Read Библия Церковнославянская Сiрахъ 47 Bible Online

Сiрахъ 47 - Библия Церковнославянская bible

Сiрахъ 47

¹И҆ по се́мъ воста̀ наѳа́нъ про҇ро́чествовати во дни҄ даві́дѡвы.

²ѩ҆́коже тѹ́къ ѿлѹче́нъ ѿ же́ртвы ми́рныѧ, та́кѡ даві́дъ ѿ сынѡ́въ ї҆и҃левыхъ.

³Со львы҄ и҆гра́ше ѩ҆́кѡ съ кѡ́злищи и҆ съ медвѣ́дми ѩ҆́кѡ со а҆́гнцы ѻ҆́вчими.

⁴Во ю҆́ности свое́й не ѹ҆би́лъ ли и҆споли́на, и҆ ѿѧ́тъ поноше́нїе ѿ люді́й,

⁵є҆гда̀ прострѐ рѹ́кѹ съ ка́менемъ и҆з̾ пра́щи низложи́ти горды́ню голїа́ѳовѹ;

⁶Призва́ бо гд҇а вы́шнѧгѡ, и҆ вдадѐ въ десни́цѹ є҆гѡ̀ крѣ́пость низложи́ти человѣ́ка си́льна на бра́ни, вознестѝ ро́гъ люді́й свои́хъ.

⁷Си́це во тма́хъ просла́ви є҆го̀ и҆ восхвалѝ є҆го̀ во блг҇ве́нїихъ гд҇нихъ, внегда̀ носи́ти є҆мѹ̀ вѣне́цъ сла́вы.

⁸Потреби́ бо врагѝ ѡ҆́крестъ и҆ ѹ҆ничижѝ фѷлїсті́млѧны проти́вники: да́же додне́сь сокрѹшѝ и҆̀мъ ро́гъ.

⁹Во всѧ́цѣмъ дѣ́лѣ свое́мъ дадѐ и҆сповѣ́данїе ст҃о́мѹ вы́шнемѹ глаго́ломъ сла́вы:

¹⁰всѣ́мъ се́рдцемъ свои́мъ восхвалѝ и҆ возлюбѝ сотво́ршаго и҆̀.

¹¹И҆ поста́ви пѣвцы̀ прѧ́мѡ ѻ҆лтаре́ви, и҆ звѹ́комъ и҆́хъ ѹ҆слажда́ти пѣ́нїе.

¹²Дадѐ во пра́здницѣхъ благолѣ́пїе и҆ ѹ҆красѝ времена̀ да́же до сконча́нїѧ, внегда̀ воспѣва́ти и҆̀мъ и҆́мѧ ст҃о́е є҆гѡ̀ и҆ ѿ ѹ҆́тра гласи́ти во свѧти́лищи.

¹³Гд҇ь ѿѧ̀ грѣхѝ є҆гѡ̀ и҆ вознесѐ во вѣ́къ ро́гъ є҆гѡ̀, и҆ дадѐ є҆мѹ̀ завѣ́тъ ца́рскїй и҆ престо́лъ сла́вы во ї҆и҃ли.

¹⁴По се́мъ воста̀ сы́нъ разѹми́ченъ и҆ сегѡ̀ ра́ди ѡ҆бита̀ въ простра́нствѣ:

¹⁵соломѡ́нъ воцари́сѧ во дне́хъ ми́ра, ѩ҆́кѡ бг҃ъ препоко́и ѡ҆́крестъ, да сози́ждетъ до́мъ во и҆́мѧ є҆гѡ̀ и҆ да ѹ҆гото́витъ свѧти́лище во вѣ́къ.

¹⁶Ко́ль преѹмѹдри́лсѧ є҆сѝ во ю҆́ности свое́й и҆ напо́лнилсѧ є҆сѝ ѩ҆́кѡ рѣка̀ ра́зѹма.

¹⁷Зе́млю покры̀ дѹша̀ твоѧ̀, и҆ и҆спо́лнилъ є҆сѝ при́тчами гада́нїй:

¹⁸про́йде и҆́мѧ твоѐ во ѻ҆́стровы дале́че, и҆ возлю́бленъ бы́лъ є҆сѝ въ ми́рѣ твое́мъ.

¹⁹Въ пѣ́снехъ и҆ парїмїа́хъ и҆ во при́тчахъ и҆ во сказа́нїихъ ѹ҆диви́шасѧ тебѣ̀ страны҄.

²⁰И҆́менемъ гд҇а бг҃а, нарѣче́ннагѡ бг҃а ї҆и҃лева,

²¹собра́лъ є҆сѝ ѩ҆́кѡ мѣ́дь зла́то и҆ ѩ҆́кѡ ѻ҆́лово ѹ҆мно́жилъ є҆сѝ сребро̀.

²²Вда́лъ є҆сѝ бока̀ твоѧ҄ жена́мъ и҆ порабо́тилсѧ є҆сѝ тѣ́ломъ твои́мъ:

²³да́лъ є҆сѝ поро́къ сла́вѣ твое́й и҆ ѡ҆скверни́лъ є҆сѝ сѣ́мѧ твоѐ, нанестѝ гнѣ́въ на ча҄да твоѧ҄, и҆ ѹ҆мили́тисѧ ѡ҆ безѹ́мїи твое́мъ: є҆́же раздѣли́тисѧ на дво́е ца́рствѹ, и҆ ѿ є҆фре́ма нача́тисѧ ца́рствѹ непокори́вѹ.

²⁴Гд҇ь же не ѡ҆ста́витъ мл҇ти своеѧ̀ и҆ не растли́тъ ѿ дѣ́лъ свои́хъ, нижѐ и҆стреби́тъ и҆збра́ннагѡ своегѡ̀ и҆зча́дїй и҆ сѣ́мѧ возлюби́вшагѡ є҆го̀ не и҆́зметъ.

²⁵И҆ ї҆а́кѡвѹ дадѐ ѡ҆ста́нокъ, и҆ даві́дѹ ѿ негѡ̀ ко́рень.

²⁶И҆ почѝ соломѡ́нъ со ѻ҆тцы҄ свои́ми

²⁷и҆ ѡ҆ста́ви по себѣ̀ ѿ сѣ́мене своегѡ̀ лю́демъ безѹ́мїе,

²⁸и҆ ѹ҆малѧ́ющасѧ ра́зѹмомъ ровоа́ма, и҆́же ѿста́ви лю́ди ѿ совѣ́та своегѡ̀,

²⁹и҆ ї҆еровоа́ма сы́на нава́това, и҆́же сотворѝ согрѣши́ти ї҆и҃лю и҆ дадѐ є҆фре́мѹ пѹ́ть ко грѣхѹ̀.

³⁰И҆ ѹ҆мно́жишасѧ грѣсѝ и҆́хъ ѕѣлѡ̀, ѿстѹпи́ти и҆̀мъ ѿ землѝ своеѧ̀:

³¹и҆ всѧ́ко лѹка́вство и҆зыска́ша, до́ндеже ме́сть прїи́де на нѧ̀.