Read Библия Церковнославянская Сiрахъ 7 Bible Online

Сiрахъ 7 - Библия Церковнославянская bible

Сiрахъ 7

¹Не творѝ ѕла̀, и҆ не пости́гнетъ тѧ̀ ѕло̀:

²ѿстѹпѝ ѿ непра́вды, и҆ ѹ҆клони́тсѧ ѿ тебє̀.

³Сы́не, не сѣ́й на бразда́хъ непра҄вды и҆ не и҆́маши пожа́ти и҆̀хъ седмери́цею.

⁴Не просѝ ѹ҆ гд҇а влады́чества, нижѐ ѿ царѧ̀ сѣда́лища сла́вы.

⁵Не ѡ҆правда́й себѐ пред̾ бг҃омъ и҆ пред̾ царе́мъ не мѹдри́сѧ.

⁶Не и҆щѝ, да бѹ́деши сѹдїѧ̀, є҆гда̀ не возмо́жеши ѿѧ́ти непра҄вды: да не когда̀ ѹ҆бои́шисѧ лица̀ си́льнагѡ и҆ положи́ши собла́знъ въ пра́вости твое́й.

⁷Не согрѣша́й во мно́жествѣ гра́да и҆ не низлага́й себѐ въ наро́дѣ.

⁸Не свѧжѝ два́жды грѣха̀, и҆ во є҆ди́нѣмъ бо не непови́ненъ бѹ́деши.

⁹Не рцы̀: на мно́жество дарѡ́въ мои́хъ воззри́тъ, и҆ приносѧ́щѹ мѝ бг҃ѹ вы́шнемѹ, прїи́метъ.

¹⁰Не малодѹ́шествѹй въ моли́твѣ твое́й и҆ ми́лостыню твори́ти не пре́зри.

¹¹Не рѹга́йсѧ человѣ́кѹ сѹ́щѹ въ го́рести дѹшѝ є҆гѡ̀: є҆́сть бо смирѧ́ѧй и҆ возносѧ́й.

¹²Не ѡ҆рѝ лжѝ на бра́та твоего̀, нижѐ дрѹ́гѹ то́жде творѝ.

¹³Не восхощѝ лга́ти всѧ́кїѧ лжѝ: ѹ҆чаще́нїе бо є҆ѧ̀ не на бла́го.

¹⁴Не бѹ́ди велерѣ́чивъ во мно́жествѣ ста́рєцъ и҆ не повторѝ сло́ва въ моли́твѣ твое́й.

¹⁵Не возненави́ди трѹ́днагѡ дѣ́ла и҆ земледѣ́лїѧ ѿ вы́шнѧгѡ со́здана.

¹⁶Не привмѣнѧ́й себѐ ко мно́жествѹ грѣ́шникѡвъ.

¹⁷Смирѝ дѹ́шѹ твою̀ ѕѣлѡ̀.

¹⁸Помѧнѝ, ѩ҆́кѡ гнѣ́въ не заме́длитъ,

¹⁹поне́же ме́сть нечести́вагѡ ѻ҆́гнь и҆ че́рвь.

²⁰Не и҆змѣнѝ дрѹ́га ни на что̀, ни бра́та пр҇на на зла́тѣ сѡфі́рстѣмъ.

²¹Не ѿстѹпа́й ѿ жены̀ премѹ́дры и҆ бла́ги, и҆́бо благода́ть є҆ѧ̀ па́че зла́та.

²²Не ѡ҆ѕло́би раба̀ дѣ́лающа во и҆́стинѣ, нижѐ нае́мника вдаю́ща дѹ́шѹ свою̀.

²³Раба̀ разѹми́ва да лю́битъ дѹша̀ твоѧ̀, и҆ не лишѝ є҆го̀ свобо́ды.

²⁴Е҆́сть ли тѝ ско́тъ, призира́й є҆го̀, и҆ а҆́ще тѝ бѹ́детъ потре́бенъ, да пребѹ́детъ тѝ.

²⁵Сѹ́ть ли тѝ ча҄да, накажѝ ѧ҆̀ и҆ преклонѝ ѿ ю҆́ности вы́ю и҆́хъ.

²⁶Сѹ́ть ли тѝ дщє́ри, внима́й тѣ́лѹ и҆́хъ и҆ не ѩ҆влѧ́й весе́лагѡ къ ни҄мъ лица̀ твоегѡ̀.

²⁷Вы́дай дще́рь, и҆ бѹ́деши соверши́вый дѣ́ло вели́ко: и҆ мѹ́жеви разѹми́вѹ да́ждь ю҆̀.

²⁸Е҆́сть ли тѝ жена̀ по дѹшѝ, не и҆зженѝ є҆ѧ̀.

²⁹Всѣ́мъ се́рдцемъ твои́мъ прославлѧ́й ѻ҆тца̀ твоего̀ и҆ ма́тернихъ болѣ́зней не забѹ́ди:

³⁰помѧнѝ, ѩ҆́кѡ тѣ́ма рожде́нъ є҆сѝ, и҆ что̀ и҆́ма возда́си, ѩ҆́коже ѻ҆́на тебѣ̀;

³¹Все́ю дѹше́ю твое́ю благоговѣ́й гд҇еви и҆ ї҆ерє́и є҆гѡ̀ чтѝ.

³²Все́ю си́лою (твое́ю) возлюбѝ сотво́ршаго тѧ̀ и҆ слѹжи́телей є҆гѡ̀ не ѡ҆ста́ви.

³³Бо́йсѧ гд҇а и҆ просла́ви ї҆ере́а, и҆ да́ждь ча́сть є҆мѹ̀, ѩ҆́коже заповѣ́дано тѝ:

³⁴нача́тки, и҆ ѡ҆ согрѣше́нїи, и҆ даѧ́нїе мы́шцей, и҆ же́ртвѹ ст҃ы́ни, и҆ нача́токъ ст҃ы́хъ.

³⁵И҆ ни́щемѹ прострѝ рѹ́кѹ твою̀, да соверши́тсѧ благослове́нїе твоѐ.

³⁶Благода́ть даѧ́нїѧ пред̾ всѧ́кимъ живы́мъ (да бѹ́детъ), и҆ над̾ мертвеце́мъ не возбранѝ благода́ти.

³⁷Не ѹ҆странѧ́йсѧ ѿ пла́чѹщихъ и҆ съ сѣ́тѹющими сѣ́тѹй.

³⁸Не лѣни́сѧ посѣща́ти болѧ́ща: си́ми бо возлю́бленъ бѹ́деши.

³⁹Во всѣ́хъ словесѣ́хъ твои́хъ помина́й послѣ҄днѧѧ твоѧ҄, и҆ во вѣ́ки не согрѣши́ши.