Read Библия Церковнославянская Сiрахъ 41 Bible Online

Сiрахъ 41 - Библия Церковнославянская bible

Сiрахъ 41

¹Ѽ сме́рте, ко́ль горька̀ твоѧ̀ є҆́сть па́мѧть человѣ́кѹ ми́рнѡ во и҆мѣ́нїихъ свои́хъ живѹ́щѹ,

²мѹ́жеви не пекѹ́щѹсѧ и҆ благополѹ́чнѹ во всѣ́хъ, и҆ є҆щѐ возмога́ющѹ прїѧ́ти пи́щѹ.

³Ѽ, сме́рте, до́бръ сѹ́дъ тво́й є҆́сть человѣ́кѹ тре́бѹющемѹ и҆ ѹ҆малѧ́ющѹсѧ крѣ́постїю,

⁴въ послѣ́дней ста́рости сѹ́щемѹ и҆ пекѹ́щѹсѧ ѡ҆ всѣ́хъ, и҆ невѣ́рствѹющѹ и҆ погѹби́вшѹ терпѣ́нїе.

⁵Не бо́йсѧ сѹда̀ сме́рти: помѧнѝ пє́рваѧ твоѧ҄ и҆ послѣ҄днѧѧ, се́й бо сѹ́дъ ѿ гд҇а всѧ́цѣй пло́ти.

⁶И҆ почто̀ ѿме́щешисѧ бл҃говоле́нїѧ вы́шнѧгѡ; а҆́ще де́сѧть, а҆́ще сто̀, а҆́ще ты́сѧща лѣ́тъ,

⁷нѣ́сть во а҆́дѣ ѡ҆бличе́нїѧ живота̀.

⁸Ча҄да быва́ютъ мє́рзка ча҄да грѣ́шникѡвъ, и҆ живѹ҄щаѧ въ селе́нїихъ нечести́выхъ:

⁹ча҄дъ грѣ́шныхъ поги́бнетъ наслѣ́дїе, и҆ съ сѣ́менемъ и҆́хъ вы́нѹ поноше́нїе.

¹⁰Ѻ҆тца̀ нечести́ва ѹ҆корѧ́тъ ча҄да, ѩ҆́кѡ є҆гѡ̀ ра́ди поноше́нїе прїи́мѹтъ.

¹¹Го́ре ва́мъ, мѹ́жїе нечести́вїи, и҆́же ѡ҆ста́висте зако́нъ бг҃а вы́шнѧгѡ:

¹²и҆ а҆́ще родите́сѧ, на клѧ́твѹ родите́сѧ: и҆ а҆́ще ѹ҆́мрете, въ клѧ́твѹ раздѣле́ни бѹ́дете.

¹³Всѧ҄, є҆ли҄ка ѿ землѝ, въ зе́млю по́йдѹтъ: та́кожде нечести́вїи ѿ клѧ́твы въ па́гѹбѹ.

¹⁴Сѣ́тованїе человѣ́кѡвъ въ тѣлесѣ́хъ и҆́хъ: и҆́мѧ же грѣ́шникѡвъ неблаго́е потреби́тсѧ.

¹⁵Пецы́сѧ ѡ҆ и҆́мени, то́ бо тѝ пребыва́етъ па́че ты́сѧщъ вели́кихъ сокро́вищъ зла́та.

¹⁶Блага́гѡ житїѧ̀ число̀ дні́й, и҆ до́брое и҆́мѧ во вѣ́ки пребыва́етъ.

¹⁷Наказа́нїе въ ми́рѣ соблюди́те, ча҄да: премѹ́дрость же сокрове́нна и҆ сокро́вище неѧвле́нно, ка́ѧ по́льза во ѻ҆бои́хъ;

¹⁸Лѹ́чше человѣ́къ скрыва́ѧй бѹ́йство своѐ, не́жели человѣ́къ скрыва́ѧй премѹ́дрость свою̀.

¹⁹Тѣ́мже ѹ҆̀бо ѹ҆срами́тесѧ слове́съ мои́хъ:

²⁰нѣ́сть бо бла́го всѧ́къ сра́мъ сохранѧ́ти, и҆ не всѧ҄ всѣ҄мъ въ вѣ́рѣ благоволѧ́тсѧ.

²¹Стыди́тесѧ пред̾ ѻ҆тце́мъ и҆ ма́терїю ѡ҆ блѹдѣ̀ и҆ пред̾ си́льнымъ и҆ властели́номъ ѡ҆ лжѝ,

²²пред̾ сѹдїе́ю и҆ кнѧ́земъ ѡ҆ согрѣше́нїи, пред̾ собо́ромъ и҆ людьмѝ ѡ҆ беззако́нїи,

²³пред̾ ѻ҆́бщникомъ и҆ дрѹ́гомъ ѡ҆ непра́вдѣ, и҆ на мѣ́стѣ, и҆дѣ́же живе́ши, ѡ҆ татьбѣ̀,

²⁴и҆ пред̾ и҆́стиною бж҃їею и҆ завѣ́томъ, и҆ ѿ ѡ҆пе́ртїѧ лакте́й на трапе́зѣ, ѿ прельще́нїѧ взѧ́тїѧ и҆ даѧ́нїѧ,

²⁵и҆ ѿ цѣлѹ́ющихъ ѡ҆ молча́нїи, ѿ видѣ́нїѧ жены̀ блѹдни́цы и҆ ѿ ѿвраще́нїѧ сро́днича лица̀,

²⁶ѿ ѿѧ́тїѧ ча́сти и҆ даѧ́нїѧ и҆ ѿ присмотре́нїѧ жены̀ мѹжа́ты и҆ ѿ ѡ҆больще́нїѧ рабы́ни своеѧ̀,

²⁷и҆ не пристѹпѝ ко ѻ҆дрѹ̀ є҆ѧ̀:

²⁸пред̾ дрѹ҄ги ѡ҆ словесѣ́хъ поно́сныхъ, и҆ по даѧ́нїи не поносѝ:

²⁹ѿ повторе́нїѧ и҆ сло́ва слы́шанїѧ и҆ ѿ ѿкрове́нїѧ слове́съ та́йныхъ: и҆ бѹ́деши стыдли́въ и҆́стиннѡ и҆ ѡ҆брѣта́ѧй благода́ть пред̾ всѧ́кимъ человѣ́комъ.