Read Библия Церковнославянская Сiрахъ 37 Bible Online

Сiрахъ 37 - Библия Церковнославянская bible

Сiрахъ 37

¹Всѧ́къ дрѹ́гъ рече́тъ: содрѹжи́хсѧ є҆мѹ̀ и҆ а҆́зъ. Но є҆́сть дрѹ́гъ и҆́менемъ то́чїю дрѹ́гъ.

²Печа́ль не пребыва́етъ ли до сме́рти, прїѧ́тель и҆ дрѹ́гъ претворѧ́ѧйсѧ во врага̀;

³Ѽ, лѹка́во помышле́нїе, ѿкѹ́дѹ и҆звали́лосѧ є҆сѝ покры́ти сѹ́шѹ ле́стїю;

⁴Прїѧ́тель ѡ҆ весе́лїи дрѹ́жни сра́дѹетсѧ, а҆ во вре́мѧ ско́рби проти́венъ бѹ́детъ:

⁵прїѧ́тель со дрѹ́гомъ трѹжда́етсѧ чре́ва ра́ди и҆ проти́вѹ бра́ни во́зметъ щи́тъ.

⁶Не забѹ́ди дрѹ́га въ дѹшѝ твое́й и҆ не помина́й є҆гѡ̀ во и҆мѣ́нїи твое́мъ.

⁷Всѧ́къ совѣ́тникъ возно́ситъ совѣ́тъ, но є҆́сть совѣща́ѧй ѡ҆ себѣ̀ самѣ́мъ.

⁸Ѿ совѣ́тника хранѝ дѹ́шѹ твою̀ и҆ разѹмѣ́й пе́рвѣе, что̀ є҆мѹ̀ потре́ба: са́мъ бо себѣ̀ совѣщава́етъ:

⁹да не когда̀ возложи́тъ на тѧ̀ жре́бїй и҆ рече́тъ тѝ: до́бръ пѹ́ть тво́й: и҆ ста́нетъ прѧ́мѡ, ви́дѣти, что̀ сбѹ́детсѧ тебѣ̀.

¹⁰Не совѣщава́й съ подзира́ющимъ тѧ̀ и҆ ѿ зави́дѧщихъ тѝ скры́й совѣ́тъ:

¹¹со жено́ю ѡ҆ ревнѹ́ющей є҆́й и҆ со страшли́вымъ ѡ҆ бра́ни, съ кѹпце́мъ ѡ҆ мѣ́нѣ и҆ со кѹпѹ́ющимъ ѡ҆ прода́жи, со зави́дливымъ ѡ҆ благодаре́нїи

¹²и҆ съ неми́лостивымъ ѡ҆ поми́лованїи, съ лѣни́вымъ ѡ҆ всѧ́цѣмъ дѣ́лѣ

¹³и҆ съ нае́мникомъ годовы́мъ ѡ҆ соверше́нїи, съ рабо́мъ лѣни́вымъ ѡ҆ мно́зѣ дѣ́ланїи.

¹⁴Не внемлѝ си҄мъ ѡ҆ всѧ́цѣмъ совѣща́нїи,

¹⁵но то́кмѡ съ мѹ́жемъ благоговѣ́йнымъ пр҇нѡ бѹ́ди, є҆го́же а҆́ще позна́еши соблюда́юща за́пѡвѣди гд҇ни,

¹⁶и҆́же дѹше́ю свое́ю по дѹшѝ твое́й, и҆ а҆́ще согрѣши́ши, споболи́тъ съ тобо́ю.

¹⁷И҆ совѣ́тъ се́рдца ѹ҆ста́ви, нѣ́сть бо тѝ вѣ́рнѣе є҆гѡ̀:

¹⁸дѹша́ бо мѹ́жа возвѣща́ти нѣ́когда бо́лѣе ѡ҆бы́че, не́жели се́дмь блюсти́телїе высо́цѣ сѣдѧ́щїи на стра́жи.

¹⁹И҆ ѡ҆ всѣ́хъ си́хъ помоли́сѧ вы́шнемѹ, да ѹ҆пра́витъ во и҆́стинѣ пѹ́ть тво́й.

²⁰Нача́токъ всѧ́кагѡ дѣ́ла сло́во, и҆ пре́жде всѧ́кагѡ дѣ́ланїѧ совѣ́тъ.

²¹Слѣ́дъ и҆змѣне́нїѧ серде́чна лицѐ. Четы́ри ча҄сти происхо́дѧтъ: добро̀ и҆ ѕло̀, живо́тъ и҆ сме́рть: и҆ ѡ҆блада́ѧй и҆́ми всегда̀ ѧ҆зы́къ є҆́сть.

²²Е҆́сть мѹ́жъ хи́тръ и҆ наказа́тель мнѡ́гимъ, а҆ свое́й дѹшѝ неключи́мь є҆́сть.

²³Е҆́сть ѹ҆мѹдрѧ́ѧйсѧ въ словесѣ́хъ ненави́димь: се́й всѧ́кїѧ пи́щи лише́нъ бѹ́детъ:

²⁴не дана́ бо бы́сть є҆мѹ̀ ѿ гд҇а благода́ть, ѩ҆́кѡ всѧ́кїѧ премѹ́дрости лише́нъ бы́сть.

²⁵Е҆́сть премѹ́дръ свое́й дѹшѝ, и҆ плоды̀ ра́зѹма є҆гѡ̀ во ѹ҆стѣ́хъ вѣ҄рны.

²⁶Мѹ́жъ премѹ́дръ лю́ди своѧ҄ нака́жетъ, и҆ плоды̀ ра́зѹма є҆гѡ̀ вѣ҄рны.

²⁷Мѹ́жъ премѹ́дръ и҆спо́лнитсѧ благослове́нїѧ, и҆ ѹ҆блажа́тъ є҆го̀ всѝ зрѧ́щїи.

²⁸Живо́тъ мѹ́жа въ числѣ̀ дні́й: а҆ дні́е ї҆и҃лєвы безчи́сленни.

²⁹Премѹ́дрый во свои́хъ лю́дехъ наслѣ́дитъ вѣ́рѹ, и҆ и҆́мѧ є҆гѡ̀ жи́во бѹ́детъ во вѣ́къ.

³⁰Ча́до, въ животѣ̀ твое́мъ и҆скѹсѝ дѹ́шѹ твою̀ и҆ ви́ждь, что̀ є҆́й ѕло̀ є҆́сть, и҆ не да́ждь є҆́й.

³¹И҆́бо не всѧ҄ всѣ҄мъ на по́льзѹ, и҆ не всѧ́ка дѹша̀ во все́мъ благоволи́тъ.

³²Не пресыща́йсѧ во всѧ́цѣй сла́дости и҆ не разлива́йсѧ на (разли́чїе) бра́шна,

³³и҆́бо во мно́зѣхъ бра́шнахъ недѹ́гъ бѹ́детъ, и҆ пресыще́нїе прибли́житъ да́же до холе́ры:

³⁴пресыще́нїемъ бо мно́зи ѹ҆мро́ша, внима́ѧй же приложи́тъ житїѐ.