Read Библия Церковнославянская Сiрахъ 31 Bible Online

Сiрахъ 31 - Библия Церковнославянская bible

Сiрахъ 31

¹Бдѣ́нїе бога́тства растлева́етъ плѡ́ти, и҆ попече́нїе є҆гѡ̀ ѿго́нитъ со́нъ:

²печа́ль бдѣ́нїѧ ѿторга́етъ дрема́нїе, и҆ недѹ́гъ лю́тъ ѿима́етъ со́нъ.

³Трѹди́тсѧ бога́тый въ собира́нїи бога́тства и҆ въ поко́и насыща́етсѧ сла́достей свои́хъ:

⁴трѹди́тсѧ ѹ҆бо́гїй во ѹ҆мале́нїи житїѧ̀, и҆ въ поко́и скѹ́дный быва́етъ.

⁵Любѧ́й зла́то не ѡ҆правди́тсѧ, и҆ гонѧ́й растлѣ́нїе си́мъ насы́титсѧ.

⁶Мно́зи падо́ша зла́та ра́ди, и҆ бы́сть па́гѹба и҆́хъ прѧ́мѡ лицѹ̀ и҆́хъ.

⁷Дре́во претыка́нїѧ є҆́сть всѣ҄мъ жрѹ́щымъ є҆мѹ̀, и҆ всѧ́къ безѹ́мливъ ѩ҆́тъ бѹ́детъ и҆́мъ.

⁸Блаже́нъ бога́тый, и҆́же ѡ҆брѣ́тесѧ без̾ поро́ка и҆ и҆́же в̾слѣ́дъ зла́та не и҆́де.

⁹Кто̀ є҆́сть се́й; и҆ ѹ҆блажи́мъ є҆го̀, сотвори́ бо ди҄внаѧ въ лю́дехъ свои́хъ.

¹⁰Кто̀ и҆скѹше́нъ и҆́мъ и҆ соверше́нъ бы́сть; и҆ бѹ́детъ на похвале́нїе.

¹¹Кто̀ мо́глъ престѹпи́ти, и҆ не престѹпѝ, и҆ ѕло̀ сотвори́ти, и҆ не сотворѝ;

¹²Ѹ҆твердѧ́тсѧ блага҄ѧ є҆гѡ̀, и҆ ми́лѡстыни є҆гѡ̀ и҆сповѣ́сть собра́нїе.

¹³Сѣ́лъ ли є҆сѝ при трапе́зѣ вели́цѣй, не разве́рзи на не́й горта́ни твоегѡ̀

¹⁴и҆ не рцы̀: мно́гѡ на не́й є҆́сть. Помѧнѝ, ѩ҆́кѡ ѕло̀ є҆́сть ѻ҆́ко лѹка́во.

¹⁵Лѹка́внѣе ѻ҆́ка что̀ є҆́сть со́здано; сегѡ̀ ра́ди ѡ҆ ко́ей либо ве́щи слези́тъ.

¹⁶И҆дѣ́же а҆́ще ѹ҆́зриши, не простира́й рѹкѝ и҆ не гнѣти́сѧ съ ни́мъ въ соли́ло.

¹⁷Разсѹжда́й, ѩ҆̀же сѹ́ть и҆́скреннѧгѡ, ѿ тебє̀ сама́гѡ, и҆ ѡ҆ всѧ́цѣй ве́щи размышлѧ́й.

¹⁸ѩ҆́ждь ѩ҆́кѡ человѣ́къ предлежа́щее тѝ и҆ не пресыща́йсѧ, да не возненави́дѣнъ бѹ́деши.

¹⁹Преста́ни пе́рвый ра́ди наказа́нїѧ и҆ не пресыща́йсѧ, да не преткне́шисѧ:

²⁰и҆ а҆́ще сѧ́деши посредѣ̀ мно́гихъ, пе́рвѣе и҆́хъ не прострѝ рѹкѝ твоеѧ̀.

²¹Ко́ль дово́лно человѣ́кѹ нака́занномѹ ма́лое, и҆ на ѻ҆дрѣ̀ свое́мъ не постра́ждетъ ѕла̀.

²²Со́нъ здра́вый ѿ чре́ва ѹ҆мѣ́ренна: воста̀ заѹ́тра, и҆ дѹша̀ є҆гѡ̀ съ ни́мъ:

²³трѹ́дъ бдѣ́нїѧ и҆ холе́ра и҆ чревоболѣ́нїе съ мѹ́жемъ ненасы́тнымъ.

²⁴И҆ а҆́ще ѡ҆тѧготи́лсѧ є҆сѝ бра́шны, воста́ни ѿ трапе́зы и҆ почі́еши.

²⁵Послѹ́шай менѐ, ча́до, и҆ не ѹ҆ничижѝ менѐ, и҆ на послѣ́докъ ѡ҆брѧ́щеши словеса̀ моѧ҄.

²⁶Во всѣ́хъ дѣ́лѣхъ твои́хъ бѹ́ди тща́теленъ, и҆ всѧ́къ недѹ́гъ не и҆́мать пристѹпи́ти къ тебѣ̀.

²⁷Ще́драго хлѣ́бами благословѧ́тъ ѹ҆стнѣ̀, и҆ послѹ́шество добро́ты є҆гѡ̀ вѣ́рно.

²⁸На скѹпа́го въ хлѣ́бѣхъ поро́пщетъ гра́дъ, и҆ послѹ́шество ѕло́бы є҆гѡ̀ и҆звѣ́стно.

²⁹Въ вїнѣ̀ не мѹжа́йсѧ, мно́гихъ бо погѹбѝ вїно̀.

³⁰Пе́щь и҆скѹша́етъ желѣ́зо въ кале́нїи, та́кѡ вїно̀ сердца̀ го́рдыхъ во пїѧ́нствѣ.

³¹Поле́зно вїно̀ животѹ̀ человѣ́чѹ, а҆́ще пїе́ши є҆̀ въ мѣ́рѹ є҆гѡ̀.

³²Кі́й живо́тъ побѣжда́емомѹ вїно́мъ; сїе́ бо на весе́лїе человѣ́кѡмъ со́здано є҆́сть.

³³Ра́дованїе се́рдца и҆ весе́лїе дѹшѝ вїно̀ пїе́мо во вре́мѧ прили́чно:

³⁴го́ресть дѹшѝ вїно̀ пїе́мо мно́го въ ра́спри и҆ клеветѣ̀:

³⁵ѹ҆множа́етъ пїѧ́нство ѩ҆́рость безѹ́мнагѡ на претыка́нїе, ѹ҆малѧ́ѧ крѣ́пость и҆ сотворѧ́ѧ стрѹ҄пїѧ.

³⁶Въ пи́рѣ вїна̀ не ѡ҆блича́й и҆́скреннѧго и҆ не ѹ҆ничижѝ є҆го̀ въ весе́лїи є҆гѡ̀:

³⁷словесѐ поно́сна не рцы̀ є҆мѹ̀ и҆ не ѡ҆скорбѝ є҆го̀ во и҆стѧза́нїи.