Read Библия Церковнославянская Сiрахъ 50 Bible Online

Сiрахъ 50 - Библия Церковнославянская bible

Сiрахъ 50

¹Сі́мѡнъ сы́нъ ѻ҆ні́инъ ї҆ере́й вели́кїй, и҆́же въ животѣ̀ свое́мъ состро́и до́мъ и҆ во дни҄ своѧ҄ ѹ҆твердѝ це́рковь.

²И҆ тѣ́мъ ѡ҆снована̀ бы́сть высота̀ сѹгѹ́ба, воздвиже́нїе высо́ко ѡ҆гражде́нїѧ церко́внагѡ.

³Во дни҄ є҆гѡ̀ ѹ҆ма́лишасѧ сосѹ́ди водні́и, ро́въ ѩ҆́кѡ мо́рѧ ѡ҆крѹже́нїе.

⁴Блюды́й лю́ди своѧ҄ ѿ паде́нїѧ и҆ ѹ҆крѣпи́вый гра́дъ во ѡ҆бсѣде́нїи.

⁵Ко́ль просла́вленъ бы́сть въ сожи́телствѣ люді́й, во и҆схо́дѣ до́мѹ катапета́смы;

⁶ѩ҆́кѡ ѕвѣзда̀ ѹ҆́треннѧѧ посредѣ̀ ѡ҆блакѡ́въ, а҆́ки лѹна̀ полна̀ во дне́хъ свои́хъ,

⁷ѩ҆́кѡ со́лнце сїѧ́ющее на це́рковь вы́шнѧгѡ, и҆ а҆́ки дѹга̀ свѣтѧ́щаѧсѧ на ѡ҆́блацѣхъ сла́вы:

⁸ѩ҆́кѡ цвѣ́тъ ши́пкѡвъ во дне́хъ весе́нныхъ, ѩ҆́кѡ крі́нъ при и҆схо́дищихъ воды̀, ѩ҆́кѡ стебло̀ лїва́ново во дне́хъ жа́твы:

⁹ѩ҆́кѡ ѻ҆́гнь и҆ лїва́нъ на ѻ҆гни́щи,

¹⁰ѩ҆́коже сосѹ́дъ зла́тъ и҆ско́ванъ, ѹ҆кра́шенъ всѧ́кимъ ка́менїемъ многоцѣ́ннымъ,

¹¹ѩ҆́кѡ ма́слина и҆зносѧ́щаѧ плоды̀ и҆ ѩ҆́кѡ кѷпарі́съ возраста́ѧй до ѡ҆́блакъ.

¹²Внегда̀ взима́ти є҆мѹ̀ ѻ҆де́ждѹ сла́вы и҆ ѡ҆блача́тисѧ є҆мѹ̀ въ соверше́нїе хвале́нїѧ, въ восхожде́нїи ѻ҆лтарѧ̀ ст҃а́гѡ просла́ви ѻ҆де́ждѹ ст҃ы́ни.

¹³Внегда́ же прїима́ти ча҄сти ѿ рѹ́къ ї҆ере́йскихъ, и҆ то́й стоѧ́ше при ѻ҆гни́щи ѻ҆лтарѧ̀:

¹⁴ѡ҆́крестъ є҆гѡ̀ вѣне́цъ бра́тїи, ѩ҆́кѡ прозѧбе́нїе ке́дрско въ лїва́нѣ, и҆ ѡ҆крѹжи́ша є҆го̀ ѩ҆́кѡ сте́блїе фі́нїково:

¹⁵и҆ всѝ сы́нове а҆арѡ҄ни во сла́вѣ свое́й, и҆ приноше́нїе гд҇не въ рѹка́хъ и҆́хъ пред̾ всѣ́мъ собо́ромъ ї҆и҃левымъ.

