Read Библия Церковнославянская Сiрахъ 45 Bible Online

Сiрахъ 45 - Библия Церковнославянская bible

Сiрахъ 45

¹Возлю́бленный бг҃омъ и҆ челѡвѣ́ки мѡѷсе́й, є҆гѡ́же па́мѧть во благослове́нїихъ.

²Ѹ҆подо́билъ є҆́сть є҆го̀ сла́вѣ ст҃ы́хъ и҆ возвели́чи є҆го̀ во стра́сѣ врагѡ́въ.

³Во словесѣ́хъ є҆гѡ̀ зна́мєнїѧ ѹ҆ста́ви и҆ просла́ви є҆го̀ пред̾ лице́мъ царе́й: заповѣ́да є҆мѹ̀ къ лю́демъ свои҄мъ и҆ показа̀ є҆мѹ̀ сла́вѹ свою̀:

⁴въ вѣ́рѣ и҆ кро́тости є҆гѡ̀ ѡ҆ст҃ѝ є҆го̀, и҆збра̀ є҆го̀ ѿ всѧ́кїѧ пло́ти.

⁵Слы́шанъ сотвори́лъ є҆́сть є҆мѹ̀ гла́съ сво́й и҆ введѐ є҆го̀ во мглѹ̀,

⁶и҆ дадѐ є҆мѹ̀ пред̾ лице́мъ за́пѡвѣди, зако́нъ жи́зни и҆ вѣ́дѣнїѧ, є҆́же наѹчи́ти ї҆а́кѡва завѣ́тѹ и҆ сѹдба́мъ є҆гѡ̀ ї҆и҃лѧ.

⁷А҆арѡ́на возвы́си ст҃а, подо́бна є҆мѹ̀ бра́та є҆гѡ̀ ѿ колѣ́на леѵі́ина,

⁸поста́ви є҆мѹ̀ завѣ́тъ вѣ́ченъ и҆ дадѐ є҆мѹ̀ ї҆ере́йство люді́й, ѹ҆блажѝ є҆го̀ благоѹкраше́нїемъ и҆ препоѧ́са є҆го̀ ѻ҆де́ждою сла́вы,

⁹ѡ҆блечѐ є҆го̀ въ соверше́нїе хвале́нїѧ и҆ ѹ҆твердѝ є҆го̀ сосѹ́дами крѣ́пости,

¹⁰ѡ҆сте́гнми и҆ поди́ромъ и҆ є҆пѡмі́дою,

¹¹и҆ ѡ҆крѹжѝ є҆го̀ шипки҄ златы́ми и҆ звонцы҄ мно́гими ѡ҆́крестъ, глаша́ти гла́съ во стѹпа́нїихъ є҆гѡ̀, слы́шанъ твори́ти гла́съ въ це́ркви въ па́мѧть сынѡ́мъ люді́й свои́хъ:

¹²ѻ҆де́ждою ст҃о́ю, со зла́томъ и҆ ѵ҆акі́нѳомъ и҆ порфѵ́рою, дѣ́ломъ пестродѣ́лца, сло́вомъ сѹда̀, ѩ҆вле́ньми и҆́стины,

¹³и҆стка́нною багрѧ́ностїю, дѣ́ломъ хѹдо́жничимъ, ка́мєнїи многоцѣ́нными, и҆зваѧ́ньми печа́ти, въ свѧза́нїи зла́та, дѣ́ломъ каменнодѣ́лателѧ, на па́мѧть въ писа́нїи и҆зва́ѧннѣмъ по числѹ̀ колѣ́нъ ї҆и҃левыхъ:

¹⁴вѣне́цъ зла́тъ верхѹ̀ кїда́ра, и҆з̾ѡбраже́нїе печа́ти ст҃ы́ни, похвала̀ че́сти, дѣ́ло крѣ́пости, вожделѣ҄нїѧ ѻ҆че́съ краси҄ма прекра҄сна.

¹⁵Пре́жде є҆гѡ̀ не бы́ша такѡва́ѧ до вѣ́ка.

¹⁶Не ѡ҆блече́сѧ и҆ноплеме́нникъ, то́чїю сы́нове є҆гѡ̀ и҆ внѹ́чата є҆гѡ̀ пр҇нѡ.

¹⁷Жє́ртвы и҆́хъ приноси҄мы бѧ́хѹ по всѧ҄ дни҄ непреста́ннѡ два́жды.

