Read Библия Церковнославянская Сiрахъ 42 Bible Online

Сiрахъ 42 - Библия Церковнославянская bible

Сiрахъ 42

¹Не стыди́сѧ ѡ҆ си́хъ и҆ не прїимѝ лица̀, є҆́же согрѣша́ти:

²ѡ҆ зако́нѣ вы́шнѧгѡ и҆ завѣ́тѣ, и҆ ѡ҆ сѹдѣ̀, є҆́же ѡ҆правда́ти нечести́ваго,

³ѡ҆ словесѝ соѻбщника и҆ ѡ҆ пѹ́тницѣхъ, и҆ ѡ҆ даѧ́нїи наслѣ́дїѧ дрѹгѡ́въ,

⁴ѡ҆ и҆́стинѣ мѣ́рила и҆ вѣ́сѡвъ, ѡ҆ стѧжа́нїи мно́гихъ и҆ ма́лыхъ,

⁵ѡ҆ разли́чїи продаѧ́нїѧ кѹпцє́въ и҆ ѡ҆ наказа́нїи мно́зѣ ча҄дъ, и҆ є҆́же рабѹ̀ лѹка́вѹ ре́бра ѡ҆крова́вити.

⁶На женѣ̀ лѹка́вѣ добро̀ (є҆́сть) печа́ть, и҆ и҆дѣ́же мнѡ́ги рѹ́ки, затворѝ.

⁷Е҆́же а҆́ще преда́си, въ число̀ и҆ мѣ́рѹ, да́ждь и҆ возмѝ всѐ писа́нїемъ.

⁸Ѡ҆ наказа́нїи неразѹ́мива и҆ бѹ́ѧгѡ, и҆ престарѣ́лагѡ сѹдѧ́щагѡсѧ съ ю҆́ными, и҆ бѹ́деши нака́занъ и҆́стиннѡ и҆ и҆скѹше́нъ пред̾ всѧ́кимъ живѹ́щимъ.

⁹Дще́рь ѻ҆тцѹ̀ сокрове́нно бдѣ́нїе, и҆ попече́нїе ѡ҆ не́й ѿгонѧ́етъ со́нъ: во ю҆́ности свое́й да не когда̀ презрѣ́етъ и҆ сожи́телствѹющи (съ мѹ́жемъ), да не когда̀ возненави́дѣна бѹ́детъ:

¹⁰въ дѣ́вствѣ да не когда̀ ѡ҆скверни́тсѧ и҆ во ѻ҆́тчихъ є҆ѧ̀ непра́здна бѹ́детъ, и҆ съ мѹ́жемъ сѹ́щи да не когда̀ престѹ́питъ и҆ сожи́телствѹющи да не когда̀ непло́ды бѹ́детъ.

¹¹Над̾ дще́рїю безстѹ́дною ѹ҆твердѝ стра́жѹ, да не когда̀ сотвори́тъ тѧ̀ ѡ҆бра́дованїе врагѡ́мъ, бесѣ́дѹ во гра́дѣ и҆ ѿлѹче́наго ѿ люді́й, и҆ посрами́тъ тѧ̀ въ наро́дѣ мно́зѣ.

¹²Не взира́й на добро́тѹ всѧ́кагѡ человѣ́ка и҆ посредѣ̀ же́нъ не сѣдѝ:

¹³ѿ ри́зъ бо и҆схо́дитъ мо́лїе, и҆ ѿ жены̀ лѹка́вство же́нское.

¹⁴Лѹ́чше ѕло́ба мѹ́жеска, не́жели добродѣ́телнаѧ жена̀, и҆ жена̀ посрамлѧ́ющаѧ въ поноше́нїе.

¹⁵Помѧнѹ̀ ѹ҆̀бо дѣла̀ гд҇нѧ, и҆ ѩ҆̀же ви́дѣхъ, повѣ́мъ: во словесѣ́хъ гд҇нихъ дѣла̀ є҆гѡ̀:

¹⁶со́лнце просвѣща́ѧ на всѧ҄ призрѣ̀, и҆ сла́вы є҆гѡ̀ и҆спо́лнено дѣ́ло є҆гѡ̀.

¹⁷Не сотворѝ ли ст҃ы҄мъ гд҇ь повѣ́дати всѧ҄ чѹдеса̀ є҆гѡ̀, ѩ҆̀же ѹ҆твердѝ гд҇ь вседержи́тель, ѹ҆тверди́тисѧ всемѹ̀ во сла́вѣ є҆гѡ̀;

¹⁸Бе́зднѹ и҆ се́рдце и҆зслѣ́дова и҆ въ кова́рствѣхъ и҆́хъ размы́сли: разѹмѣ̀ бо гд҇ь всѧ́ко вѣ́дѣнїе и҆ призрѣ̀ на зна́менїе вѣ́ка,

¹⁹возвѣща́ѧ мимошє́дшаѧ и҆ бѹ҄дѹщаѧ и҆ ѿкрыва́ѧ слѣды̀ та́йныхъ:

²⁰не пре́йде є҆гѡ̀ всѧ́ко помышле́нїе, не ѹ҆таи́сѧ ѿ негѡ̀ ни є҆ди́но сло́во.

²¹Вели҄чїѧ премѹ́дрости своеѧ̀ ѹ҆красѝ: и҆́же є҆́сть пре́жде вѣ́ка и҆ во вѣ́къ,

²²ни приложи́сѧ, ни ѹ҆ма́лисѧ и҆ не востре́бова ни є҆ди́нагѡ совѣ́тника.

²³Ко́ль всѧ҄ дѣла̀ є҆гѡ̀ вожделѣ҄нна, и҆ да́же до и҆́скры є҆́сть ви́дѣти.

²⁴Всѧ҄ сїѧ҄ живѹ́тъ и҆ пребыва́ютъ во вѣ́къ во всѣ́хъ тре́бованїихъ, и҆ всѧ҄ послѹ́шаютъ.

²⁵Всѧ҄ сѹгѹ҄ба, є҆ди́но проти́вѹ є҆ди́нагѡ: и҆ не сотворѝ ничто́же скѹ́дно.

²⁶Е҆ди́но ѿ є҆ди́нагѡ ѹ҆твердѝ блага҄ѧ: и҆ кто̀ насы́титсѧ, зрѧ̀ сла́вѹ є҆гѡ̀;