Read Библия Церковнославянская Сiрахъ 32 Bible Online

Сiрахъ 32 - Библия Церковнославянская bible

Сiрахъ 32

¹Старѣ́йшинѹ ли тѧ̀ поста́виша, не возноси́сѧ, но бѹ́ди въ ни́хъ ѩ҆́кѡ є҆ди́нъ ѿ ни́хъ:

²попецы́сѧ и҆́ми, и҆ та́кѡ сѧ́ди. И҆ всю̀ потре́бѹ твою̀ сотвори́въ возлѧ́зи,

³да возвесели́шисѧ и҆́хъ ра́ди и҆ красоты̀ ра́ди прїи́меши вѣне́цъ.

⁴Глаго́ли, старѣ́йшино, подоба́етъ бо тѝ,

⁵и҆спы́тною хи́тростїю и҆ не возбранѝ мѹсїкі́и:

⁶и҆дѣ́же слѹ́шанїе (бѹ́детъ), не и҆злива́й бесѣ́ды и҆ без̾ вре́мене не мѹдри́сѧ.

⁷Печа́ть а҆нѳра́ѯа на ѹ҆краше́нїи зла́тѣ, и҆ сладкогла́сїе мѹсїкі́євъ въ пи́ршествѣ вїна̀.

⁸Во ѹ҆краше́нїи златѣ́мъ печа́ть смара́гдова, сладкопѣ́нїе мѹсїкі́євъ по сла́дцѣмъ вїнѣ̀.

⁹Глаго́ли, ю҆́ноше, а҆́ще тебѣ̀ є҆́сть потре́ба, є҆два̀ два́щи, а҆́ще вопроше́нъ бѹ́деши:

¹⁰сократѝ сло́во, ма́лыми мнѡ́гаѧ (и҆зглаго́ли): бѹ́ди ѩ҆́кѡ вѣ́дый и҆ вкѹ́пѣ молчѧ̀.

¹¹Посредѣ̀ вельмо́жъ не ра́венъ твори́сѧ и҆ и҆но́мѹ глаго́лющѹ не многосло́ви.

¹²Пре́жде гро́ма предварѧ́етъ мо́лнїѧ, и҆ пре́жде стыдли́вагѡ предварѧ́етъ благода́ть.

¹³Во вре́мѧ востава́й, а҆ не послѣдѝ (и҆ны́хъ), въ до́мъ ѿидѝ и҆ не лѣни́сѧ:

¹⁴та́мѡ и҆гра́й и҆ творѝ помышлє́нїѧ твоѧ҄, и҆ не согрѣша́й сло́вомъ го́рдымъ.

¹⁵И҆ ѡ҆ си́хъ благословѝ сотво́ршаго тѧ̀ и҆ ѹ҆поева́ющаго тѧ̀ ѿ бл҃гъ свои́хъ.

¹⁶Боѧ́йсѧ гд҇а прїи́метъ наказа́нїе, и҆ ѹ҆́тренюющїи ѡ҆брѧ́щѹтъ бл҃говоле́нїе.

¹⁷И҆ща́й зако́на насы́титсѧ є҆гѡ̀, и҆ лицемѣ́рствѹѧй соблазни́тсѧ ѡ҆ не́мъ.

¹⁸Боѧ́щїисѧ гд҇а ѡ҆брѧ́щѹтъ сѹ́дъ и҆ ѡ҆правда҄нїѧ ѩ҆́кѡ свѣ́тъ возжгѹ́тъ.

¹⁹Человѣ́къ грѣ́шникъ ѹ҆кланѧ́етсѧ ѿ ѡ҆бличе́нїѧ и҆ по во́ли свое́й ѡ҆брѣта́етъ и҆звине́нїе.

²⁰Мѹ́жъ совѣ́тный не пре́зритъ размышле́нїѧ, чѹжды́й же и҆ го́рдый не ѹ҆бои́тсѧ стра́ха и҆ по сотворе́нїи свое́мъ без̾ совѣ́та.

²¹Без̾ совѣ́та ничесо́же творѝ, и҆ є҆гда̀ сотвори́ши, не раскаѧва́йсѧ.

²²На пѹтѝ паде́нїѧ не ходѝ и҆ не претыка́йсѧ ѡ҆ ка́менїе:

²³не вѣ́рѹй пѹтѝ, въ не́мже не претыка́ешисѧ, и҆ ѿ ча҄дъ свои́хъ храни́сѧ.

²⁴Во всѧ́цѣмъ дѣ́лѣ бла́зѣ вѣ́рѹй дѹше́ю твое́ю, и҆́бо сїѐ є҆́сть соблюде́нїе за́повѣдїй.

²⁵Вѣ́рѹѧй зако́нѹ внима́етъ за́повѣдемъ, и҆ ѹ҆пова́ѧй на гд҇а не ѹ҆ма́литсѧ.