Read Библия Церковнославянская Сiрахъ 36 Bible Online

Сiрахъ 36 - Библия Церковнославянская bible

Сiрахъ 36

¹Поми́лѹй ны̀, влдко, бж҃е всѣ́хъ, и҆ воззрѝ,

²и҆ наложѝ стра́хъ тво́й на всѧ҄ ѩ҆зы́ки:

³воздви́гни рѹ́кѹ твою̀ на ѩ҆зы́ки чѹ҄жды, и҆ да ѹ҆́зрѧтъ си́лѹ твою̀.

⁴ѩ҆́коже пред̾ ни́ми ѡ҆ст҃и́лсѧ є҆сѝ въ на́съ, та́кожде пред̾ на́ми возвели́чисѧ на ни́хъ:

⁵и҆ да позна́ютъ тѧ̀, ѩ҆́коже и҆ мы̀ позна́хомъ тѧ̀, ѩ҆́кѡ нѣ́сть бг҃а ра́звѣ тебє̀, гд҇и.

⁶Ѡ҆бновѝ зна́мєнїѧ и҆ и҆змѣнѝ чѹдеса̀,

⁷просла́ви рѹ́кѹ и҆ мы́шцѹ деснѹ́ю (твою̀), воздви́гни ѩ҆́рость и҆ и҆злі́й гнѣ́въ,

⁸и҆змѝ сопоста́та и҆ сотрѝ врага̀,

⁹поспѣшѝ вре́мѧ и҆ помѧнѝ клѧ́твѹ, и҆ да повѣ́дѧтъ вели҄чїѧ твоѧ҄.

¹⁰Гнѣ́вомъ ѻ҆гнѧ̀ поѧде́нъ да бѹ́детъ спаса́ѧйсѧ, и҆ ѡ҆ѕлоблѧ́ющїи люді́й твои́хъ да ѡ҆брѧ́щѹтъ па́гѹбѹ.

¹¹Сокрѹшѝ главы҄ кнѧзе́й вра́жїихъ, глаго́лющихъ: нѣ́сть ра́звѣ на́съ.

¹²Соберѝ всѧ҄ кѡлѣ́на ї҆а҄кѡвлѧ и҆ наслѣ́дствѹй и҆̀хъ ѩ҆́коже ѿ нача́ла.

¹³Поми́лѹй лю́ди, гд҇и, нарѣчє́нныѧ и҆́менемъ твои́мъ, и҆ ї҆и҃лѧ, є҆го́же пе́рвенцемъ наре́клъ є҆сѝ.

¹⁴Ѹ҆ще́дри гра́дъ ст҃ы́ни твоеѧ̀, ї҆ер҇ли́мъ, мѣ́сто поко́ища твоегѡ̀.

¹⁵И҆спо́лни сїѡ́на взѧ́ти словеса̀ твоѧ҄, и҆ ѿ сла́вы твоеѧ̀ лю́ди твоѧ҄.

¹⁶Да́ждь свидѣ́телство сѹ́щымъ ѿ нача́ла тва́ремъ твои҄мъ и҆ воздви́гни про҇ро́чєствїѧ сѹ҄щаѧ ѡ҆ и҆́мени твое́мъ:

¹⁷да́ждь мздѹ̀ терпѧ́щымъ тебѐ, и҆ про҇ро́цы твоѝ да ѹ҆вѣ́рѧтсѧ.

¹⁸Ѹ҆слы́ши, гд҇и, мольбы҄ моли́твєнникъ твои́хъ, по бл҃гослове́нїю а҆арѡ́ню ѡ҆ лю́дехъ твои́хъ,

¹⁹и҆ ѹ҆разѹмѣ́ютъ всѝ сѹ́щїи на землѝ, ѩ҆́кѡ ты̀ гд҇ь є҆сѝ, бг҃ъ вѣкѡ́въ.

²⁰Всѧ́ко бра́шно ѩ҆́стъ чре́во: є҆́сть же бра́шно бра́шна добрѣ́е.

²¹Горта́нь вкѹша́етъ бра҄шна ѿ ло́ва, та́кѡ се́рдце разѹми́во словеса̀ лѡ́жна.

²²Се́рдце стропти́во да́стъ печа́ль, и҆ человѣ́къ многоискѹ́сный возда́стъ є҆мѹ̀.

²³Всѧ́кагѡ мѹ́жеска по́лѹ прїи́метъ жена̀: є҆́сть же дще́рь дще́ре лѹ́чше.

²⁴Добро́та же́нска весели́тъ лицѐ и҆ над̾ всѐ жела́нїе человѣ́ческо пред̾ѹспѣва́етъ:

²⁵а҆́ще є҆́сть на ѧ҆зы́цѣ є҆ѧ̀ ми́лость и҆ кро́тость, нѣ́сть мѹ́жъ є҆ѧ̀ то́ченъ сынѡ́мъ человѣ́чєскимъ.

²⁶Стѧжа́вый женѹ̀ начина́етъ и҆мѣ́ти стѧжа́нїе, помо́щника по себѣ̀ и҆ столпа̀ поко́ю.

²⁷И҆дѣ́же нѣ́сть ѡ҆гра́ды, расхище́но бѹ́детъ и҆мѣ́нїе, и҆ и҆дѣ́же нѣ́сть жены̀, воздо́хнетъ скита́ѧсѧ:

²⁸кто́ бо повѣ́ритъ воѡрѹже́нѹ разбо́йникѹ преходѧ́щѹ ѿ гра́да во гра́дъ;

²⁹Та́кожде и҆ человѣ́кѹ не и҆мѹ́щѹ гнѣзда̀ и҆ ѡ҆бита́ющѹ, и҆дѣ́же ѡ҆бвечерѧ́етъ.