Read Библия Церковнославянская Сiрахъ 51 Bible Online

Сiрахъ 51 - Библия Церковнославянская bible

Сiрахъ 51

¹Моли́тва ї҆исѹ́са сы́на сїра́хова. И҆сповѣ́мсѧ тебѣ̀, гд҇и цр҃ю̀, и҆ восхвалю̀ тебѐ, бг҃а сп҃са моего̀, и҆сповѣ́даюсѧ и҆́мени твоемѹ̀,

²ѩ҆́кѡ покрови́тель и҆ помо́щникъ бы́лъ є҆сѝ мѝ

³и҆ и҆зба́вилъ є҆сѝ тѣ́ло моѐ ѿ па́гѹбы и҆ ѿ сѣ́ти клеветы̀ ѧ҆зы́чныѧ, ѿ ѹ҆сте́нъ дѣ́лающихъ лжѹ̀, и҆ на проти́вѧщихсѧ мѝ бы́лъ є҆сѝ помо́щникъ,

⁴и҆ и҆зба́вилъ мѧ̀ є҆сѝ по мно́жествѹ мл҇ти и҆́мене твоегѡ̀ ѿ скрежета́нїѧ гото́выхъ снѣ́сти мѧ̀,

⁵и҆з̾ рѹкѝ и҆́щѹщихъ дѹшѝ моеѧ̀, ѿ мно́гихъ скорбе́й, ѩ҆̀же и҆мѣ́хъ,

⁶ѿ стѹжа́нїѧ ѻ҆́гненнагѡ ѡ҆́крестъ и҆ ѿ среды̀ ѻ҆гнѧ̀, и҆дѣ́же не сожего́хсѧ,

⁷и҆з̾ глѹбины̀ чре́ва а҆́дова и҆ ѿ ѧ҆зы́ка нечи́ста и҆ словесѐ ло́жна, ко царю̀ ѿ ѡ҆болга́нїѧ ѧ҆зы́ка непра́ведна.

⁸Прибли́жисѧ да́же до сме́рти дѹша̀ моѧ̀,

⁹и҆ живо́тъ мо́й бѣ̀ бли́з̾ а҆́да преиспо́днѧгѡ.

¹⁰Ѡ҆бдержа́ша мѧ̀ ѿвсю́дѹ, и҆ не бѣ̀ помога́ющагѡ: воззрѣ́хъ на по́мощь человѣ́чѹ, и҆ не бѣ̀.

¹¹И҆ помѧнѹ́хъ мл҇ть твою̀, гд҇и, и҆ дѣѧ́нїе твоѐ, є҆́же ѿ вѣ́ка:

¹²ѩ҆́кѡ и҆з̾има́еши терпѧ́щихъ тѧ̀, (гд҇и,) и҆ сп҃са́еши и҆̀хъ ѿ рѹ́къ вра́жїихъ.

¹³И҆ вознесо́хъ ѿ землѝ моле́нїе моѐ и҆ ѡ҆ и҆збавле́нїи ѿ сме́рти помоли́хсѧ:

¹⁴и҆ призва́хъ гд҇а, ѻ҆ц҃а̀ гд҇а моегѡ̀, не ѡ҆ста́вити менѐ во дни҄ ско́рби, во вре́мѧ го́рдыхъ без̾ по́мощи.

¹⁵Восхвалю̀ и҆́мѧ твоѐ непреста́ннѡ и҆ воспою̀ тѧ̀ во и҆сповѣ́данїи. И҆ ѹ҆слы́шана бы́сть моли́тва моѧ̀.

¹⁶Сп҇лъ бо мѧ̀ є҆сѝ ѿ па́гѹбы и҆ и҆з̾ѧ́лъ є҆сѝ мѧ̀ ѿ вре́мене лѹка́вна.

¹⁷Сегѡ̀ ра́ди и҆сповѣ́мсѧ тебѣ̀, и҆ восхвалю̀ тѧ̀, и҆ бл҃гословлю̀ и҆́мѧ твоѐ, гд҇и.

