Read Библия Церковнославянская Сiрахъ 48 Bible Online

Сiрахъ 48 - Библия Церковнославянская bible

Сiрахъ 48

¹И҆ воста̀ и҆лїа̀ про҇ро́къ ѩ҆́кѡ ѻ҆́гнь, и҆ сло́во є҆гѡ̀ ѩ҆́кѡ свѣща̀ горѧ́ше:

²и҆́же нанесѐ на нѧ̀ гла́дъ и҆ ре́вностїю свое́ю ѹ҆ма́ли ѧ҆̀,

³сло́вомъ гд҇нимъ ѹ҆держа̀ не́бо и҆ сведѐ та́кѡ три́жды ѻ҆́гнь съ небесѐ.

⁴Ко́ль просла́вилсѧ є҆сѝ, и҆лїѐ, чѹдесы̀ твои́ми, и҆ кто̀ подо́бенъ тебѣ̀ похвали́тисѧ;

⁵Воздви́гнѹвъ мертвеца̀ ѿ сме́рти и҆ и҆з̾ а҆́да сло́вомъ вы́шнѧгѡ,

⁶сведы́й цари҄ въ па́гѹбѹ и҆ просла́влєнныѧ ѿ ѻ҆дра̀ и҆́хъ,

⁷слы́шавый въ сїна́и ѡ҆бличе́нїе и҆ въ хѡри́вѣ сѹдбы҄ ѿмще́нїѧ,

⁸помазѹ́ѧй цари҄ на воздаѧ́нїе и҆ про҇ро́ки прее́мники по себѣ̀,

⁹взѧ́выйсѧ ви́хромъ ѻ҆́гненнымъ на колесни́цѣ ко́ней ѻ҆́гненныхъ,

¹⁰впи́санъ во ѡ҆бличє́нїѧ на времена̀, ѹ҆толи́ти гнѣ́въ пре́жде ѩ҆́рости и҆ ѡ҆брати́ти се́рдце ѻ҆́тчее къ сы́нѹ и҆ ѹ҆стро́ити кѡлѣ́на ї҆а҄кѡвлѧ.

¹¹Блаже́ни ви́дѣвшїи тѧ̀ и҆ любо́вїю ѹ҆кра́шеннїи.

¹²И҆́бо мы̀ житїе́мъ поживе́мъ.

¹³И҆лїа̀, и҆́же ви́хромъ покрове́нъ бы́сть, и҆ є҆лїссе́й и҆спо́лнисѧ дѹ́ха є҆гѡ̀ и҆ во дни҄ своѧ҄ не поколеба́сѧ ѿ кнѧзе́й, и҆ не премо́же є҆гѡ̀ никто́же:

¹⁴всѧ́ко сло́во не превзы́де є҆гѡ̀, и҆ во ѹ҆спе́нїи про҇ро́чествова тѣ́ло є҆гѡ̀:

¹⁵и҆ въ житїѝ свое́мъ сотворѝ чѹдеса̀, и҆ во ѹ҆ме́ртвїи ди҄вна дѣла̀ є҆гѡ̀.

¹⁶Во всѣ́хъ си́хъ не пока́ѧшасѧ лю́дїе и҆ не ѿстѹпи́ша ѿ грѣ҄хъ свои́хъ, до́ндеже плѣне́ни бы́ша ѿ землѝ своеѧ̀ и҆ расточе́ни бы́ша по все́й землѝ.

¹⁷И҆ ѡ҆ста́сѧ люді́й ма́лѡ, и҆ кнѧ́зь въ домѹ̀ даві́довѣ.

¹⁸Нѣ́цыи ѹ҆́бѡ ѿ ни́хъ сотвори́ша ѹ҆го́дное, нѣ́цыи же ѹ҆мно́жиша грѣхѝ.

¹⁹Е҆зекі́а ѹ҆твердѝ гра́дъ сво́й и҆ введѐ посредѣ̀ є҆гѡ̀ во́дѹ: и҆скопа̀ желѣ́зомъ ка́мень и҆ созда̀ и҆сто́чники вода́мъ.

²⁰Во дне́хъ є҆гѡ̀ взы́де сеннахирі́мъ и҆ посла̀ раѱа́ка, и҆ воздви́же рѹ́кѹ свою̀ на сїѡ́на и҆ возвели́чисѧ горды́нею свое́ю.

²¹Тогда̀ подвиго́шасѧ сердца̀ и҆ рѹ́цѣ и҆́хъ, и҆ поболѣ́ша ѩ҆́кѡ ражда́ющыѧ.

²²И҆ помоли́шасѧ гд҇ѹ мл҇тивомѹ, воздѣ́вше рѹ́ки своѧ҄ къ немѹ̀:

²³и҆ ст҃ы́й съ нб҃сѐ ско́рѡ ѹ҆слы́ша ѧ҆̀ и҆ и҆зба́ви ѧ҆̀ рѹко́ю и҆са́їиною:

²⁴поразѝ полкѝ а҆ссѷрї҄йскїѧ, и҆ сокрѹшѝ ѧ҆̀ а҆́гг҃лъ є҆гѡ̀.

²⁵Сотвори́ бо є҆зекі́а ѹ҆го́дное гд҇еви и҆ ѹ҆крѣпи́сѧ на пѹте́хъ даві́да ѻ҆тца̀ своегѡ̀, ѩ҆̀же заповѣ́да и҆са́їа, про҇ро́къ ве́лїй и҆ вѣ́ренъ въ видѣ́нїи свое́мъ.

²⁶Во дне́хъ є҆гѡ̀ воспѧти́сѧ со́лнце, и҆ приложѝ житїѧ̀ царе́ви:

²⁷дѹ́хомъ ве́лїимъ ви́дѣ послѣ҄днѧѧ и҆ ѹ҆тѣ́ши сѣ́тѹющыѧ въ сїѡ́нѣ:

²⁸да́же до вѣ́ка показа̀ бѹ҄дѹщаѧ и҆ сокровє́наѧ, пре́жде не́же прїитѝ и҆̀мъ.