Read Библия Церковнославянская Сiрахъ 44 Bible Online

Сiрахъ 44 - Библия Церковнославянская bible

Сiрахъ 44

¹Восхва́лимъ ѹ҆́бѡ мѹ́жы сла҄вны и҆ ѻ҆тцы̀ на́шѧ въ бытїѝ.

²Мно́гѹ сла́вѹ созда̀ гд҇ь въ ни́хъ вели́чїемъ свои́мъ ѿ вѣ́ка.

³Госпо́дствѹюще во ца́рствїихъ свои́хъ и҆ мѹ́жїе и҆мени́ти си́лою, совѣ́тѹюще ра́зѹмомъ свои́мъ, провѣща́вшїи во про҇ро́чествахъ,

⁴старѣ҄йшины люді́й въ совѣ́тѣхъ и҆ въ ра́зѹмѣ писа҄нїѧ люді́й:

⁵премѹ҄драѧ словеса̀ въ наказа́нїи и҆́хъ, и҆́щѹще гла́са мѹсїкі́йска и҆ повѣ́дающе пѡ́вѣсти во писа́нїихъ:

⁶мѹ́жїе бога́тїи, ѡ҆бдарова́ни крѣ́постїю, ми́рнѡ живѹ́ще въ жили́щихъ свои́хъ.

⁷Всѝ сі́и въ ро́дѣхъ просла́влени бы́ша, и҆ во дне́хъ и҆́хъ похвала̀.

⁸Сѹ́ть ѿ ни́хъ, и҆́же ѡ҆ста́виша и҆́мѧ, є҆́же повѣ́дати хвалы҄: и҆ сѹ́ть, и҆́хже нѣ́сть па́мѧти, и҆ погибо́ша ѩ҆́кѡ не сѹ́щїи, и҆ бы́ша ѩ҆́кѡ не бы́вше, и҆ ча҄да и҆́хъ по ни́хъ.

⁹Но сі́и мѹ́жїе ми́лостивїи, и҆́хже пра҄вды не забвє́ны бы́ша:

¹⁰съ сѣ́менемъ и҆́хъ пребѹ́детъ до́брое наслѣ́дїе, и҆зча҄дїѧ и҆́хъ въ завѣ́тѣхъ:

¹¹ѡ҆ста́сѧ сѣ́мѧ и҆́хъ, и҆ ча҄да и҆́хъ по ни́хъ:

¹²до вѣ́ка пребѹ́детъ сѣ́мѧ и҆́хъ, и҆ сла́ва и҆́хъ не потреби́тсѧ:

¹³тѣлеса̀ и҆́хъ въ ми́рѣ погребє́на бы́ша, а҆ и҆мена̀ и҆́хъ живѹ́тъ въ ро́ды.

¹⁴Премѹ́дрость и҆́хъ повѣ́дѧтъ лю́дїе, и҆ похвалѹ̀ и҆́хъ и҆сповѣ́сть цр҃ковь.

¹⁵Е҆нѡ́хъ ѹ҆годѝ гд҇еви и҆ преложи́сѧ, ѡ҆́бразъ покаѧ́нїѧ родѡ́мъ.

¹⁶Нѡ́е ѡ҆брѣ́тесѧ соверше́нъ, пра́веденъ, во вре́мѧ гнѣ́ва бы́сть примире́нїе:

¹⁷сегѡ̀ ра́ди бы́сть ѡ҆ста́нокъ землѝ, є҆гда̀ бѧ́ше пото́пъ.

¹⁸Завѣ́ты вѣ́чнїи положе́ни бы́ша съ ни́мъ, да не потреби́тсѧ пото́помъ всѧ́ка пло́ть.

¹⁹А҆враа́мъ вели́кїй ѻ҆те́цъ мно́жествѹ ѩ҆зы́кѡвъ, и҆ не ѡ҆брѣ́тесѧ подо́бный во сла́вѣ є҆гѡ̀:

²⁰и҆́же соблюдѐ зако́нъ вы́шнѧгѡ и҆ бы́сть въ завѣ́тѣ съ ни́мъ:

²¹и҆ на пло́ти є҆гѡ̀ ѹ҆ста́ви завѣ́тъ и҆ во и҆скѹше́нїи ѡ҆брѣ́тесѧ вѣ́ренъ:

²²сегѡ̀ ра́ди клѧ́твою поста́ви съ ни́мъ благослови́тисѧ ѩ҆зы́кѡмъ ѡ҆ сѣ́мени є҆гѡ̀,

²³ѹ҆мно́жити є҆го̀ ѩ҆́кѡ пе́рсть землѝ, и҆ ѩ҆́кѡ ѕвѣ́зды возвы́сити сѣ́мѧ є҆гѡ̀, и҆ наслѣ́дити и҆̀мъ ѿ мо́рѧ до мо́рѧ и҆ ѿ рѣкѝ до кра́ѧ землѝ.

²⁴И҆ ѡ҆ ї҆саа́цѣ ѹ҆твердѝ си́це а҆враа́ма ра́ди ѻ҆тца̀ є҆гѡ̀ благослове́нїе всѣ́хъ человѣ́кѡвъ и҆ завѣ́тъ:

²⁵и҆ почѝ на главѣ̀ ї҆а́кѡвли.

²⁶Позна̀ є҆го̀ блг҇вє́нїи свои́ми и҆ дадѐ є҆го̀ въ наслѣ́дїе, и҆ раздѣлѝ ча҄сти є҆гѡ̀ на колѣ́нъ двана́десѧть,

²⁷и҆ и҆зведѐ ѿ негѡ̀ мѹ́жа ми́лости, ѡ҆брѣ́тшаго благода́ть пред̾ ѻ҆чесы̀ всѧ́кїѧ пло́ти.