Read Библия Церковнославянская Сiрахъ 39 Bible Online

Сiрахъ 39 - Библия Церковнославянская bible

Сiрахъ 39

¹То́чїю вдаѧ́й дѹ́шѹ свою̀ и҆ размышлѧ́ѧй въ зако́нѣ вы́шнѧгѡ премѹ́дрости всѣ́хъ дре́внихъ взы́щетъ и҆ во про҇ро́чествїихъ поѹча́тисѧ бѹ́детъ:

²пѡ́вѣсти мѹже́й и҆мени́тыхъ соблюде́тъ и҆ во и҆зви҄тїѧ при́тчей совни́детъ,

³сокровє́ннаѧ при́тчей и҆зы́щетъ и҆ въ гада́нїи при́тчей поживе́тъ,

⁴посредѣ̀ вельмо́жъ послѹ́житъ и҆ пред̾ старѣ́йшинѹ ѩ҆ви́тсѧ,

⁵въ землѝ чѹжди́хъ ѩ҆зы҄къ про́йдетъ, добро́ бо и҆ ѕло̀ въ человѣ́цѣхъ и҆скѹсѝ.

⁶Се́рдце своѐ вда́стъ ѹ҆́треневати ко гд҇ѹ сотво́ршемѹ є҆го̀ и҆ пред̾ вы́шнимъ помо́литсѧ, и҆ ѿве́рзетъ ѹ҆ста̀ своѧ҄ на моли́твѹ и҆ ѡ҆ грѣсѣ́хъ свои́хъ помо́литсѧ.

⁷А҆́ще гд҇ь ве́лїй восхо́щетъ, дѹ́хомъ ра́зѹма и҆спо́лнитсѧ:

⁸то́й ѡ҆дожди́тъ глаго́лы премѹ́дрости своеѧ̀ и҆ въ моли́твѣ и҆сповѣ́стсѧ гд҇еви,

⁹то́й ѹ҆пра́витъ совѣ́тъ є҆гѡ̀ и҆ хѹдо́жество и҆ въ сокрове́нныхъ є҆гѡ̀ размышлѧ́ти бѹ́детъ,

¹⁰то́й и҆звѣсти́тъ наказа́нїе ѹ҆че́нїѧ є҆гѡ̀ и҆ въ зако́нѣ завѣ́та гд҇нѧ похва́литсѧ.

¹¹Восхва́лѧтъ ра́зѹмъ є҆гѡ̀ мно́зи, и҆ до вѣ́ка не поги́бнетъ:

¹²не ѿи́детъ па́мѧть є҆гѡ̀, и҆ и҆́мѧ є҆гѡ̀ поживе́тъ въ ро́ды родѡ́въ:

¹³премѹ́дрость є҆гѡ̀ повѣ́дѧтъ ѩ҆зы́цы, и҆ хвалѹ̀ є҆гѡ̀ и҆сповѣ́сть цр҃ковь.

¹⁴А҆́ще пребѹ́детъ, приѹсво́итъ себѣ̀, и҆ а҆́ще почі́етъ, и҆́мѧ ѡ҆ста́витъ па́че ты́сѧщъ.

¹⁵Е҆щѐ размы́сливъ повѣ́мъ, и҆ ѩ҆́коже лѹны̀ полнота̀ напо́лнихсѧ.

¹⁶Послѹ́шайте менѐ, преподо́бнїи сы́нове, и҆ прозѧ́бните ѩ҆́кѡ ши́пки произраста́ющыѧ при пото́цѣ се́лнѣмъ,

¹⁷и҆ ѩ҆́коже лїва́нъ дади́те благово́нїе,

¹⁸и҆ процвѣти́те цвѣ́тъ ѩ҆́кѡ крі́нъ, преподади́те воню̀ и҆ воспо́йте пѣ́снь.

¹⁹Благослови́те гд҇а во всѣ́хъ дѣ́лѣхъ є҆гѡ̀, дади́те и҆́мени є҆гѡ̀ вели́чїе и҆ и҆сповѣ́дайтесѧ во хвале́нїи є҆гѡ̀,

²⁰въ пѣ́снехъ ѹ҆сте́нъ и҆ въ гѹ́слехъ, и҆ си́це рцы́те во и҆сповѣ́данїи:

²¹дѣла̀ гд҇нѧ всѧ҄ ѩ҆́кѡ дѡбра̀ ѕѣлѡ̀, и҆ всѧ́ко повелѣ́нїе во вре́мѧ своѐ бѹ́детъ.

