Read Библия Церковнославянская Сiрахъ 8 Bible Online

Сiрахъ 8 - Библия Церковнославянская bible

Сiрахъ 8

¹Не свари́сѧ съ человѣ́комъ си́льнымъ, и҆ да не когда̀ впаде́ши въ рѹ́цѣ є҆гѡ̀.

²Не тѧжи́сѧ съ человѣ́комъ бога́тымъ, да не когда̀ ѡ҆тѧготи́тъ тѝ мѣ́рѹ:

³мно́гихъ бо погѹбѝ зла́то, и҆ сердца̀ ца҄рскаѧ преклонѝ.

⁴Не свари́сѧ съ человѣ́комъ ѧ҆зы́чнымъ и҆ не наклада́й на ѻ҆́гнь є҆гѡ̀ дро́въ.

⁵Не и҆гра́й съ ненака́заннымъ, да не прїи́мѹтъ безче́стїѧ прароди́телїе твоѝ.

⁶Не поносѝ человѣ́кѹ ѡ҆браща́ющѹсѧ ѿ грѣха̀: помѧнѝ, ѩ҆́кѡ всѝ є҆смы̀ во є҆пїтїмїа́хъ.

⁷Не безче́сти человѣ́ка въ ста́рости є҆гѡ̀: и҆́бо и҆ ты̀ са́мъ состарѣ́ешисѧ.

⁸Не ра́дѹйсѧ ѡ҆ мертвецѣ̀ бы́вшемъ вражде́бнѣйшемъ тебѣ̀: помѧнѝ, ѩ҆́кѡ всѝ ѹ҆мира́емъ.

⁹Не пре́зри по́вѣсти премѹ́дрыхъ и҆ въ при́тчахъ и҆́хъ живѝ:

¹⁰ѩ҆́кѡ ѿ ни́хъ навы́кнеши наказа́нїю и҆ слѹжи́ти вельмо́жамъ ѹ҆до́бнѡ.

¹¹Не ѿстѹпа́й ѿ по́вѣсти ста́рцєвъ: и҆́бо ті́и навыко́ша ѿ ѻ҆тє́цъ свои́хъ:

¹²ѩ҆́кѡ ѿ ни́хъ навы́кнеши ра́зѹмѹ и҆ во вре́мѧ потре́бно да́ти ѿвѣ́тъ.

¹³Не возгнѣща́й ѹ҆́глїѧ грѣ́шникѹ, да не сгори́ши ѻ҆гне́мъ пла́мене є҆гѡ̀.

¹⁴Не воста́ни на лицѐ досади́телево, да не присѣди́тъ ѩ҆́кѡ навѣ́тникъ ѹ҆стѡ́мъ твои҄мъ.

¹⁵Взаи́мъ не да́й человѣ́кѹ крѣ́пльшѹ тебє̀, и҆ а҆́ще да́си, бѹ́ди ѩ҆́коже погѹби́вый.

¹⁶Не порѹча́йсѧ вы́ше си́лы твоеѧ̀: и҆ а҆́ще порѹчи́шисѧ, ѩ҆́кѡ воздаѧ́й пецы́сѧ.

¹⁷Не свари́сѧ со сѹдїе́ю: по разсѹжде́нїю бо є҆гѡ̀ бѹ́дѹтъ сѹди́ти є҆мѹ̀.

¹⁸Съ де́рзымъ не ходѝ на пѹ́ть, ѩ҆́кѡ да не ѡ҆тѧготи́тсѧ на тѧ̀: то́й бо сотвори́тъ по во́ли свое́й, и҆ съ бѹ́йствомъ є҆гѡ̀ поги́бнеши.

¹⁹Съ ѩ҆́ростивымъ не свари́сѧ и҆ не и҆дѝ съ ни́мъ сквозѣ̀ пѹсты́ню: пред̾ ѻ҆чи́ма бо є҆гѡ̀ кро́вь ѩ҆́кѡ ничто́же є҆́сть, и҆ и҆дѣ́же нѣ́сть по́мощи, та́мѡ низложи́тъ тѧ̀.

²⁰Съ бѹ́имъ совѣ́та не творѝ: не возмо́жетъ бо сло́ва ѹ҆держа́ти.

²¹Пред̾ чѹжи́мъ не творѝ та́йнагѡ: не вѣ́си бо, что̀ роди́тъ тѝ.

²²Всѧ́комѹ человѣ́кѹ не ѩ҆влѧ́й се́рдца твоегѡ̀, да не возда́стъ тѝ благода́ти ло́жныѧ.