Read Библия Церковнославянская Сiрахъ 34 Bible Online

Сiрахъ 34 - Библия Церковнославянская bible

Сiрахъ 34

¹Тщє́тны надє́жды и҆ лжи҄вы (сѹ́ть) неразѹ́мивѹ мѹ́жѹ, и҆ сѡ́нїѧ вперѧ́ютъ безѹ́мныхъ.

²ѩ҆́коже є҆́млѧйсѧ за стѣ́нь и҆ гонѧ́й вѣ́тры, та́кожде є҆́млѧй вѣ́рѹ снѡ́мъ:

³сїѐ по семѹ̀ видѣ́нїе снѡ́въ, прѧ́мѡ лицѹ̀ подо́бїе лица̀.

⁴Ѿ нечи́стагѡ что̀ ѡ҆чи́ститсѧ, и҆ ѿ лжи́вагѡ ка́ѧ и҆́стина;

⁵Волшє́бства и҆ ѡ҆баѧ҄нїѧ и҆ сѡ́нїѧ сѹ́єтна сѹ́ть, и҆ ѩ҆́коже ражда́ющїѧ се́рдцѹ мечта҄нїѧ быва́ютъ:

⁶а҆́ще не ѿ вы́шнѧгѡ пѡ́слана бѹ́дѹтъ на посѣще́нїе, не вда́ждь въ нѧ̀ се́рдца твоегѡ̀:

⁷мно́гихъ бо прельсти́ша сѡ́нїѧ, и҆ ѿпадо́ша надѣ́ющесѧ на нѧ̀.

⁸Без̾ лжѝ соверши́тсѧ зако́нъ, и҆ премѹ́дрость во ѹ҆стѣ́хъ вѣ́рныхъ соверше́нїе.

⁹Мѹ́жъ ѹ҆че́ный ѹ҆вѣ́да мно́гѡ, и҆ многоискѹ́сный повѣ́сть ра́зѹмъ.

¹⁰И҆́же не и҆скѹси́сѧ, ма́лѡ вѣ́сть: ѡ҆бходѧ́й же страны҄ ѹ҆мно́житъ хи́трость.

¹¹Мно́гѡ ви́дѣхъ во ѡ҆бхожде́нїи мое́мъ, и҆ вѧ҄щшаѧ слове́съ мои́хъ ра́зѹмъ мо́й:

¹²мно́гащи да́же до сме́рти бѣ́дствовахъ, и҆ спасе́нъ бы́хъ си́хъ ра́ди.

¹³Дѹ́хъ боѧ́щихсѧ гд҇а поживе́тъ, наде́жда бо и҆́хъ на сп҃са́ющаго ѧ҆̀.

¹⁴Боѧ́йсѧ гд҇а ни чегѡ̀ ѹ҆бои́тсѧ и҆ не ѹ҆страши́тсѧ, то́й бо наде́жда є҆мѹ̀.

¹⁵Боѧ́щемѹсѧ гд҇а блаже́нна дѹша̀: чи́мъ ѡ҆держи́тсѧ, и҆ кто̀ є҆мѹ̀ ѹ҆твержде́нїе;

¹⁶Ѻ҆́чи гд҇ни на лю́бѧщыѧ є҆го̀: защище́нїе си́лы и҆ ѹ҆твержде́нїе крѣ́пости, покро́въ ѿ ва́ра и҆ покро́въ въ полѹ́дне, хране́нїе ѿ претыка́нїѧ и҆ по́мощь ѿ паде́нїѧ:

¹⁷воздвиза́ѧй дѹ́шѹ и҆ просвѣща́ѧй ѻ҆́чи, и҆зцѣле́нїе даѧ́й, живо́тъ и҆ блг҇ве́нїе.

¹⁸И҆́же прино́ситъ же́ртвѹ ѿ непра́вды, приноше́нїе поро́чно, и҆ не сѹ́ть во благоволе́нїе да́ры беззако́нныхъ.

¹⁹Не бл҃говоли́тъ вы́шнїй ѡ҆ приноше́нїи нечести́выхъ, ни мно́жествомъ же́ртвъ ѡ҆ч҇титъ грѣхѝ.

²⁰ѩ҆́кѡ жрѧ́й сы́на пред̾ ѻ҆тце́мъ є҆гѡ̀, та́кѡ приносѧ́й жє́ртвы ѿ и҆мѣ́нїѧ ѹ҆бо́гихъ.

²¹Хлѣ́бъ ѹ҆бѡ́гимъ живо́тъ ѹ҆бо́гихъ, лиша́ѧй є҆гѡ̀ человѣ́къ крове́й є҆́сть.

²²Ѹ҆бива́етъ и҆́скреннѧго ѿе́млѧй є҆мѹ̀ поживле́нїе, и҆ пролива́етъ кро́вь лиша́ѧй мзды̀ нае́мника.

²³Е҆ди́нъ созида́ѧй, а҆ дрѹгі́й разорѧ́ѧй, что̀ ѹ҆спѣ́етъ бо́лѣе, то́кмѡ трѹ́дъ;

²⁴Е҆ди́номѹ молѧ́щѹсѧ, а҆ дрѹго́мѹ проклина́ющѹ, ко́егѡ гла́съ ѹ҆слы́шитъ влдка;

²⁵Ѡ҆мыва́ѧйсѧ ѿ мертвеца̀ и҆ па́ки прикаса́ѧйсѧ є҆мѹ̀, ка́ѧ по́льза є҆мѹ̀ ѿ ба́ни;

²⁶Та́кѡ человѣ́къ постѧ́йсѧ ѡ҆ грѣсѣ́хъ свои́хъ и҆ па́ки ходѧ́й и҆ та҄ѧжде творѧ́й, мольбѹ̀ є҆гѡ̀ кто̀ ѹ҆слы́шитъ, и҆ что̀ ѹ҆спѣ̀ смире́нїемъ свои́мъ;