Read Библия Церковнославянская Сiрахъ 4 Bible Online

Сiрахъ 4 - Библия Церковнославянская bible

Сiрахъ 4

¹Ча́до, живота̀ ни́щагѡ не лишѝ и҆ не ѿвраща́й ѻ҆че́съ ѿ просѧ́щагѡ,

²дѹшѝ а҆́лчѹщїѧ не ѡ҆скорбѝ и҆ не разгнѣ́вай мѹ́жа въ нищетѣ̀ є҆гѡ̀,

³се́рдца раздраже́нагѡ не превозмѹтѝ и҆ не продолжа́й даѧ́нїѧ тре́бѹющемѹ,

⁴раба̀ скорбѧ́ща не ѿрѣ́й и҆ не ѿвратѝ лица̀ твоегѡ̀ ѿ ни́щагѡ,

⁵ѿ тре́бѹющагѡ не ѿвратѝ ѻ҆че́съ и҆ не да́ждь мѣ́ста человѣ́кѹ клѧ́ти тѧ̀:

⁶кленѹ́щагѡ бо тѧ̀ въ го́рести дѹшѝ своеѧ̀ мольбѹ̀ ѹ҆слы́шитъ сотвори́вый є҆го̀.

⁷Прїѧ́тна собо́рищѹ творѝ себѐ и҆ кнѧ́зю смирѧ́й главѹ̀ твою̀,

⁸приклонѝ ѹ҆́хо твоѐ къ ни́щемѹ и҆ ѿвѣща́й є҆мѹ̀ ми҄рнаѧ въ кро́тости,

⁹и҆змѝ ѡ҆би́димаго и҆з̾ рѹкѝ ѡ҆би́дѧщаго и҆ не малодѹ́шествѹй, є҆гда̀ сѹ́диши,

¹⁰бѹ́ди си҄рымъ ѩ҆́кѡ ѻ҆те́цъ и҆ вмѣ́стѡ мѹ́жа ма́тери и҆́хъ:

¹¹и҆ бѹ́деши ѩ҆́кѡ сы́нъ вы́шнѧгѡ, и҆ возлю́битъ тѧ̀ па́че не́же ма́ти твоѧ̀.

¹²Премѹ́дрость сы́ны своѧ҄ вознесѐ и҆ застѹпа́етъ и҆́щѹщихъ є҆ѧ̀:

¹³любѧ́й ю҆̀ лю́битъ жи́знь, и҆ ѹ҆́тренюющїи къ не́й и҆спо́лнѧтсѧ весе́лїѧ:

¹⁴держа́йсѧ є҆ѧ̀ наслѣ́дитъ сла́вѹ, и҆ и҆дѣ́же вхо́дитъ, блг҇ви́тъ є҆го̀ гд҇ь:

¹⁵слѹжа́щїи є҆́й послѹ́жатъ ст҃о́мѹ, и҆ лю́бѧщихъ ю҆̀ лю́битъ гд҇ь:

¹⁶слѹ́шаѧй є҆ѧ̀ сѹди́ти и҆́мать ѩ҆зы́ки, и҆ внима́ѧй є҆́й всели́тсѧ надѣ́ѧвсѧ.

¹⁷А҆́ще ѹ҆вѣ́рѹеши, наслѣ́диши ю҆̀, и҆ во ѡ҆держа́нїи бѹ́дѹтъ ро́ды є҆гѡ̀:

¹⁸ѩ҆́кѡ стро́потнѡ хо́дитъ съ ни́мъ въ пе́рвыхъ, боѧ́знь же и҆ стра́хъ наведе́тъ на́нь

¹⁹и҆ помѹ́читъ є҆го̀ въ наказа́нїи свое́мъ, до́ндеже вѣ́рѹ и҆́метъ дѹшѝ є҆гѡ̀ и҆ и҆скѹ́ситъ є҆го̀ во ѡ҆правда́нїихъ свои́хъ,

²⁰и҆ па́ки возврати́тсѧ прѧ́мѡ къ немѹ̀ и҆ возвесели́тъ є҆го̀

²¹и҆ ѿкры́етъ є҆мѹ̀ та҄йны своѧ҄:

²²а҆́ще заблѹ́дитъ, ѡ҆ста́витъ є҆го̀ и҆ преда́стъ є҆го̀ въ рѹ́цѣ паде́нїѧ є҆гѡ̀.

²³Блюдѝ вре́мѧ и҆ храни́сѧ ѿ лѹка́вагѡ,

²⁴и҆ ѡ҆ дѹшѝ твое́й не постыди́сѧ:

²⁵є҆́сть бо сты́дъ наводѧ́й грѣ́хъ, и҆ є҆́сть сты́дъ сла́ва и҆ благода́ть.

²⁶Не прїимѝ лица̀ на дѹ́шѹ твою̀ и҆ не срамлѧ́йсѧ ѡ҆ паде́нїи твое́мъ.

²⁷Не возбранѝ словесѐ во вре́мѧ спасе́нїѧ:

²⁸въ словеси́ бо позна́на бѹ́детъ премѹ́дрость, и҆ наказа́нїе въ глаго́лѣхъ ѧ҆зы́ка.

²⁹Не прерѣка́й проти́вѹ и҆́стины и҆ ѡ҆ ненаказа́нїи твое́мъ срамлѧ́йсѧ:

³⁰не стыди́сѧ и҆сповѣ́дати грѣхѝ твоѧ҄ и҆ не воспѧща́й быстрины̀ рѣчны́ѧ.

³¹И҆ не подстели́сѧ мѹ́жѹ бѹ́ю и҆ не ѡ҆бини́сѧ лица̀ си́льнагѡ.

³²Да́же до сме́рти подвиза́йсѧ ѡ҆ и҆́стинѣ, и҆ гд҇ь бг҃ъ побо́ретъ по тебѣ̀.

³³Не бѹ́ди ско́ръ ѧ҆зы́комъ твои́мъ, лѣни́въ же и҆ сла́бъ въ дѣ́лѣхъ твои́хъ.

³⁴Не бѹ́ди ѩ҆́кѡ ле́въ въ домѹ̀ твое́мъ и҆ жестоконеи́стовъ въ рабѣ́хъ твои́хъ.

³⁵Не бѹ́ди рѹка̀ твоѧ̀ просте́рта на взѧ́тїе, а҆ на ѿдаѧ́нїе согбе́на.