¹⁶И҆ соверше́нїе слѹжи́телей на ѻ҆лтаре́хъ, є҆́же ѹ҆краси́ти приноше́нїе вы́шнѧгѡ вседержи́телѧ,

¹⁷прострѐ на ча́шѹ возлїѧ́нїѧ рѹ́кѹ свою̀, и҆згнетѐ ѿ кро́ве гро́здныѧ, возлїѧ̀ на ѡ҆снова́нїе ѻ҆лтарѧ̀ въ воню̀ благоѹха́нїѧ вы́шнемѹ всѣ́хъ цр҃е́ви.

¹⁸Тогда̀ возопи́ша сы́нове а҆арѡ҄ни, трѹба́ми ко́ваными вострѹби́ша, ѹ҆слы́шанъ сотвори́ша гла́съ вели́къ на па́мѧть пред̾ вы́шнимъ.

¹⁹Тогда̀ всѝ лю́дїе ѻ҆́бще приспѣ́ша и҆ падо́ша ни́цы на землѝ поклони́тисѧ гд҇еви своемѹ̀ вседержи́телю бг҃ѹ вы́шнемѹ:

²⁰и҆ восхвали́ша пѣвцы̀ гла҄сы свои́ми, въ вели́цѣмъ гла́сѣ ѹ҆слади́сѧ пѣ́нїе:

²¹и҆ помоли́шасѧ лю́дїе гд҇ѹ вы́шнемѹ моли́твою пред̾ мл҇тивымъ, до́ндеже соверши́сѧ красота̀ гд҇нѧ, и҆ слѹ́жбѹ свою̀ сконча́ша.

²²Тогда̀ соше́дъ воздви́же рѹ́ки своѧ҄ на ве́сь собо́ръ сынѡ́въ ї҆и҃левыхъ, да́ти бл҃гослове́нїе гд҇еви ѿ ѹ҆сте́нъ свои́хъ и҆ и҆́менемъ є҆гѡ̀ похвали́тисѧ.

²³И҆ повторѝ поклоне́нїе прїѧ́ти блг҇ве́нїе ѿ вы́шнѧгѡ.

²⁴И҆ нн҃ѣ благослове́нїе бг҃а всѣ́хъ, вє́лїѧ творѧ́щагѡ є҆ди́нагѡ всю́дѹ, возносѧ́щагѡ дни҄ на́шѧ ѿ ложе́снъ и҆ творѧ́щагѡ съ на́ми по мл҇ти свое́й:

²⁵да да́стъ на́мъ весе́лїе се́рдца, и҆ да бѹ́детъ ми́ръ во дни҄ на́шѧ во ї҆и҃ли ѩ҆́коже дни҄ вѣ́ка:

²⁶да ѹ҆вѣ́ритъ съ на́ми мл҇ть свою̀ и҆ во дни҄ своѧ҄ и҆зба́витъ ны̀.

²⁷Два̀ ѩ҆зы҄ка ѡ҆мерзѣ́ста дѹшѝ мое́й, а҆ тре́тїй нѣ́сть ѩ҆зы́къ:

²⁸сѣдѧ́щїи на горѣ̀ самарі́йстѣй и҆ фѷлїсті́млѧне, и҆ лю́дїе бѹ́и живѹ́щїи въ сїкі́мѣхъ.

²⁹Наказа́нїе ра́зѹма и҆ вѣ́дѣнїѧ начерта̀ въ кни́зѣ се́й ї҆исѹ́съ сы́нъ сїра́ховъ, ї҆ер҇ли́млѧнинъ, и҆́же ѡ҆дождѝ премѹ́дрость ѿ се́рдца своегѡ̀.

³⁰Блаже́нъ, и҆́же въ си́хъ поживе́тъ, и҆ и҆́же ѧ҆̀ положи́тъ въ се́рдцы свое́мъ, ѹ҆премѹ́дритсѧ.

³¹А҆́ще бо сотвори́тъ сїѧ҄, ко всѣ҄мъ ѹ҆крѣпи́тсѧ, ѩ҆́кѡ свѣ́тъ гд҇ень слѣ́дъ є҆гѡ̀.