¹⁸И҆спо́лни мѡѷсе́й рѹ́цѣ и҆ пома́за є҆го̀ є҆ле́емъ ст҃ы́мъ.

¹⁹Бы́сть є҆мѹ̀ въ завѣ́тъ вѣ́ченъ, и҆ сѣ́мени є҆гѡ̀ во дне́хъ не́ба, слѹжи́ти є҆мѹ̀ вкѹ́пѣ и҆ свѧще́нствовати, и҆ благословлѧ́ти лю́ди є҆гѡ̀ и҆́менемъ є҆гѡ̀.

²⁰И҆збра̀ є҆го̀ ѿ всѣ́хъ живы́хъ принестѝ же́ртвѹ гд҇еви, ѳѷмїа́мъ и҆ благоѹха́нїе на па́мѧть, на ѡ҆чище́нїе лю́демъ свои҄мъ.

²¹Дадѐ є҆мѹ̀ за́пѡвѣди своѧ҄, вла́сть въ завѣ́тѣхъ сѹде́бъ, наѹчи́ти ї҆а́кѡва свидѣ́нїємъ и҆ въ зако́нѣ є҆гѡ̀ просвѣти́ти ї҆и҃лѧ.

²²Воста́ша на́нь чѹжді́и, и҆ возревнова́ша є҆мѹ̀ въ пѹсты́ни мѹ́жїе, и҆́же при даѳа́нѣ и҆ а҆вїрѡ́нѣ, и҆ со́нмъ коре́овъ въ ѩ҆́рости и҆ гнѣ́вѣ.

²³Ви́дѣ гд҇ь и҆ не бл҃говолѝ, и҆ сконча́шасѧ ѩ҆́ростїю гнѣ́ва:

²⁴сотворѝ въ ни́хъ зна́мєнїѧ, погѹби́ти ѧ҆̀ ѻ҆гне́мъ пла́мене.

²⁵И҆ приложѝ а҆арѡ́нови сла́вѹ и҆ дадѐ є҆мѹ̀ наслѣ́дїе: нача́тки пе́рвыхъ жи҄тъ раздѣлѝ є҆мѹ̀.

²⁶Хлѣ́бъ въ пе́рвыхъ ѹ҆гото́ва на сы́тость: и҆́бо жє́ртвы гд҇ни ѩ҆́сти бѹ́дѹтъ, ѩ҆̀же дадѐ є҆мѹ̀ и҆ сѣ́мени є҆гѡ̀.

²⁷Ѻ҆ба́че въ землѝ люді́й не наслѣ́дствитъ, и҆ въ лю́дехъ не бѹ́детъ є҆мѹ̀ ча́сти: са́мъ бо ча́сть є҆гѡ̀ и҆ наслѣ́дїе.

²⁸И҆ фїнее́съ сы́нъ є҆леаза́ровъ тре́тїй во сла́вѣ, є҆гда̀ ревнова́ше стра́хѹ гд҇ню, и҆ ста̀ въ превраще́нїи люді́й бла́гостїю ѹ҆се́рдїѧ дѹшѝ своеѧ̀, и҆ ѹ҆молѝ ѡ҆ ї҆и҃ли.

²⁹Сегѡ̀ ра́ди поста́вленъ є҆мѹ̀ бы́сть завѣ́тъ ми́ренъ, предста́телемъ бы́ти ст҃ы́хъ и҆ лю́демъ є҆гѡ̀, да бѹ́детъ є҆мѹ̀ и҆ сѣ́мени є҆гѡ̀ свѧще́нства вели́чество во вѣ́къ.

³⁰И҆ завѣ́тъ даві́дѹ, сы́нѹ ї҆ессе́овѹ ѿ колѣ́на ї҆ѹ́дова, наслѣ́дство царѧ̀ сы́на ѿ сы́на є҆ди́нагѡ: достоѧ́нїе свѧще́нства а҆арѡ́нѹ и҆ сѣ́мени є҆гѡ̀.

³¹Да да́стъ на́мъ премѹ́дрость въ сердца́хъ на́шихъ сѹди́ти лю́демъ є҆гѡ̀ въ пра́вдѹ, да не потребѧ́тсѧ блага҄ѧ и҆́хъ и҆ сла́ва и҆́хъ въ ро́ды и҆́хъ.