Read Библия Церковнославянская Сiрахъ 49 Bible Online

Сiрахъ 49 - Библия Церковнославянская bible

Сiрахъ 49

¹Па́мѧть ї҆ѡсі́ева въ сложе́нїе ѳѷмїа́ма, и҆ состро́еное дѣ́ломъ мѷрова́рника:

²во всѧ́цѣхъ ѹ҆стѣ́хъ ѩ҆́кѡ ме́дъ ѹ҆слади́тсѧ, и҆ ѩ҆́кѡ мѹсїкі́а въ пи́рѣ вїна̀.

³То́й ѹ҆пра́вленъ бы́сть во ѡ҆браще́нїе люді́й и҆ ѿѧ́тъ ме́рзѡсти беззако́нїѧ,

⁴и҆спра́ви ко гд҇ѹ се́рдце своѐ, во дни҄ беззако́нныхъ ѹ҆крѣпѝ бл҃гоче́стїе.

⁵Кромѣ̀ даві́да и҆ є҆зекі́и и҆ ї҆ѡсі́и, всѝ прегрѣши́ша прегрѣше́нїемъ,

⁶ѡ҆ста́виша бо зако́нъ вы́шнѧгѡ: ца́рїе ї҆ѹ҄дины ѡ҆скѹдѣ́ша,

⁷да́ша бо ро́гъ сво́й и҆нѣ҄мъ и҆ сла́вѹ свою̀ ѩ҆зы́кѹ чѹжде́мѹ,

⁸сожго́ша и҆збра́нъ гра́дъ ст҃ы́ни и҆ ѡ҆пѹстоши́ша пѹти҄ є҆гѡ̀ рѹко́ю ї҆еремі́иною:

⁹ѡ҆ѕло́биша бо є҆го̀, и҆ то́й во чре́вѣ ѡ҆свѧще́нъ бы́сть про҇ро́къ и҆скорени́ти и҆ ѡ҆ѕло́бити и҆ погѹби́ти, та́кожде созда́ти и҆ насади́ти.

¹⁰Ї҆езекі́иль, и҆́же ви́дѣ видѣ́нїе сла́вы, ю҆́же показа̀ є҆мѹ̀ въ колесни́цѣ херѹві́мстѣ:

¹¹помѧнѹ̀ бо врагѝ въ дождѝ, и҆ благосотвори́ти направлѧ́ющымъ пѹти҄.

¹²И҆ ѻ҆боюна́десѧте про҇ро́кѡвъ да процвѣтѹ́тъ кѡ́сти ѿ мѣ́стъ свои́хъ: ѹ҆тѣ́ши бо ї҆а́кѡва и҆ и҆зба́вилъ ѧ҆̀ вѣ́рою наде́жды.

¹³Ка́кѡ возвели́чимъ зорова́велѧ; и҆ се́й ѩ҆́кѡ печа́ть на деснѣ́й рѹцѣ̀:

¹⁴та́кожде ї҆исѹ́съ сы́нъ ї҆ѡседе́ковъ: и҆̀же во дни҄ своѧ҄ созда́ста до́мъ и҆ воздвиго́ста це́рковь ст҃ѹ гд҇еви, ѹ҆гото́ванѹ во сла́вѹ вѣ́ка.

¹⁵И҆ неемі́и на мно́зѣ (бѹ́ди) па́мѧть, воздви́гшемѹ на́мъ стѣ́ны па́дшыѧ и҆ поста́вльшемѹ двє́ри и҆ завѡ́ры и҆ воздви́гшемѹ до́мы па́дшыѧ на́шѧ.

¹⁶Никто́же со́зданъ бы́сть тако́въ, ѩ҆́кѡ є҆нѡ́хъ на землѝ: то́й бо взѧ́тъ бы́сть ѿ землѝ.

¹⁷Нижѐ ѩ҆́кѡ ї҆ѡ́сифъ бы́сть мѹ́жъ, во́ждь бра́тїи, ѹ҆твержде́нїе лю́демъ, и҆ кѡ́сти є҆гѡ̀ посѣщє́ны бы́ша.

¹⁸Си́мъ и҆ си́ѳъ просла҄влена бы́ста въ человѣ́цѣхъ, и҆ па́че всѧ́кагѡ живо́тнагѡ въ тва́ри а҆да́мъ.