⁷се́рдце же́стоко ѡ҆тѧготи́тсѧ болѣ́зньми, и҆ грѣ́шникъ приложи́тъ грѣхѝ на грѣхѝ.

²⁸Въ наведе́нїи велича́вагѡ нѣ́сть и҆зцѣле́нїѧ: са́дъ бо лѹка́вствїѧ вкорени́сѧ въ не́мъ.

²⁹Се́рдце разѹми́вагѡ ѹ҆разѹмѣ́етъ при́тчѹ, и҆ ѹ҆́хо слы́шателѧ вожделѣ́нїе премѹ́драгѡ.

³⁰Ѻ҆́гнь горѧ́щь ѹ҆гаси́тъ вода̀, и҆ ми́лостынѧ ѡ҆чи́ститъ грѣхѝ.

³¹Воздаѧ́й благода҄ти по́мнимь быва́етъ по си́хъ и҆ во вре́мѧ паде́нїѧ своегѡ̀ ѡ҆брѧ́щетъ ѹ҆твержде́нїе.