Read Библия Церковнославянская Сiрахъ 40 Bible Online

Сiрахъ 40 - Библия Церковнославянская bible

Сiрахъ 40

¹Непра́зднство ве́лїе создано̀ бы́сть всѧ́комѹ человѣ́кѹ, и҆ и҆́го тѧ́жко на сынѣ́хъ а҆да́млихъ, ѿ днѐ и҆схо́да и҆з̾ чре́ва ма́тере и҆́хъ до днѐ погребе́нїѧ въ ма́терь всѣ́хъ.

²Размышлє́нїѧ и҆́хъ и҆ стра́хъ серде́чный, помышле́нїе ча́ѧнїѧ, де́нь сконча́нїѧ:

³ѿ сѣдѧ́щагѡ на престо́лѣ сла́вы и҆ да́же до смире́ннагѡ на землѝ и҆ пе́пелѣ,

⁴ѿ носѧ́щагѡ багрѧни́цѹ и҆ вѣне́цъ и҆ да́же до ѡ҆дѣва́ющагѡсѧ льнѧ́ною,

⁵ѩ҆́рость и҆ за́висть, и҆ мѧте́жъ и҆ молва̀, и҆ стра́хъ сме́рти и҆ вражда̀ и҆ рве́нїе, и҆ во вре́мѧ поко́ѧ на ло́жи со́нъ нощны́й и҆змѣнѧ́етъ ра́зѹмъ є҆гѡ̀:

⁶ма́лѡ ѩ҆́кѡ ничто́же на поко́й, и҆ ѿ тогѡ̀ во снѣ́хъ ѩ҆́кѡ во дне́хъ блюде́нїѧ:

⁷возмѹще́нъ видѣ́нїемъ се́рдца своегѡ̀, ѩ҆́кѡ и҆збѣжа́въ ѿ лица̀ бра́ни, во вре́мѧ спасе́нїѧ своегѡ̀ воста̀, и҆ дивѧ́сѧ ни при є҆ди́нѣмъ же стра́сѣ.

⁸Со всѧ́кою пло́тїю ѿ человѣ́ка да́же до скота̀, и҆ на грѣ́шныхъ седмери́цею къ си҄мъ:

⁹сме́рть и҆ кро́вь, и҆ рве́нїе и҆ ѻ҆рѹ́жїе, наведє́нїѧ, гла́дъ и҆ сокрѹше́нїе и҆ ра҄ны,

¹⁰на беззако́нныхъ создана҄ бы́ша сїѧ҄ всѧ҄, и҆ си́хъ ра́ди бы́сть пото́пъ.

¹¹Всѧ҄, є҆ли҄ка ѿ землѝ, въ зе́млю возвраща́ютсѧ, и҆ ѿ воды̀, въ мо́ре возвраща́ютсѧ.

¹²Всѧ́къ да́ръ и҆ непра́вда и҆стреби́тсѧ, а҆ вѣ́ра во вѣ́къ стоѧ́ти бѹ́детъ.

¹³И҆мѣ́нїе непра́ведныхъ ѩ҆́кѡ рѣка̀ и҆́зсхнетъ, и҆ ѩ҆́коже гро́мъ вели́къ въ до́ждь возгреми́тъ.

¹⁴Е҆гда̀ разгне́тъ рѹ́цѣ, возвесели́тсѧ, та́кѡ престѹпа́ющїи до конца̀ и҆зче́знѹтъ.

¹⁵И҆зча҄дїѧ нечести́выхъ не ѹ҆мно́жатъ вѣ́твїй, и҆ корє́нїѧ нечи҄стаѧ на тве́рдѣ ка́мени:

¹⁶ѕла́къ над̾ всѧ́кою водо́ю и҆ на бре́зѣ рѣкѝ пре́жде всѧ́кїѧ травы̀ и҆сто́рженъ бѹ́детъ.

¹⁷Благода́ть ѩ҆́кѡ ра́й во благослове́нїихъ, и҆ ми́лостынѧ во вѣ́къ пребыва́етъ.

¹⁸Живо́тъ самодово́лнагѡ дѣ́лателѧ ѹ҆слади́тсѧ, и҆ па́че ѻ҆бои́хъ ѡ҆брѣта́ѧй сокро́вище.

¹⁹Ча҄да и҆ созида́нїе гра́да ѹ҆твержда́ютъ и҆́мѧ, и҆ па́че ѻ҆бои́хъ жена̀ непоро́чна вмѣнѧ́етсѧ.

²⁰Вїно̀ и҆ мѹсїкі́а веселѧ́тъ се́рдце, а҆ па́че ѻ҆бои́хъ возлюбле́нїе премѹ́дрости.

²¹Свирѣ́ль и҆ ѱалти́рь ѹ҆слажда́ютъ пѣ́снь, а҆ па́че ѻ҆бои́хъ ѧ҆зы́къ сла́дкїй.

²²Благода́ти и҆ добро́ты возжела́етъ ѻ҆́ко твоѐ, а҆ па́че ѻ҆бои́хъ ѕла́ка сѣ́мене.

²³Прїѧ́тель и҆ дрѹ́гъ срѣта҄ющасѧ во вре́мѧ, а҆ па́че ѻ҆бои́хъ жена̀ съ мѹ́жемъ.

²⁴Бра́тїѧ и҆ по́мощь во вре́мѧ ско́рби, а҆ па́че ѻ҆бои́хъ ми́лостынѧ и҆зба́витъ.

²⁵Зла́то и҆ сребро̀ ѹ҆твердѧ́тъ но́гѹ, а҆ па́че ѻ҆бои́хъ совѣ́тъ благоѹго́денъ бѹ́детъ.

²⁶И҆мѣ́нїе и҆ крѣ́пость вознесѹ́тъ се́рдце, а҆ па́че ѻ҆бои́хъ стра́хъ гд҇ень:

²⁷нѣ́сть во стра́сѣ гд҇ни ѹ҆мале́нїѧ и҆ нѣ́сть въ не́мъ лише́нїѧ по́мощи:

²⁸стра́хъ гд҇ень ѩ҆́кѡ ра́й благослове́нїѧ, и҆ па́че всѧ́кїѧ сла́вы покры̀ є҆го̀.

²⁹Ча́до, живото́мъ просли́вымъ не живѝ: лѹ́чше ѹ҆мре́ти, не́жели проси́ти.

³⁰Мѹ́жъ зрѧ̀ на чѹждѹ́ю трапе́зѹ, нѣ́сть живо́тъ є҆гѡ̀ въ числѣ̀ живота̀: ѡ҆печа́литъ дѹ́шѹ свою̀ чѹжды́ми бра́шны:

³¹мѹ́жъ же хѹдо́гъ и҆ нака́занъ сохрани́тсѧ.

³²Во ѹ҆стѣ́хъ нестыдли́вагѡ проше́нїе ѹ҆слади́тсѧ, и҆ во чре́вѣ є҆гѡ̀ ѻ҆́гнь возгори́тсѧ.