Read Библия Церковнославянская Сiрахъ 38 Bible Online

Сiрахъ 38 - Библия Церковнославянская bible

Сiрахъ 38

¹Почита́й врача̀ проти́вѹ потре́бъ че́стїю є҆гѡ̀, и҆́бо гд҇ь созда̀ є҆го̀:

²ѿ вы́шнѧгѡ бо є҆́сть и҆зцѣле́нїе, и҆ ѿ царѧ̀ прїи́метъ да́ръ.

³Хѹдо́жество врача̀ вознесе́тъ главѹ̀ є҆гѡ̀, и҆ пред̾ вельмо́жами ѹ҆диви́мь бѹ́детъ.

⁴Гд҇ь созда̀ ѿ землѝ врачєва́нїѧ, и҆ мѹ́жъ мѹ́дрый не возгнѹша́етсѧ и҆́ми.

⁵Не ѿ дре́ва ли ѡ҆слади́сѧ вода̀, да позна́на бѹ́детъ си́ла є҆гѡ̀;

⁶И҆ то́й да́лъ є҆́сть хѹдо́жество человѣ́кѡмъ, да сла́витсѧ въ чѹдесѣ́хъ свои́хъ:

⁷тѣ́ми ѹ҆врачева̀ и҆ ѿѧ́тъ бѡлѣ́зни и҆́хъ.

⁸Мѷрова́рецъ си́ми состро́итъ смѣше́нїе, и҆ не сконча́ютсѧ дѣла̀ є҆гѡ̀, и҆ ми́ръ ѿ негѡ̀ є҆́сть на лицы̀ землѝ.

⁹Ча́до, въ болѣ́зни твое́й не презира́й, но моли́сѧ гд҇еви, и҆ то́й тѧ̀ и҆зцѣли́тъ:

¹⁰ѿстѹпѝ ѿ прегрѣше́нїѧ и҆ напра́ви рѹ́цѣ, и҆ ѿ всѧ́кагѡ грѣха̀ ѡ҆чи́сти се́рдце (твоѐ):

¹¹да́ждь благоѹха́нїе и҆ па́мѧть семїда́ла и҆ ѹ҆ма́сти приноше́нїе, а҆́кибы не пе́рвѣе приносѧ́й:

¹²и҆ да́ждь мѣ́сто врачѹ̀, гд҇ь бо є҆го̀ созда̀: и҆ да не ѹ҆дали́тсѧ ѿ тебє̀, потре́бенъ бо тѝ є҆́сть.

¹³Е҆́сть вре́мѧ, є҆гда̀ въ рѹкѹ̀ є҆гѡ̀ благоѹха́нїе:

¹⁴и҆́бо и҆ ті́и гд҇еви мо́лѧтсѧ, да ѹ҆пра́витъ и҆̀мъ поко́й и҆ и҆зцѣле́нїе ра́ди ѡ҆здравле́нїѧ.

¹⁵Согрѣша́ѧй пред̾ сотво́ршимъ є҆го̀ впаде́тъ въ рѹ́цѣ врачѹ̀.

¹⁶Ча́до, над̾ мертвеце́мъ и҆сточѝ сле́зы и҆ ѩ҆́коже ѕлѣ̀ стра́ждѹщь начнѝ пла́чь: и҆ ѩ҆́коже досто́итъ є҆мѹ̀, соскѹ́тай тѣ́ло є҆гѡ̀ и҆ не пре́зри погребе́нїѧ є҆гѡ̀.

¹⁷Го́рекъ сотворѝ пла́чь и҆ рыда́нїе тепло̀, и҆ сотворѝ сѣ́тованїе, ѩ҆́коже є҆мѹ̀ досто́итъ, де́нь є҆ди́нъ и҆ два̀ хѹле́нїѧ ра́ди, и҆ ѹ҆тѣ́шисѧ печа́ли ра́ди:

¹⁸ѿ печа́ли бо сме́рть быва́етъ, и҆ печа́ль серде́чнаѧ слѧ́четъ крѣ́пость.

¹⁹Въ нанесе́нїи пребыва́етъ и҆ печа́ль, и҆ житїѐ ни́щагѡ въ се́рдцы.

²⁰Не да́ждь въ печа́ль се́рдца твоегѡ̀, ѡ҆ста́ви ю҆̀ помѧнѹ́въ послѣ҄днѧѧ.

²¹Не забѹ́ди, нѣ́сть бо возвраще́нїѧ: и҆ є҆мѹ̀ по́льзы не сотвори́ши, и҆ себѐ ѡ҆ѕло́биши.