¹⁸Е҆щѐ ю҆́нъ сы́й, пре́жде не́же стра́нствовати мѝ, и҆ска́хъ премѹ́дрости ѩ҆́вѣ въ моли́твѣ мое́й:

¹⁹пред̾ це́рковїю моли́хсѧ ѡ҆ не́й, и҆ да́же до послѣ́днихъ взыщѹ̀ є҆ѧ̀: ѿ цвѣ́та, ѩ҆́кѡ зрѣ́ющагѡ гро́зда,

²⁰возвесели́сѧ се́рдце моѐ ѡ҆ не́й: по́йде нога̀ моѧ̀ въ пра́вости, ѿ ю҆́ности моеѧ̀ и҆зслѣ́дихъ ю҆̀.

²¹Приклони́хъ ма́лѡ ѹ҆́хо моѐ и҆ прїѧ́хъ, и҆ мно́гое ѡ҆брѣто́хъ себѣ̀ наказа́нїе:

²²пред̾ѹспѣ́ѧнїе бы́сть мѝ въ не́й.

²³Даю́щемѹ мнѣ̀ премдрость возда́мъ сла́вѹ.

²⁴Ѹ҆мы́слихъ бо твори́ти ю҆̀, и҆ поревнова́хъ благо́мѹ, и҆ не постыжѹ́сѧ.

²⁵Борѧ́шесѧ дѹша̀ моѧ̀ ѡ҆ не́й, и҆ въ творе́нїи мое́мъ и҆спыта́хъ:

²⁶рѹ́цѣ моѝ воздѣ́хъ на высотѹ̀ и҆ невѣ҄дѣнїѧ є҆ѧ̀ ѹ҆разѹмѣ́хъ.

²⁷Дѹ́шѹ мою̀ напра́вихъ къ не́й,

²⁸се́рдце стѧжа́хъ съ не́ю и҆спе́рва, и҆ во ѡ҆чище́нїи ѡ҆брѣто́хъ ю҆̀: сегѡ̀ ра́ди не ѡ҆ста́вленъ бѹ́дѹ.

²⁹И҆ ѹ҆тро́ба моѧ̀ смѧте́сѧ и҆́щѹщи є҆ѧ̀: тѣ́мже стѧжа́хъ благо́е стѧжа́нїе.

³⁰Дадѐ гд҇ь ѧ҆зы́къ мѝ мздѹ̀ мою̀, и҆ тѣ́мъ восхвалю̀ є҆го̀.

³¹Прибли́житесѧ ко мнѣ̀, ненака́заннїи, и҆ водвори́тесѧ въ домѹ̀ наказа́нїѧ.

³²Почто̀ лиша́етесѧ, глаго́лете, въ си́хъ, и҆ дѹ́ши ва́шѧ жа́ждѹтъ ѕѣлѡ̀;

³³Ѿверзо́хъ ѹ҆ста̀ моѧ҄ и҆ глаго́лахъ: стѧжи́те себѣ̀ без̾ сребра̀ (мѹ́дрость):

³⁴вы́ю ва́шѹ подложи́те под̾ и҆́го, и҆ да прїи́метъ дѹша̀ ва́ша наказа́нїе: бли́з̾ є҆́сть ѡ҆брѣстѝ ю҆̀.

³⁵Ви́дите ѻ҆чи́ма ва́шима, ѩ҆́кѡ ма́лѡ трѹди́хсѧ и҆ ѡ҆брѣто́хъ себѣ̀ мно́гъ поко́й.

³⁶Приѡбщи́тесѧ наказа́нїю мно́гимъ число́мъ сребра̀, и҆ мно́го зла́то пристѧ́жете є҆́ю.

³⁷Да возвесели́тсѧ дѹша̀ ва́ша въ мл҇ти є҆гѡ̀, и҆ да не постыдите́сѧ въ хвале́нїи є҆гѡ̀.

³⁸Дѣ́лайте дѣ́ло ва́ше пре́жде вре́мене, и҆ да́стъ мздѹ̀ ва́шѹ во вре́мѧ своѐ.