Read Библия Церковнославянская Сiрахъ 35 Bible Online

Сiрахъ 35 - Библия Церковнославянская bible

Сiрахъ 35

¹Соблюда́ѧй зако́нъ ѹ҆множа́етъ приношє́нїѧ, прино́ситъ же́ртвѹ спасе́нїѧ внима́ѧй за́повѣдемъ.

²Воздаѧ́й благода́ть а҆́ки приносѧ́й семїда́лъ, и҆ творѧ́й ми́лостыню а҆́ки жрѧ́й же́ртвѹ хвале́нїѧ.

³Бл҃говоле́нїе гд҇не є҆́же ѿстѹпи́ти ѿ лѹка́вства, и҆ ѡ҆чище́нїе є҆́сть є҆́же ѿстѹпи́ти ѿ непра́вды.

⁴Не ѩ҆ви́сѧ пред̾ гд҇емъ то́щь: всѧ҄ бо сїѧ҄ за́повѣди ра́ди.

⁵Приноше́нїе пра́веднагѡ ѹ҆тѹчнѧ́етъ ѻ҆лта́рь, и҆ благоѹха́нїе є҆гѡ̀ пред̾ вы́шнимъ:

⁶же́ртва мѹ́жа пра́веднагѡ прїѧ́тна, и҆ па́мѧть є҆ѧ̀ не забве́на бѹ́детъ.

⁷Ѻ҆́комъ благи́мъ просла́ви гд҇а и҆ не ѹ҆ма́ли ѿ нача́тка рѹ́къ твои́хъ:

⁸во всѧ́цѣмъ даѧ́нїи ве́село и҆мѣ́й лицѐ твоѐ и҆ со весе́лїемъ ѡ҆свѧтѝ десѧти́нѹ.

⁹Да́ждь вы́шнемѹ по даѧ́нїю є҆гѡ̀, и҆ ѻ҆́комъ благи́мъ приѡбрѣ́тенїе рѹкѝ:

¹⁰ѩ҆́кѡ гд҇ь воздаѧ́й є҆́сть и҆ седмери́цею возда́стъ тѝ.

¹¹Да́ра не ѹ҆малѧ́й, и҆́бо не прїи́метъ, и҆ не внима́й же́ртвѣ непра́веднѣй:

¹²ѩ҆́кѡ гд҇ь сѹдїѧ̀ є҆́сть, и҆ нѣ́сть ѹ҆ негѡ̀ сла́вы лица̀.

¹³Не прїи́метъ лица̀ на ѹ҆бо́га и҆ моли́твѹ ѡ҆би́димагѡ ѹ҆слы́шитъ:

¹⁴не пре́зритъ моли́твы си́рагѡ, ни вдови́цы, є҆гда̀ и҆злїе́тъ проше́нїе.

¹⁵Не сле́зы ли вдови҄чи по лани́тома текѹ́тъ, и҆ во́пль є҆ѧ̀ на наве́дшаго ѧ҆̀;

¹⁶Слѹжа́й (бг҃ѹ) во благоволе́нїи прїѧ́тъ бѹ́детъ, и҆ моли́тва є҆гѡ̀ до ѡ҆́блакъ до́йдетъ:

¹⁷моли́тва смире́ннагѡ про́йде ѡ҆́блаки, и҆ до́ндеже прибли́житсѧ, не ѹ҆тѣ́шитсѧ,

¹⁸и҆ не ѿстѹ́питъ, до́ндеже посѣти́тъ вы́шнїй, сѹ́дитъ въ пра́вдѹ и҆ сотвори́тъ сѹ́дъ:

¹⁹и҆ гд҇ь не заме́длитъ, нижѐ и҆́мать долготерпѣ́ти ѡ҆ ни́хъ, до́ндеже сокрѹши́тъ чрє́сла неми́лостивыхъ.

²⁰И҆ ѩ҆зы́кѡмъ возда́стъ ме́сть, до́ндеже потреби́тъ мно́жество досади́телей и҆ ски́птры непра́ведныхъ сокрѹши́тъ:

²¹до́ндеже возда́стъ человѣ́кѹ по дѣѧ́нїємъ є҆гѡ̀, по дѣлѡ́мъ человѣ́чєскимъ и҆ помышле́нїємъ и҆́хъ:

²²до́ндеже разсѹ́дитъ сѹдо́мъ лю́ди своѧ҄ и҆ возвесели́тъ ѧ҆̀ мл҇тїю свое́ю.

²³Ко́ль красна̀ ми́лость во вре́мѧ ско́рби є҆гѡ̀, ѩ҆́коже ѡ҆́блацы дожде́внїи во вре́мѧ бездо́ждїѧ.