Read Библия Церковнославянская Сiрахъ 46 Bible Online

Сiрахъ 46 - Библия Церковнославянская bible

Сiрахъ 46

¹Крѣ́покъ на бра́нехъ ї҆исѹ́съ наѵи́нъ и҆ прее́мникъ мѡѷсе́овъ бы́сть во про҇ро́чествѣ:

²и҆́же бы́сть по и҆́мени своемѹ̀ вели́къ на спасе́нїе и҆збра́нныхъ є҆гѡ̀, мсти́ти востаю́щымъ (на́нь) врагѡ́мъ, ѩ҆́кѡ да наслѣ́дствитъ ї҆и҃лѧ.

³Ко́ль просла́вленъ бы́сть воздвиже́нїемъ рѹ́къ свои́хъ, и҆ внегда̀ простира́ше ме́чь на гра́ды.

⁴Кто̀ пре́жде є҆гѡ̀ си́це ста̀; бра҄ни бо гд҇ни то́й вожда́ше.

⁵Не рѹко́ю ли є҆гѡ̀ воспѧти́сѧ со́лнце, и҆ є҆ди́нъ де́нь бы́сть ѩ҆́кѡ два̀;

⁶Призва̀ вы́шнѧго си́льна, є҆гда̀ ѡ҆скорблѧ́хѹ є҆го̀ вразѝ ѡ҆́крестъ, и҆ послѹ́ша є҆го̀ ве́лїй гд҇ь: ка́менїемъ гра́днымъ си́лы крѣ́пкїѧ

⁷ѹ҆стремѝ бра́нь на ѩ҆зы́ки, и҆схожде́нїемъ погѹбѝ проти́вники,

⁸да позна́ютъ ѩ҆зы́цы всеѻрѹ́жїе є҆гѡ̀, ѩ҆́кѡ пред̾ гд҇емъ бра́нь є҆гѡ̀: и҆́бо послѣ́дова могѹ́тномѹ.

⁹И҆ во дни҄ мѡѷсе́ѡвы сотворѝ ми́лость се́й и҆ хале́въ сы́нъ ї҆ефонні́инъ, ста́ти проти́вѹ врага̀, ѹ҆держа́ти лю́ди ѿ грѣ҄хъ и҆ ѹ҆толи́ти ро́потъ лѹка́вства:

¹⁰и҆ та҄ два̀ сѹ҄ща спасє́на бы́ста ѿ шестѝ сѡ́тъ ты́сѧщъ пѣшцє́въ, ввестѝ и҆̀хъ въ наслѣ́дствїе, въ зе́млю точа́щѹю млеко̀ и҆ ме́дъ.

¹¹И҆ дадѐ гд҇ь хале́вѹ крѣ́пость, и҆ да́же до ста́рости пребы́сть ѹ҆ негѡ̀, взы́ти є҆мѹ̀ на высотѹ̀ землѝ, и҆ сѣ́мѧ є҆гѡ̀ ѡ҆бдержа̀ наслѣ́дїе:

¹²ѩ҆́кѡ да ви́дѧтъ всѝ сы́нове ї҆и҃лєвы, ѩ҆́кѡ добро̀ ходи́ти в̾слѣ́дъ гд҇а.

¹³И҆ сѹдїи҄ кі́йждо и҆́менемъ свои́мъ, є҆ли́кихъ не любодѣ́йствова се́рдце, и҆ є҆ли́цы не ѿврати́шасѧ ѿ гд҇а, и҆ па́мѧть и҆́хъ во благослове́нїихъ:

¹⁴кѡ́сти и҆́хъ да процвѣтѹ́тъ ѿ мѣ́ста и҆́хъ,

¹⁵и҆ и҆́мѧ и҆́хъ премѣнѧ́емо на сынѣ́хъ, просла́влєннымъ бы́вшымъ и҆̀мъ.

¹⁶Возлю́бленъ гд҇емъ свои́мъ самѹи́лъ про҇ро́къ гд҇ень ѹ҆стро́и ца́рство и҆ пома́за кнѧ҄зи над̾ людьмѝ є҆гѡ̀:

¹⁷зако́номъ гд҇нимъ сѹдѝ со́нмѹ, и҆ посѣтѝ гд҇ь ї҆а́кѡва:

¹⁸вѣ́рою свое́ю и҆спы́танъ бы́сть про҇ро́къ, и҆ позна́нъ бы́сть въ вѣ́рѣ свое́й вѣ́ренъ видѣ́нїемъ.

¹⁹И҆ призва̀ гд҇а си́льна, є҆гда̀ ѡ҆скорблѧ́хѹ є҆го̀ вразѝ є҆гѡ̀ ѡ҆́крестъ, приноше́нїемъ а҆́гнца ссѹ́щагѡ млеко̀:

²⁰и҆ возгремѣ̀ съ небесѐ гд҇ь и҆ гла́сомъ ве́лїимъ ѹ҆слы́шанъ сотворѝ гла́съ сво́й:

²¹и҆ потребѝ влады҄ки тѵ҄рскїѧ, и҆ всѧ҄ кнѧ҄зи фѷлїстї҄мскїѧ.

²²И҆ пре́жде вре́мене ѹ҆спе́нїѧ вѣ́ка свидѣ́телствова пред̾ гд҇емъ и҆ хрїсто́мъ є҆гѡ̀: и҆мѣ́нїѧ и҆ до сапѡ́гъ ѿ всѧ́кїѧ пло́ти не взѧ́хъ: и҆ не сотворѝ є҆мѹ̀ поноше́нїѧ (ни є҆ди́нъ) человѣ́къ.

²³И҆ по ѹ҆спе́нїи свое́мъ про҇ро́чествова и҆ показа̀ царе́ви кончи́нѹ є҆гѡ̀: и҆ вознесѐ ѿ землѝ гла́съ сво́й, про҇ро́чествомъ и҆стреби́ти беззако́нїе люді́й.