Read Библия Церковнославянская Сiрахъ 5 Bible Online

Сiрахъ 5 - Библия Церковнославянская bible

Сiрахъ 5

¹Не ѹ҆пова́й на и҆мѣ҄нїѧ твоѧ҄ и҆ не и҆ рцы̀: довѡ́лна мѝ сѹ́ть.

²Не послѣ́дѹй дѹшѝ твое́й и҆ крѣ́пости твое́й, є҆́же ходи́ти въ по́хотехъ се́рдца твоегѡ̀,

³и҆ не рцы̀: кто́ мѧ премо́жетъ; гд҇ь бо мстѧ́й ѿмсти́тъ тѝ.

⁴Не рцы̀: согрѣши́хъ, и҆ что́ ми бы́сть; гд҇ь бо є҆́сть долготерпѣли́въ.

⁵Ѡ҆ ѡ҆чище́нїи безстра́шенъ не бѹ́ди, прилага́ти грѣхѝ на грѣхѝ,

⁶не рцы̀: щедро́та є҆гѡ̀ мно́га є҆́сть, мно́жество грѣхѡ́въ мои́хъ ѡ҆ч҇титъ:

⁷мл҇ть бо и҆ гнѣ́въ ѹ҆ негѡ̀, и҆ на грѣ́шницѣхъ почі́етъ ѩ҆́рость є҆гѡ̀.

⁸Не ме́дли ѡ҆брати́тисѧ ко гд҇ѹ и҆ не ѿлага́й де́нь ѿ днѐ:

⁹внеза́пѹ бо и҆зы́детъ гнѣ́въ гд҇ень, и҆ во вре́мѧ мє́сти поги́бнеши.

¹⁰Не ѹ҆пова́й на и҆мѣ҄нїѧ непра́вєдна: ни чи́мже бо ѹ҆по́льзѹютъ въ де́нь наведе́нїѧ.

¹¹Не вѣ́й себѐ всѧ́кимъ вѣ́тромъ и҆ не ходѝ всѧ́кимъ пѹте́мъ: си́це грѣ́шникъ двоѧзы́ченъ.

¹²Бѹ́ди ѹ҆твержде́нъ въ ра́зѹмѣ твое́мъ, и҆ є҆ди́но бѹ́ди сло́во твоѐ.

¹³Бѹ́ди ско́ръ въ слѹ́шанїи твое́мъ, и҆ съ долготерпѣ́нїемъ ѿвѣщава́й ѿвѣ́тъ.

¹⁴А҆́ще є҆́сть въ тебѣ̀ ра́зѹмъ, ѿвѣща́й и҆́скреннемѹ: а҆́ще же нѝ, то̀ бѹ́ди рѹка̀ твоѧ̀ на ѹ҆стѣ́хъ твои́хъ.

¹⁵Сла́ва и҆ безче́стїе въ бесѣ́дѣ и҆ ѧ҆зы́къ человѣ́чь паде́нїе є҆мѹ̀.

¹⁶Не словѝ шепотни́къ и҆ ѧ҆зы́комъ твои́мъ не ѹ҆ловлѧ́й:

¹⁷на та́ти бо стѹ́дъ є҆́сть и҆ зазо́ръ лѹка́въ над̾ двоѧзы́чнымъ.

¹⁸Ѡ҆ вели́цѣ и҆ ѡ҆ ма́лѣ не неразѹмѣва́й.