²²Помѧнѝ сѹ́дъ є҆гѡ̀, ѩ҆́кѡ си́це и҆ тво́й: мнѣ̀ вчера̀, а҆ тебѣ̀ дне́сь.

²³Въ поко́и мертвеца̀ ѹ҆поко́й па́мѧть є҆гѡ̀, и҆ ѹ҆тѣ́шисѧ ѡ҆ не́мъ во и҆схо́дѣ дѹ́ха є҆гѡ̀.

²⁴Премѹ́дрость кни́жника во благовре́менїи пра́зднества, и҆ ѹ҆малѧ́ѧйсѧ дѣѧ́нїемъ свои́мъ ѹ҆премѹ́дритсѧ.

²⁵Чи́мъ ѹ҆мѹдри́тсѧ держа́й ѡ҆ра́ло и҆ хвалѧ́йсѧ ѻ҆стно́мъ, гонѧ́й волы̀ и҆ ѡ҆браща́ѧйсѧ въ дѣ́лѣхъ и҆́хъ, и҆ по́вѣсть є҆гѡ̀ въ сынѣ́хъ ю҆́нчихъ;

²⁶Се́рдце своѐ да́стъ возры́ти бразды҄, и҆ бдѣ́нїе є҆гѡ̀ на насыще́нїихъ ю҆́ницъ.

²⁷Та́кѡ всѧ́къ древодѣ́лѧ и҆ а҆рхїте́ктѡнъ, и҆́же нѡ́щи ѩ҆́кѡ дни҄ провожда́етъ, дѣ́лаѧ и҆зваѧ҄нїѧ печа́тей, и҆ прилѣжа́нїе є҆гѡ̀ и҆змѣни́ти разли́чїе:

²⁸се́рдце своѐ да́стъ ѹ҆подо́бити живописа́нїе, и҆ бдѣ́нїе є҆гѡ̀ є҆́же соверши́ти дѣ́ло.

²⁹Та́кожде и҆ кова́чь сѣдѧ̀ бли́з̾ на́ковални и҆ соглѧ́даѧй дѣ́ло желѣ́за: кѹре́нїе ѻ҆гнѧ̀ ѹ҆дрѹчи́тъ тѣ́ло є҆гѡ̀, и҆ теплото́ю пе́щи ѹ҆трѹди́тсѧ:

³⁰гла́съ мла́та ѡ҆бнови́тъ ѹ҆́хо є҆гѡ̀, и҆ прѧ́мѡ подо́бїю сосѹ́да ѻ҆́чи є҆гѡ̀:

³¹се́рдце своѐ вда́стъ на сконча́нїе дѣ́лъ, и҆ бдѣ́нїе є҆гѡ̀ ѹ҆краси́ти до конца̀.

³²Та́кожде и҆ скѹде́льникъ сѣдѧ̀ на дѣ́лѣ свое́мъ и҆ вертѧ̀ нога́ма свои́ма ко́ло,

³³и҆́же въ печа́ли лежи́тъ вы́нѹ на дѣ́лѣ свое́мъ, и҆зчислѧ́емо всѐ дѣ́ланїе є҆гѡ̀:

³⁴мы́шцею свое́ю воѡбрази́тъ бре́нїе и҆ пред̾ нога́ма преклони́тъ крѣ́пость є҆гѡ̀:

³⁵се́рдце своѐ вда́стъ сконча́ти сосѹ́дъ, и҆ бдѣ́нїе є҆гѡ̀ ѡ҆чи́стити пе́щь.

³⁶Всѝ сі́и на рѹ́ки своѧ҄ надѣ́ютсѧ, и҆ кі́йждо въ дѣ́лѣ свое́мъ ѹ҆мѹдрѧ́етсѧ.

³⁷Без̾ тѣ́хъ не насели́тсѧ гра́дъ, и҆ не вселѧ́тсѧ, ни похо́дѧтъ и҆ въ собо́рище не во́змѹтсѧ:

³⁸на престо́лѣ же сѹді́й не сѧ́дѹтъ и҆ завѣ́та сѹдѹ̀ не размы́слѧтъ, нижѐ и҆́мѹтъ и҆звѣща́ти наказа́нїѧ и҆ сѹда̀, и҆ въ при́тчахъ не ѡ҆брѧ́щѹтсѧ:

³⁹но то́кмѡ зда́нїємъ житє́йскимъ прилѣжа́тъ, и҆ моле́нїе и҆́хъ въ дѣ́ланїи хѹдо́жества.