²²И҆ нѣ́сть рещѝ: что̀ сїѐ; на что̀ сїѐ; всѧ҄ бо сїѧ҄ во вре́мѧ своѐ взы҄скана бѹ́дѹтъ.

²³Сло́вомъ є҆гѡ̀ ста̀ вода̀ ѩ҆́кѡ сто́гъ, и҆ гл҃го́ломъ ѹ҆́стъ є҆гѡ̀ прїѧ́тєлища вѡдна́ѧ.

²⁴Повелѣ́нїемъ є҆гѡ̀ всѧ́кое благоволе́нїе, и҆ нѣ́сть, и҆́же ѹ҆ма́литъ сп҇нїе є҆гѡ̀.

²⁵Дѣла̀ всѧ́кїѧ пло́ти пред̾ ни́мъ, и҆ нѣ́сть ѹ҆кры́тисѧ ѿ ѻ҆че́съ є҆гѡ̀:

²⁶ѿ вѣ́ка на вѣ́къ призрѣ̀, и҆ ничто́же є҆́сть ди́вно пред̾ ни́мъ.

²⁷Нѣ́сть рещѝ: что̀ сїѐ; на что̀ сїѐ; всѧ҄ бо на потре́бѹ и҆́хъ создана҄ бы́ша.

²⁸Блг҇ве́нїе є҆гѡ̀ ѩ҆́кѡ рѣка̀ покры̀ и҆ ѩ҆́кѡ пото́къ сѹ́шѹ напоѝ:

²⁹си́це гнѣ́въ є҆гѡ̀ ѩ҆зы́цы наслѣ́дѧтъ, ѩ҆́кѡ превратѝ во́дѹ въ сла́ность.

³⁰Пѹтїѐ є҆гѡ̀ преподѡ́бнымъ пра́ви, та́кѡ беззако́нникѡмъ претыка҄нїѧ.

³¹Блага҄ѧ благи҄мъ создана҄ бы́ша и҆з̾ нача́ла, та́кожде грѣ҄шнымъ ѕла҄ѧ.

³²Нача́ло всѧ́кїѧ потре́бы въ житїѐ человѣ́кѹ, вода̀ и҆ ѻ҆́гнь, и҆ желѣ́зо и҆ со́ль, и҆ семїда́лъ пшени́цы и҆ млеко̀ и҆ ме́дъ, кро́вь гро́здова и҆ ма́сло и҆ ри́за:

³³всѧ҄ сїѧ҄ благочести҄вымъ во блага҄ѧ, си́це и҆ грѣ́шникѡмъ превратѧ́тсѧ во ѕла҄ѧ.

³⁴Сѹ́ть дѹ́си, и҆̀же со́здани бы́ша на ме́сть и҆ ѩ҆́ростїю свое́ю ѹ҆тверди́ша ра҄ны и҆̀мъ:

³⁵во вре́мѧ сконча́нїѧ и҆злїю́тъ крѣ́пость и҆ ѩ҆́рость сотво́ршагѡ и҆̀хъ соверша́тъ.

³⁶Ѻ҆́гнь и҆ гра́дъ, и҆ гла́дъ и҆ сме́рть, всѧ҄ сїѧ҄ создана҄ бы́ша на ме́сть:

³⁷зѹ́бы ѕвѣре́й и҆ скѡрпі́и, и҆ є҆хї҄дны и҆ ме́чь ѿмща́ѧй въ поги́бель нечести́выхъ,

³⁸въ за́повѣдехъ є҆гѡ̀ возвеселѧ́тсѧ, и҆ на землѝ на потре́бѹ ѹ҆гото́вѧтсѧ, и҆ во бремена́хъ свои́хъ не и҆́мѹтъ прейтѝ сло́ва.

³⁹Сегѡ̀ ра́ди и҆спе́рва ѹ҆тверди́хсѧ и҆ размы́слихъ и҆ въ писа́нїи ѡ҆ста́вихъ:

⁴⁰всѧ҄ дѣла̀ гд҇нѧ бла҄га, и҆ всю̀ потре́бѹ во вре́мѧ своѐ пода́стъ:

⁴¹и҆ нѣ́сть рещѝ: сїѐ сегѡ̀ ѕлѣ́е: всѧ҄ бо во вре́мѧ на ѹ҆гожде́нїе бѹ́дѹтъ.

⁴²И҆ нн҃ѣ всѣ́мъ се́рдцемъ и҆ ѹ҆сты҄ воспо́йте и҆ благослови́те и҆́мѧ гд҇не.