Read Библия Церковнославянская Сiрахъ 33 Bible Online

Сiрахъ 33 - Библия Церковнославянская bible

Сiрахъ 33

¹Боѧ́щагосѧ гд҇а не срѧ́щетъ ѕло̀: а҆́ще и҆ въ напа́сть впаде́тъ, па́ки и҆́зметъ є҆го̀.

²Мѹ́жъ премѹ́дръ не возненави́дитъ зако́на, сѹмнѧ́йжесѧ въ не́мъ ѩ҆́коже въ бѹ́ри кора́бль.

³Человѣ́къ разѹми́въ вѣ́рѹ и҆́метъ зако́нѹ, и҆ зако́нъ є҆мѹ̀ вѣ́ренъ,

⁴ѩ҆́кѡ вопроше́нїе пра́ведныхъ. Пригото́ви сло́во, и҆ та́кѡ ѹ҆слы́шанъ бѹ́деши: сочета́й наказа́нїе и҆ тогда̀ ѿвѣща́й.

⁵Ко́ло колесни́чное ѹ҆тро́ба бѹ́ѧгѡ, и҆ ѩ҆́коже ѻ҆́сь вертѧ́щаѧсѧ помышле́нїе є҆гѡ̀.

⁶Ко́нь на ѩ҆жде́нїи ѩ҆́кѡ дрѹ́гъ лицемѣ́ренъ, под̾ всѧ́кимъ ѩ҆здѧ́щимъ рже́тъ.

⁷Почто̀ де́нь днѐ преспѣва́етъ, и҆ всѧ́къ свѣ́тъ днѐ лѣ́та ѿ со́лнца;

⁸Ра́зѹмомъ гд҇нимъ разлѹчи́стасѧ, и҆ и҆змѣнѝ вре́мѧ и҆ пра́здники:

⁹ѿ ни́хъ вознесѐ и҆ ѡ҆ст҃ѝ, и҆ ѿ ни́хъ положѝ въ число̀ дні́й.

¹⁰И҆ человѣ́цы всѝ ѿ пе́рсти, и҆ ѿ землѝ со́зданъ бы́сть а҆да́мъ.

¹¹Мно́жествомъ вѣ́дѣнїѧ гд҇ь раздѣлѝ ѧ҆̀ и҆ и҆змѣнѝ пѹти҄ и҆́хъ.

¹²Ѿ ни́хъ блг҇вѝ и҆ вознесѐ, и҆ ѿ ни́хъ ѡ҆ст҃ѝ и҆ къ себѣ̀ прибли́жи, ѿ ни́хъ проклѧ̀ и҆ смирѝ и҆ совратѝ и҆̀хъ ѿ стоѧ́нїѧ и҆́хъ.

¹³ѩ҆́кѡ бре́нїе скѹде́льника въ рѹцѣ̀ є҆гѡ̀, всѝ пѹтїѐ є҆гѡ̀ по и҆зволе́нїю є҆гѡ̀: та́кѡ человѣ́цы въ рѹцѣ̀ сотво́ршагѡ и҆̀хъ, и҆́мже возда́стъ по сѹдѹ̀ своемѹ̀.

¹⁴(ѩ҆́кѡ) проти́вѹ ѕло́мѹ благо́е и҆ проти́вѹ сме́рти живо́тъ, та́кѡ проти́вѹ благочести́вагѡ грѣ́шникъ. И҆ си́це воззрѝ во всѧ҄ дѣла̀ вы́шнѧгѡ: дво́е дво́е, є҆ди́но проти́вѹ є҆ди́номѹ.

¹⁵А҆́зъ же послѣ́днїй бдѣ́хъ и҆ наслѣ́дихъ ѩ҆́коже ѿ нача́тка, ѩ҆́коже собира́ѧй в̾слѣ́дъ ѡ҆б̾има́телей вїногра́дныхъ.

¹⁶Во блг҇ве́нїе гд҇не достиго́хъ и҆ ѩ҆́кѡ ѡ҆б̾има́тель напо́лнихъ точи́ло.

¹⁷Разсмотри́те, ѩ҆́кѡ не себѣ̀ є҆ди́номѹ трѹди́хсѧ, но всѣ҄мъ и҆́щѹщымъ наказа́нїѧ.

¹⁸Послѹ́шайте менѐ, вельмѡ́жи люді́й, и҆ вла́стелїе собо́ра, внѹши́те.

¹⁹Сы́нѹ и҆ женѣ̀, бра́тѹ и҆ дрѹ́гѹ не да́ждь вла́сти на себѣ̀ въ животѣ̀ свое́мъ,

²⁰и҆ не да́ждь и҆но́мѹ и҆мѣ́нїѧ своегѡ̀, да не раска́ешисѧ тре́бѹѧй и҆̀хъ:

²¹до́ндеже жи́въ є҆сѝ и҆ дыха́нїе въ тебѣ̀, не и҆змѣнѝ себѐ всѧ́цѣй пло́ти:

²²лѹ́чше бо є҆́сть, да тебѣ̀ мо́лѧтсѧ ча҄да твоѧ҄, не́жели тебѣ̀ зрѣ́ти въ рѹ́цѣ ча҄дъ твои́хъ.

²³Во всѣ́хъ дѣ́лѣхъ твои́хъ бѹ́ди преспѣва́ѧ и҆ не да́ждь поро́ка на сла́вѹ твою̀.

²⁴Въ де́нь сконча́нїѧ дні́й живота̀ твоегѡ̀ и҆ во вре́мѧ сме́рти твоеѧ̀ раздѣлѝ наслѣ́дїе твоѐ.

²⁵Пи́ща и҆ же́злїе и҆ бре́мѧ ѻ҆слѹ̀: хлѣ́бъ и҆ наказа́нїе и҆ дѣ́ло рабѹ̀.

²⁶Накажѝ раба̀, и҆ ѡ҆брѧ́щеши поко́й: ѡ҆сла́би рѹ́кѹ є҆мѹ̀, и҆ и҆ска́ти на́чнетъ свобо́ды.

²⁷И҆́го и҆ реме́нь вы́ю прекланѧ́ютъ, и҆ рабѹ̀ лѹка́вѹ ѹ҆́зы и҆ ра҄ны.

²⁸Вложѝ є҆го̀ въ дѣ́ло, да не пра́зденъ бѹ́детъ, мно́зѣй бо ѕло́бѣ наѹчи́ла пра́здность:

²⁹ѹ҆стро́й є҆го̀ въ дѣ́лѣхъ, ѩ҆́коже подоба́етъ є҆мѹ̀, и҆ а҆́ще не послѹ́шаетъ, всадѝ є҆го̀ во ѡ҆кѡ́вы.

³⁰И҆ не бѹ́ди и҆зли́шенъ над̾ всѧ́кою пло́тїю, и҆ без̾ сѹда̀ не сотворѝ ничесѡ́же.

³¹А҆́ще тѝ є҆́сть ра́бъ, да бѹ́детъ ѩ҆́коже ты̀, поне́же кро́вїю стѧжа́лъ є҆сѝ є҆го̀:

³²а҆́ще тѝ є҆́сть ра́бъ, и҆мѣ́й є҆го̀ ѩ҆́коже бра́та, поне́же ѩ҆́кѡ дѹшѝ твоеѧ̀ востре́бѹеши є҆гѡ̀:

³³а҆́ще ѡ҆ѕло́биши є҆го̀ непра́веднѡ, и҆ воста́въ ѿбѣжи́тъ, кі́имъ пѹте́мъ пои́щеши є҆гѡ̀; (не вѣ́си.)