Read Библия Церковнославянская Сiрахъ 43 Bible Online

Сiрахъ 43 - Библия Церковнославянская bible

Сiрахъ 43

¹Сла́ва высоты̀, тве́рдь чистоты̀, зра́къ небесѐ въ видѣ́нїи сла́вы.

²Со́лнце во ѩ҆вле́нїи возвѣща́ющее во и҆схо́дѣ сосѹ́дъ ди́венъ, дѣ́ло вы́шнѧгѡ.

³Въ полѹ́дни свое́мъ и҆зсѹша́етъ странѹ̀, и҆ прѧ́мѡ ва́рѹ є҆гѡ̀ кто̀ постои́тъ;

⁴(А҆́ки) пе́щь ды́шѹщее въ дѣ́лѣхъ ва́ра, трегѹ́бѡ со́лнце пожига́ющее го́ры: воскѹрє́нїѧ ѻ҆́гнєннаѧ и҆зды́шѹщее и҆ простира́ющее лѹчи҄ ѡ҆мрача́етъ ѻ҆́чи.

⁵Ве́лїй гд҇ь сотвори́вый є҆̀, и҆ словесы̀ свои́ми ѹ҆скорѝ ше́ствїе.

⁶И҆ лѹна̀ всѣ҄мъ во своѐ вре́мѧ ѩ҆влѧ́етъ лѣ҄та и҆ зна́менїе вѣ́ка.

⁷Ѿ лѹны̀ зна́менїе пра́здника: свѣти́ло ѹ҆малѧ́ющеесѧ до конца̀.

⁸Мц҇ъ по и҆́мени своемѹ̀ є҆́сть, возраста́ющь ди́внѡ во и҆змѣне́нїи.

⁹Сосѹ́дъ ѡ҆полче́нїй на высотѣ̀, на тве́рди небе́снѣй сїѧ́ющь.

¹⁰Добро́та небесѐ, сла́ва ѕвѣ́здъ, красота̀ свѣтѧ́щисѧ на высо́кихъ гд҇нихъ:

¹¹словесы̀ ст҃а́гѡ ста́нѹтъ по чи́нѹ и҆ не и҆́мѹтъ ѡ҆слабѣ́ти въ стражба́хъ свои́хъ.

¹²Ви́ждь дѹгѹ̀ и҆ благословѝ сотво́ршаго ю҆̀, ѕѣлѡ̀ прекра́сна сїѧ́нїемъ свои́мъ:

¹³ѡ҆крѹжѝ не́бо ѡ҆крѹже́нїемъ сла́вы, рѹ́цѣ вы́шнѧгѡ простро́стѣ ю҆̀.

¹⁴Повелѣ́нїемъ є҆гѡ̀ потща́сѧ снѣ́гъ, и҆ ѹ҆скорѧ́етъ мо́лнїю сѹдбо́ю свое́ю.

¹⁵Сегѡ̀ ра́ди ѿверзо́шасѧ сокрѡ́вища, и҆ парѧ́тъ ѡ҆́блацы ѩ҆́кѡ пти҄цы.

¹⁶Вели́чїемъ свои́мъ ѹ҆крѣпѝ ѡ҆́блаки, и҆ сокрѹши́шасѧ ка́менїе гра́дное:

¹⁷и҆ воззрѣ́нїемъ є҆гѡ̀ подви́жѹтсѧ го́ры, и҆ во́лею є҆гѡ̀ возвѣ́етъ ю҆́гъ.

¹⁸Гла́съ гро́ма є҆гѡ̀ поразѝ зе́млю, и҆ бѹ́рѧ сѣ́верова и҆ ви́хорь вѣ́тра.

¹⁹ѩ҆́кѡ пти҄цы парѧ́щыѧ сы́плетъ снѣ́гъ, и҆ ѩ҆́коже прѹ́зи садѧ́щїисѧ спадє́нїѧ є҆гѡ̀.

²⁰Добро́тѣ бѣ́лости є҆гѡ̀ подиви́тсѧ ѻ҆́ко, и҆ ѡ҆ дождѝ є҆гѡ̀ ѹ҆жа́снетсѧ се́рдце.

²¹И҆ сла́нѹ ѩ҆́кѡ со́ль на зе́млю сы́плетъ, и҆ сме́рзшисѧ быва́етъ на концы̀ ѻ҆стра̀.

²²Стѹде́нъ вѣ́тръ сѣ́верный возвѣ́етъ, и҆ сме́рзнетсѧ ле́дъ ѿ воды̀: на всѧ́цѣмъ собра́нїи воднѣ́мъ ѡ҆бита́ти и҆́мать, и҆ а҆́ки во броню̀ ѡ҆блече́тсѧ вода̀.

²³Поѧ́стъ го́ры и҆ пѹсты҄ни пожже́тъ, и҆ ѹ҆гаси́тъ травѹ̀ ѩ҆́кѡ ѻ҆́гнь.

²⁴И҆зцѣле́нїе всѣ́хъ со тща́нїемъ мгла̀: роса̀ срѣта́ющаѧ ѿ ва́ра ѹ҆тиши́тъ.

²⁵Мы́слїю є҆гѡ̀ преста̀ бе́здна, и҆ насадѝ въ не́й (гд҇ь) ѻ҆́стровы.

²⁶Пла́вающїи по мо́рю повѣ́даютъ бѣ́дство є҆гѡ̀, и҆ слѹ́хомъ ѹ҆ше́съ на́шихъ чѹди́мсѧ,

²⁷и҆ та́мѡ (сѹ́ть) пресла҄вна и҆ чѹ҄дна дѣла̀ є҆гѡ̀, разли́чїе всѧ́кагѡ живо́тнагѡ, созда́нїе ки́тѡвъ.

²⁸И҆́мъ благополѹ́чный коне́цъ сво́й полѹча́ютъ и҆ сло́вомъ є҆гѡ̀ составлѧ́ютсѧ всѧ́чєскаѧ.

²⁹Мно́гѡ и҆́мамы рещѝ, и҆ не и҆́мамы пости́гнѹти, и҆ сконча́нїе слове́съ: всѐ є҆́сть то́й.

³⁰Сла́вѧще є҆го̀ гдѣ̀ ѹ҆крѣпи́мсѧ; то́й бо вели́къ па́че всѣ́хъ дѣ́лъ свои́хъ:

³¹стра́шенъ гд҇ь и҆ вели́къ ѕѣлѡ̀, и҆ чѹ́дно могѹ́тство є҆гѡ̀.

³²Сла́вѧще гд҇а вознеси́те, є҆ли́кѡ а҆́ще мо́жете, превзы́детъ бо и҆ є҆щѐ:

³³возносѧ́ще є҆го̀ ѹ҆мно́житесѧ крѣ́постїю: не трѹди́тесѧ, не и҆́мате бо пости́гнѹти.

³⁴Кто̀ ви́дѣ є҆го̀ и҆ и҆сповѣ́сть; и҆ кто̀ возвели́читъ є҆го̀, ѩ҆́коже є҆́сть;

³⁵Мнѡ́га сокровє́на сѹ́ть вѧ҄щшаѧ си́хъ: ма҄лаѧ бо ви́дѣхомъ дѣ́лъ є҆гѡ̀.

³⁶Всѧ҄ бо сотворѝ гд҇ь и҆ бл҃гочести́вымъ дадѐ премѹ́дрость.