Read Библия Церковнославянская Сiрахъ 30 Bible Online

Сiрахъ 30 - Библия Церковнославянская bible

Сiрахъ 30

¹Любѧ́й сы́на своего̀ ѹ҆части́тъ є҆мѹ̀ ра҄ны, да возвесели́тсѧ въ послѣ҄днѧѧ своѧ҄.

²Наказѹ́ѧй сы́на своего̀ наслади́тсѧ ѡ҆ не́мъ и҆ посредѣ̀ зна́емыхъ ѡ҆ не́мъ похва́литсѧ.

³Ѹ҆ча́й сы́на своего̀ раздражи́тъ врага̀ и҆ пред̾ дрѹ́ги ѡ҆ не́мъ возра́дѹетсѧ.

⁴Ѹ҆́мре ѻ҆те́цъ є҆гѡ̀, и҆ а҆́ки не ѹ҆́мре: подо́бна бо себѣ̀ ѡ҆ста́ви по себѣ̀.

⁵Во житїѝ свое́мъ ви́дѣ и҆ возвесели́сѧ ѡ҆ не́мъ и҆ при кончи́нѣ свое́й не ѡ҆скорби́сѧ:

⁶проти́вѹ врагѡ́мъ ѡ҆ста́ви ме́стника и҆ дрѹгѡ́мъ воздаю́ща благода́ть.

⁷Ѹ҆гожда́ѧй сы́нѹ ѡ҆бѧ́жетъ стрѹ́пы є҆гѡ̀, и҆ ѡ҆ всѧ́цѣмъ во́пли возмѧте́тсѧ ѹ҆тро́ба є҆гѡ̀.

⁸Ко́нь неѹкроще́нъ свирѣ́пъ быва́етъ, и҆ сы́нъ самово́льный проде́рзъ бѹ́детъ.

⁹Ласка́й ча́до, и҆ ѹ҆страши́тъ тѧ̀, и҆гра́й съ ни́мъ, и҆ ѡ҆печа́литъ тѧ̀.

¹⁰Не смѣ́йсѧ съ ни́мъ, да не поболи́ши ѡ҆ не́мъ и҆ на послѣ́докъ сти́снеши зѹ́бы твоѧ҄.

¹¹Не да́ждь є҆мѹ̀ вла́сти въ ю҆́ности и҆ не пре́зри невѣ́дѣнїѧ є҆гѡ̀:

¹²слѧцы̀ вы́ю є҆гѡ̀ въ ю҆́ности и҆ сокрѹшѝ ре́бра є҆гѡ̀, до́ндеже мла́дъ є҆́сть, да не когда̀ ѡ҆жестѣ́въ не покори́ттисѧ.

¹³Накажѝ сы́на твоего̀ и҆ дѣ́лай и҆́мъ, да не въ безстѹ́дїи є҆гѡ̀ поткне́шисѧ.

¹⁴Лѹ́чше ни́щь здра́въ и҆ крѣ́покъ въ си́лѣ свое́й, не́жели бога́тъ ѹ҆ра́ненъ тѣ́ломъ свои́мъ.

¹⁵Здра́вїе и҆ крѣ́пость лѹ́чше є҆́сть всѧ́кагѡ зла́та, и҆ тѣ́ло здра́вое, не́жели бога́тство безчи́сленное.

¹⁶Нѣ́сть бога́тство лѹ́чше здра́вїѧ тѣле́снагѡ, и҆ нѣ́сть весе́лїе па́че ра́дости серде́чныѧ.

¹⁷Лѹ́чше є҆́сть сме́рть па́че живота̀ го́рька и҆лѝ недѹ́га до́лгагѡ.

¹⁸Блага҄ѧ и҆злїѧ҄ннаѧ пред̾ ѹ҆сты҄ затворе́нными предложє́нїѧ бра́шенъ предлежа҄щаѧ ѹ҆ гро́ба.

¹⁹Ка́ѧ по́льза їдѡлѹ ѿ же́ртвы; не и҆́мать бо ѩ҆́сти, ни ѡ҆бонѧ́ти:

²⁰та́кѡ гони́мый ѿ гд҇а,

²¹зрѧ́й ѻ҆чи́ма и҆ стенѧ́й, ѩ҆́коже є҆ѵнѹ́хъ ѡ҆сѧза́ѧй дѣви́цѹ и҆ воздыха́ѧй.

²²Не вда́ждь въ печа́ль дѹ́шѹ твою̀ и҆ не ѡ҆скорбѝ себѐ совѣ́томъ твои́мъ.

²³Весе́лїе се́рдца живо́тъ человѣ́ка, и҆ ра́дованїе мѹ́жа долгоде́нствїе.

²⁴Любѝ дѹ́шѹ твою̀ и҆ ѹ҆тѣша́й се́рдце твоѐ, и҆ печа́ль ѿ себє̀ ѿри́ни дале́че:

²⁵мнѡ́ги бо печа́ль ѹ҆бѝ, и҆ нѣ́сть по́льзы въ не́й.

²⁶Рве́нїе и҆ ѩ҆́рость ѹ҆малѧ́ютъ дни҄, и҆ печа́ль пре́жде вре́мене ста́рость наво́дитъ.

²⁷Свѣ́тло се́рдце и҆ бла́го ѡ҆ бра́шнѣ и҆ ѡ҆ ѩ҆́ди свое́й попече́тсѧ.